وزبەكستاننىڭ پرەمەر-مينيسترى شاۆكات ميرزيايەۆ 6 قىركۇيەكتە سامارقاندا رەسەي پرەزيدەنتى ۆلاديمير پۋتينمەن كەزدەسۋ كەزىندە وزبەكستاننىڭ رەسەيمەن قارىم-قاتىناسى دەگەنىمىز نە: «بولدى، بار جانە ستراتەگيالىق ارىپتەس بولا بەرەدى» دەدى.
وزبەكستانعا رەسەي پرەزيدەنتى 3 قىركۇيەكتە جەرلەنگەن يسلام كاريموۆتىڭ ءقابىرىنىڭ باسىنا تاعزىم ەتىپ، ەسكە الۋ ءۇشىن كەلدى.
وزبەك پرەمەرى ۆلاديمير ءپۋتيننىڭ ساپارى ەكى جاقتى قارىم-قاتىناستىڭ جوعارى دەڭگەيدە ەكەنىن بىلدىرەدى، ءارى بۇل وزبەك حالقى ءۇشىن ماڭىزدى دەدى. بۇعان جاۋاپ رەتىندە ۆلاديمير پۋتين وزبەكستاننىڭ تۇڭعىش پرەزيدەنتى قالاپ كەتكەن بەرىك بايلانىس تەك نىعايا تۇسەتىنىن ايتتى.
وزبەكستاننىڭ ۇكىمەت باسشىسى رەسەي ليدەرىن ساپارى ءۇشىن العىسىن ءبىلدىرىپ، رەسپۋبليكا ازا تۇتىپ جاتقان كەزدە، «ناعىز دوستىڭ قايعىعا ورتاقتاسۋى» دەپ باعالادى.
«اسىرەسە سوڭعى جىلدارى يسلام ابدۋعاني ۇلى ەكەۋمىزدىڭ ارامىزدا جىلى، سەنىمدى قارىم-قاتىناس قالىپتاستى. ول ەكى ەلدىڭ ىنتىماقتاستىعىنىڭ بەرىك نەگىزىن قالادى. يسلام كاريموۆتىڭ ءىسى جالعاسىن تابادى دەگەن سەنىمدەمىز. سەنىمدى دوس رەتىندە بىزگە تولىق ارقا سۇيەۋلەرىڭىزگە بولادى»، - دەدى پۋتين.
