بۇگىن اقتوبەدە «ۆلاديمير دۆوركوۆيچ مەموريالى – Aktobe Open 2025» حالىقارالىق شاحمات فەستيۆالى باستالدى، ونىڭ باستى ءتۋرنيرى كلاسسيكالىق شاحماتتان قازاقستان كۋبوگىنىڭ باستاپقى كەزەڭى بولىپ تابىلادى. جارىسقا 19 ەلدەن 311 شاحماتشى قاتىسادى. جۇلدىزدار قاتارىندا الەمدىك شاحمات تاجىنە ۇمىتكەرلەر ءتۋرنيرىنىڭ قاتىسۋشىسى ۆان حاو (جۇڭگو)، رەيتينگى 2600-دەن جوعارى گروسسمەيستەرلەر جانە قازاقستاننىڭ جەتەكشى شاحماتشىلارى بار،- دەپ حابارلايدى Dalanews.kz

فەستيۆال 22-30 ماۋسىم ارالىعىندا وتەدى جانە ءۇش ءتۋرنيردى قامتيدى::

• Masters (رەيتينگى 2400 جانە ودان جوعارى شاحماتشىلار)
• Challengers (رەيتينگى 1900–2399 ارالىعىنداعى شاحماتشىلار ءۇشىن)
• Open (رەيتينگى 1400–1899 ارالىعىنداعى شاحماتشىلار ءۇشىن)

ۆلاديمير دۆوركوۆيچتى ەسكە الۋ حالىقارالىق شاحمات فەدەراسياسى (FIDE) مەن KazChess/قازاقستان شاحمات فەدەراسياسىنىڭ ۇيىمداستىرۋىمەن، ق ر تۋريزم جانە سپورت مينيسترلىگى مەن اقتوبە وبلىسى اكىمدىگىنىڭ قولداۋىمەن وتۋدە. باس سەرىكتەستەر – Freedom Holding Corp. جانە اقتوبە مىس كومپانياسى. جارىس وتەتىن الاڭ – ACE تەننيس ورتالىعى (ماڭگىلىك ەل كوشەسى، 2) –قازاقستان تەننيس فەدەراسياسىنىڭ قولداۋىمەن ۇسىنىلعان.

«بۇل تۋرنير ءبىزدىڭ شاحماتشىلارىمىزعا الەمدىك ەليتاعا قارسى ءوز ۇيىندە – تانىس ورتادا، ءبىراق وتە جوعارى باسەكەلەستىك جاعدايىندا ويناۋعا كەرەمەت مۇمكىندىك بەرەدى. جۇلدە قورىنىڭ كولەمى تۋرنيرگە ساپالى قۇرامدى جيناۋعا مۇمكىندىك بەردى، بۇل ونىڭ مارتەبەسىن كورسەتەدى. ەڭ باستىسى – مۇنداي جارىستىڭ وڭىردە ءوتىپ جاتقانى. ءبىز تەك استانامەن الماتىدا عانا ەمەس، شاحمات سەرپىندى دامىپ جاتقان ايماقتاردا وسىنداي اۋقىمدى تۋرنيرلەردى وتكىزۋدى سانالى تۇردە قولعا الدىق. بۇل جەرگىلىكتى ينفراقۇرىلىمدى دامىتۋعا، جاستاردى شابىتتاندىرۋعا جانە سپورتقا قۋاتتى سەرپىن بەرۋگە ىقپال ەتەدى»، – دەپ اتاپ ءوتتى قازاقستان شاحمات فەدەراسياسىنىڭ پرەزيدەنتى تيمۋر تۋرلوۆ.

Masters ءتۋرنيرى وتە مىقتى قۇراممەن ەرەكشەلەنەدى. بەس قاتىسۋشى مانسابىندا «2700» رەيتينگ مەجەسىن ەڭسەرگەن سۋپەرگروسسمەيستەر ساناتىنا جاتاتىندىعىن ايتساق تا جەتكىلىكتى:

• ۆان حاو (2701، جۇڭگو) — ۇمىتكەرلەر ءتۋرنيرىنىڭ قاتىسۋشىسى، جۇڭگو جانە ازيا چەمپيونى، FIDE Grand Swiss 2019 جەڭىمپازى. ەڭ جوعارعى رەيتينگى – 2763.
• اركاديي نايديچ (2737، بولگاريا)
• يۆان چەپارينوۆ (2718، بولگاريا)
• الەكسەي سارانا (2717، سەربيا)
• سانان سيۋگيروۆ (2712، ۆەنگريا)

قازىرگى تاڭدا ولاردىڭ رەيتينگتەرى (ۆان حاودان باسقا) 2700 مەجەسىنەن تومەندەگەنىمەن، ولاردىڭ دەڭگەيى ءالى دە الەمنىڭ ۇزدىك شاحماتشىلارى قاتارىنا كىرۋگە مۇمكىندىك بەرەدى.

