ۇكىمەت اۋىل شارۋاشىلىعى تەحنيكاسى پاركىن جاڭارتۋ ماقساتىندا (اۋىل شارۋاشىلىعى مينيسترلىگى ارقىلى) مەملەكەتتىك قولداۋدىڭ كەشەندى شارالارىن بەلسەندى تۇردە جۇزەگە اسىرۋدا، دەپ حابارلايدى Dalanews.kz.
ەڭ ماڭىزدى ىنتالاندىرۋ – بۇل ينۆەستيسيالىق سۋبسيديالاۋ باعدارلاماسى، ونىڭ اياسىندا شارۋالارعا ساتىپ الىنعان تەحنيكا قۇنىنىڭ 15%-دان 30%-عا دەيىنگى بولىگى وتەلەدى (تەحنيكانىڭ باسىمدىق دەڭگەيىنە قاراي). قوسىمشا قولداۋ رەتىندە – سىياقى مولشەرلەمەسىن سۋبسيديالاۋ جۇزەگە اسىرىلادى: باسىم تەحنيكا بويىنشا 6%-عا دەيىن، ال قالعان تۇرلەرى بويىنشا 15%-عا دەيىن. سونىمەن قاتار تەحنيكاعا جەڭىلدەتىلگەن ليزينگ باعدارلاماسى دا قارقىندى دامىپ كەلەدى، ول شارۋالارعا جىلدىق 5% مولشەرلەمەمەن تەحنيكا الۋعا مۇمكىندىك بەرەدى.
2025 جىلعى 1 قاڭتارداعى جاعداي بويىنشا، رەسپۋبليكامىزدا 139 مىڭ تراكتور، 31 مىڭ كومباين، 5،6 مىڭ ەگىس كەشەنى، 71 مىڭ تۇقىم سەپكىش جانە 141 مىڭ توپىراق وڭدەيتىن قۇرال بار. 2024 جىلى تەحنيكا پاركىن جاڭارتۋ دەڭگەيى 5،5%-دى قۇراپ، 2023 جىلعى كورسەتكىشتەن (4،5%) ايتارلىقتاي جوعارى بولدى. 2025 جىلعا ارنالعان مىندەت – جاڭارتۋ دەڭگەيىن 6،5%-عا دەيىن جەتكىزۋ. جالپى العاندا، اۋىل شارۋاشىلىعى تەحنيكاسى پاركىن تەحنولوگيالىق تۇرعىدان زاماناۋي دەڭگەيدە ۇستاۋ ءۇشىن جاڭارتۋ كورسەتكىشىن 8-10%-عا دەيىن جەتكىزۋ قاجەت.
مينيسترلىك 2028 جىلعا دەيىن تەحنيكا پاركىن جاڭارتۋ دەڭگەيىن 9%-عا جەتكىزۋدى جوسپارلاپ وتىر.
وسىعان بايلانىستى مەملەكەت باسشىسىنىڭ تاپسىرماسى بويىنشا اۋىل شارۋاشىلىعى تەحنيكاسىنىڭ جەڭىلدەتىلگەن ليزينگى باعدارلاماسىن قارجىلاندىرۋ كولەمىن 450 ملرد تەڭگەگە دەيىن ارتتىرۋ جوسپارلانعان.
بۇگىندە ماشينا-تراكتور پاركىن جاڭارتۋدى جەدەلدەتۋ بويىنشا قابىلدانىپ جاتقان مەملەكەتتىك قولداۋ شارالارى ءوز تيىمدىلىگىن كورسەتىپ وتىر. بۇل وڭ سەرپىندى ساندار دا راستايدى: ەگەر 2017 جىلى نەبارى 8،5 مىڭ بىرلىك تەحنيكا ساتىپ الىنعان بولسا، 2024 جىلدىڭ قورىتىندىسى بويىنشا ولاردىڭ سانى 22،1 مىڭ بىرلىككە جەتىپ، كورسەتكىش 2،5 ەسەگە ارتتى.
اسىرەسە، "جەڭىلدەتىلگەن ليزينگ" باعدارلاماسى اياسىنداعى ىلگەرىلەۋ ايقىن بايقالادى: 2025 جىلى اتالعان باعدارلاماعا كەمىندە 250 ملرد تەڭگە ءبولىنىپ، شامامەن 6 مىڭ بىرلىك تەحنيكا ساتىپ الىنادى. 24 اقپاننان باستاپ – وتىنىمدەر قابىلداۋ باستالعان كۇننەن بەرى "قازاگروقارجى" اق-عا 3555 ءوتىنىش كەلىپ ءتۇستى، ولاردىڭ جالپى سوماسى – 129،2 ملرد تەڭگە. ءقازىردىڭ وزىندە 2400 شارت جاسالىپ، جالپى قۇنى 85،7 ملرد تەڭگە بولاتىن 4580 بىرلىك تەحنيكا جەتكىزۋ جوسپارلانعان.
زاماناۋي ەگىس كەشەندەرى اعىمداعى ەگىس ناۋقانىنا دا بەلسەندى تارتىلعان – 5،6 مىڭ بىرلىك تەحنيكا ءداندى داقىلدار ەگىستىگىنىڭ 70%-عا دەيىنگى اۋماعىن قامتيدى. بۇل – John Deere، CLASS، RSM سەكىلدى جەتەكشى جاھاندىق برەندتەردىڭ تەحنيكاسى. ولار ءدال ەگىنشىلىكتىڭ زاماناۋي جۇيەلەرىمەن جابدىقتالعان: GPS، اۆتوپيلوتتار، تۇقىمدى، تىڭايتقىش پەن گەربيسيدتى ءدال سەبۋ جۇيەلەرى.
ەگىس جۇمىستارى ءۇشىن ماڭىزدى فاكتور – جانار-جاعارماي ماتەريالدارىمەن (ججم) ۇزدىكسىز قامتاماسىز ەتۋ. 2025 جىلى ەگىس جۇمىستارىنا 401 مىڭ توننا ديزەل وتىنى ءبولىندى. 2024 جىلى – 376،4 مىڭ توننا. اۋىل شارۋاشىلىعى وندىرۋشىلەرىنەن بارلىعى شامامەن 17 مىڭ ءوتىنىم كەلىپ ءتۇستى. باعانى رەتتەۋ شارالارىنىڭ ارقاسىندا ديزەل وتىنىنىڭ سوڭعى باعاسى ليترىنە 254 تەڭگەنى قۇرادى – بۇل نارىقتىق باعادان 15–20% تومەن (ازس-تە – 301-307 تەڭگە/ليتر).
