سەناتورلار ءابدالى نۇرالييەۆ پەن مۇراتباي جولداسبايەۆ جامبىل وبلىسىنا ساپارى بارىسىندا بايزاق اۋدانى اقشولاق اۋىلىنىڭ شارۋاشىلىقتارىن ارالادى. ەگىنگە قاجەتتى سۋ ماسەلەسىنە قاتىستى اڭگىمەگە مەركى مەن جامبىل اۋداندارىنىڭ اگرارلارى دا قوسىلدى. ولاردىڭ ايتۋىنشا، وڭىردەگى سۋمەن قامتاماسىز ەتۋ ماسەلەسى تەز ارادا شەشۋدى تالاپ ەتەدى. ەگەر ماسەلە سوزىلاتىن بولسا، ەگىس ءونىم بەرمەۋى مۇمكىن.

اۋداندىق اۋىل شارۋاشىلىعى ءبولىمى وكىلدەرى بيىل كورشى قىرعىزستان ەگىنگە قاجەتتى سۋدى از كولەمدە جىبەرىپ جاتقانىن ايتتى. اسىرەسە بۇل جاعداي ىستىققا بايلانىستى سۋ كوپ قاجەت بولعان شىلدە ايىندا قاتتى سەزىلگەن.

قازىرگى تاڭدا بايزاق اۋدانىنداعى ەگىس القاپتارى ءۇشىن سەكۋندىنا 35-40 تەكشە مەتر سۋ قاجەت، ءبىراق شارۋالار ونىڭ تەك جارتىسىنا جۋىعىن الىپ وتىر. وسىنىڭ سەبەبىنەن ولار سۋدى كەزەكپەن پايدالانۋعا ءماجبۇر. باسىم داقىلدار رەتىندە قانت قىزىلشاسى، جۇگەرى، كوكونىستەر مەن باۋ-باقشا ونىمدەرى بەلگىلەنگەن. ەگەر القاپقا سۋ جەتپەسە، داقىلدار ءونىم بەرمەيتىنى بەلگىلى.

سەناتورلار اتالعان ماسەلەنى قازاقستاننىڭ ەكولوگيا، گەولوگيا جانە تابيعي رەسۋرستار مينيسترلىگىمەن، جەرگىلىكتى اتقارۋشى ورگاندارمەن بىرلەسە شەشۋگە نيەتتى.

فەرمەرلەر دەپۋتاتتاردىڭ الدىندا وزگە دە ماسەلەلەردى كوتەردى. بىتىك ءونىم العاننىڭ وزىندە كاسىپورىندار قارجىلاي تابىس تاپپايتىن جاعدايلار دا كەزدەسەدى ەكەن. وتكەن كۇزدە جينالعان قىزىلشانى اگرارلار مەركى قانت زاۋىتىنا وتكىزگەن، ءبىراق اقشاسىن ءالى كۇنگە دەيىن الماعان.

سەنات دەپۋتاتى مۇراتباي جولداسبايەۆ بۇل ماسەلەنىڭ دەرەۋ شەشىلۋى ءۇشىن كومەك كورسەتەتىنىن جەتكىزدى.

«ەگەر تاراپتاردىڭ ءبىرى كەلىسىم شارتىن ورىنداماعان جاعدايدا ەكىنشى تاراپ سوتقا جۇگىنۋگە ءماجبۇر بولادى. مەن ءتيىستى شارالاردى قولعا الىپ، ماسەلەنىڭ تەز شەشىلۋى ءۇشىن اتسالىسامىن»، - دەدى سەناتور.

​​ق ر پارلامەنتى سەناتىنىڭ باسپا ءسوز قىزمەتى