Aktobe Open 2025 ءتۋرنيرىنىڭ «جەتى مىقتىسى»:

1. GM ۆان حاو (2701، جۇڭگو) – 35 جاستا، FIDE Grand Swiss-2019 جەڭىمپازى، 2020/21 جىلعى ۇمىتكەرلەر ءتۋرنيرىنىڭ قاتىسۋشىسى، فيدە رەيتينگىندە №31 (2025 ج. 1 ماۋسىمدا)؛
2. GM الەكسەي سارانا (2686، سەربيا) – 25 جاستا، 2018 جىلى تاگانروگتا وتكەن دۆوركوۆيچ مەموريالىنىڭ جەڭىمپازى جانە Aktobe Open 2024ء-تىڭ قولا جۇلدەگەرى، №43.
3. GM شانت سارگسيان (2669، ارمەنيا) – 23 جاستا، № 52؛
4. GM يۆان چەپارينوۆ (2641، بولگاريا) – 38 جاستا، № 85؛
5. GM بارديا دانەشۆار (2640، يران) – 18 جاستا (19 جاسقا 21 ماۋسىم كۇنى تولادى – اككرەديتاسيا كۇنى)، Aktobe Open 2023 جەڭىمپازى جانە 2023 جىلعى قازاقستان كۋبوگىنىڭ كۇمىس جۇلدەگەرى، №86؛
6. GM سانان سيۋگيروۆ (2635، ۆەنگريا) – 32 جاستا، № 95؛
7. GM اركاديي نايديچ (2629، بولگاريا) – 39 جاستا، № 107.

17 ويىنشىنىڭ رەيتينگى 2500-2620 ارالىعىندا. جالپى Masters تۋرنيرىنە 21 ەلدەن 76 شاحماتشى تىركەلدى. ونىڭ ىشىندە: 25 گروسسمەيستەر (GM)، 2 ايەلدەر اراسىنداعى گروسسمەيستەر (WGM)، 26 حالىقارالىق شەبەر (IM)، 4 ايەلدەر اراسىنداعى حالىقارالىق شەبەر (WIM).

جارىس قوجايىندارى اتىنان ەڭ الدىمەن 20 جاسقا دەيىنگى الەم چەمپيونى-2024 جانە قازاقستان چەمپيونى-2025 GM قازىبەك نوگەربەك (2538)، GM الىشەر سۇلەيمەنوۆ (2515)، 15 جاستاعى حش ەدگار مامەدوۆ (2509)، ول فيدە تاراپىنان گروسسمەيستەر اتاعىن بەكىتۋدى كۇتىپ وتىر، گم مۇرتاز كاجعالەيەۆ (2500)، IM ارىستانبەك ورازايەۆ (2490)، IM الديار اڭسات (2489)، IM جاندوس اعمانوۆ (2481) جانە GM رامازان جالماحانوۆ (2463) ونەر كورسەتەدى.

نازىك جاندىلار اراسىندا – الەمدىك رەيتينگتە №30 ورىنداعى حالىقارالىق شەبەر جانە ايەلدەر اراسىنداعى گروسسمەيستەر ولگا بادەلكا (2424، اۆستريا) ەرەكشە اتالادى. موگيلوۆ قالاسىنىڭ تۋماسى 2021 جىلى بەلارۋستەن رەسەيگە اۋىسىپ، بيىلعى قاڭتاردان بەرى اۆستريانىڭ اتىنان ونەر كورسەتەدى.

فاۆوريتتەرگە قارسى مىقتى باسەكەلەس IM مەرۋەرت كاماليدەنوۆا (2330)، WIM افرۋزا حامداموۆا (2326، وزبەكستان) بار.

ەكىنشى ماڭىزدى Challengers تۋرنيرىنە  100 ويىنشى قاتىسادى. جەڭىسكە ءۇمىتتى باستى فاۆوريتتەر قاتارىندا تاجىريبەلى شاحماتشى ءارى جاتتىقتىرۋشى رەتىندە تانىمال IM كيريلل كۋدەرينوۆ (2350)، IM كونستانتين كازاكوۆ (2306)، IM باحتيار نۇعىمانوۆ (2305)، IM باحتيار اسقاروۆ (2297)،  سونداي-اق فيدە جاس شەبەرلەرى الان پەتۋحوۆ (2313)، ەرلان تلەۋحانوۆ (2296)، ەرنۇر امانگەلدى (2235)، الديار جاۋىنباي (2233) بار.

شاحماتقا اۋەسقوي قاۋىم دا ۇمىت قالعان جوق: Open تۋرنيرىنە ولاردان 151 ادام تىركەلدى. وسىلايشا، اقتوبە دەپ اتالاتىن قالاداعى شاحمات شايقاستارىنا بارلىعى 331 سپورتشى قاتىسادى.

