قونايەۆ قالاسىنىڭ اكىمى اسحات بەردىحانوۆ شەڭگەلدى اۋىلدىق وكرۋگىندە قىزمەت ەتەتىن شارۋالارمەن، سورعى ستانسيالارىنىڭ باسشىلارىمەن كەزدەستى،- دەپ حابارلايدى Dalanews.kz

اۋقىمدى جيىندا اۋىل شارۋاشىلىعى سالاسىن دامىتۋ ماسەلەسى تالقىلاندى. جاۋاپتى ءبولىمنىڭ باسشىسى اسقار يبرايموۆتىڭ سوزىنشە، ەلدىمەكەندە 9 سورعى ستانسياسى ورنالاسقان. ءقازىر ونىڭ تورتەۋىندە كوكتەمگى دالا جۇمىستارىنا دايىندىق باستالىپ، اعىمداعى جوندەۋ جاسالىپ جاتىر.

ال №4 سورعى ستانسياسىنىڭ باسشىلىعى قارجىلىق تاپشىلىقتىڭ بولۋىنا بايلانىستى جوندەۋ جۇرگىزۋدىڭ كەشىكتىرىلىپ جاتقانىن ءمالىم ەتتى. وسى ورايدا، اسحات بەردىحانوۆ اكىمدىكپەن ءۇشجاقتى مەموراندۋمعا قول قويۋ ارقىلى قاجەتتى قوندىرعىلاردى ۋاقىتشا پايدالانۋ تۋرالى ۇسىنىس ءبىلدىردى. ەگەر بۇل شارا جۇزەگە اسسا، №4 سورعى ستانسياسى 1000 گەكتاردان استام جەردى سۋارعا مۇمكىندىك بولادى.

سونداي-اق باسقوسۋدا باسقا دا سورعى ستانسيالارىنىڭ جەلىلەرىن جاڭعىرتۋعا قاجەتتى قۇجاتتار دايىندالىپ جاتقانى ايتىلدى. ال №5 سورعى ستانسياسىنىڭ سۋارۋ جەلىلەرىن كۇردەلى جوندەۋ جۇمىستارى 2022 جىلى باستالعان بولاتىن. بارلىق جوبالاردا تاپسىرىس بەرۋشى – الماتى وبلىسىنىڭ قۇرىلىس باسقارماسى.

سۋدى ۇنەمدەۋ ماسەلەسىنە كەلسەك، قازىرگى تاڭدا تامشىلاتىپ سۋارۋعا قاجەتتى قۇرال-جابدىقتاردى ءوندىرۋشى «جىبەك جولى» جشس-مەن شارۋالار كەلىسسوزدەر جۇرگىزىپ جاتىر. بيىل جاڭا تەحنولوگيا پايدالانىلاتىن ەگىستىك القابىنىڭ كولەمىن ۇلعايتۋ جوسپارلانىپ وتىر.

سونىمەن قاتار شارۋالارعا بەرىلەتىن مەملەكەتتىك قولداۋلاردى الۋدىڭ ءتۇرلى تەتىكتەرى دە ايتىلدى.

ايتا كەتەيىك، بىلتىر شەڭگەلدىدە 8050 گەكتار جەر يگەرىلگەن.