بارلىق تۋرنيرلەر 9 تۋردان تۇراتىن شۆەيساريالىق جۇيە بويىنشا، 90+30 كلاسسيكالىق ۋاقىت باقىلاۋىمەن (ءار پارتياعا 90 مينۋت جانە ءار جۇرىسكە 30 سەكۋند قوسىلادى) وتكىزىلەدى.

Masters ءتۋرنيرىنىڭ كەپىلدەندىرىلگەن جۇلدە قورى – 78 000 اقش دوللارى، ونىڭ ىشىندە جەڭىمپاز – $18 000، 2ء-شى ورىن العان – $12 000، 3ء-شى ورىن العان – $10 000 الادى، 15ء-شى ورىنعا دەيىن – $1000. ەگەر ۇزدىك ايەل قاتىسۋشى 15ء-شى ورىننان تومەن ورنالاسسا، ول دا ءدال سونداي $1000 جۇلدەگە يە بولادى.

Challengers ءتۋرنيرىنىڭ كەپىلدەندىرىلگەن جۇلدە قورى – 15 000 اقش دوللارى (جەڭىمپاز – $4000 يەلەنەدى)، Open ءتۋرنيرى – 7000 اقش دوللارى (جەڭىمپاز – $2000 يەلەنەدى). مۇندا دا ايەلدەر اراسىنداعى ۇزدىك ناتيجە ءۇشىن جانە جەرگىلىكتى ويىنشىلار اراسىندا ۇزدىك بولعاندارعا ارنالعان جۇلدەلەر قاراستىرىلعان.

ماڭىزدى اتاپ وتەرلىگى، «ۆلاديمير دۆوركوۆيتى ەسكە الۋعا ارنالعان Aktobe Open 2025» – ەرلەر مەن ايەلدەر اراسىنداعى كلاسسيكالىق شاحماتتان قازاقستان كۋبوگىنىڭ 2025 جىلعى العاشقى كەزەڭى بولىپ تابىلادى. اقشالاي جانە باسقا دا جۇلدەلەردەن بولەك، العاشقى 20 ورىن يەگەرلەرى كۋبوك ەسەبىنە ۇپايلار الادى. قالعان ەكى كەزەڭ – «Oskemen Open 2025» (2025 ج. 21–29 شىلدە) جانە «Almaty Region Open 2025» (2025 ج. 4–12 تامىز). سايكەسىنشە، «Kazakhstan Chess Cup 2025 – Final» فينالىندا (2025 ج. 9–19 قاراشا) اينالمالى جۇيە بويىنشا 12 (ون ەكى) قاتىسۋشى ب ا ق سىنايدى: 6 (التى) ويىنشى – كەزەڭدەر ناتيجەسى بويىنشا ەڭ كوپ ۇپاي جيناعاندار جانە 6 (التى) ويىنشى – قشف پرەزيديۋمىنىڭ ترەنەرلىك كەڭەس ۇسىنعان شەشىمىمەن.

مەموريال اقتوبەدە 2019 جىلدان بەرى وتكىزىلىپ كەلەدى جانە حالىقارالىق اربيتر ۆلاديمير ياكوۆليەۆيچ دۆوركوۆيچتىڭ (30.12.1937–29.06.2005) رۋحىنا ارنالادى. تاگانروگ پەداگوگيكالىق ينستيتۋتىنىڭ فيزيكا-ماتەماتيكا فاكۋلتەتىن ءتامامداعان ۆلاديمير دۆوركوۆيچ 1960 جىلى جولدامامەن اقتوبەگە كەلگەن. مۇندا ۇزاق بولماعانىمەن، جاقسى ەستەلىك قالدىرىپ كەتكەن... كەيىنىرەك ول كسرو شاحمات فەدەراسياسىنىڭ جاۋاپتى حاتشىسى (1982–1984)، رف شاحمات فەدەراسياسى تورەشىلەر القاسىنىڭ ءتوراعاسى (1992–1995، 2003–2005)، «شاحماتشى انىقتامالىعى» جانە «ۆلاداس ميكەناس» كىتاپتارىنىڭ اۆتورى اتاندى. ونىڭ ۇلكەن ۇلى اركاديي دۆوركوۆيچ – 2018 جىلدىڭ قازان ايىنان بەرى فيدە پرەزيدەنتى.

اقتوبە  – اقتوبە وبلىسىنىڭ اكىمشىلىك ورتالىعى، حيميا، مەتاللۋرگيا، جەڭىل جانە تاماق ونەركاسىبى جوعارى دامىعان قالا. 150 جىلدان استام تاريحى بار بۇل قالا حالىق سانى بويىنشا قازاقستان قالالارى اراسىندا ءتورتىنشى ورىندا – 2025 جىلعى 1 قاڭتارداعى دەرەككە سايكەس، 584 769 تۇرعىن بار (ق ر  سججرا ۇسب دەرەكتەرى بويىنشا).