Aýdandyq aýyl sharýashylyǵy bólimi ókilderi biyl kórshi Qyrǵyzstan eginge qajetti sýdy az kólemde jiberip jatqanyn aitty. Ásirese bul jaǵdai ystyqqa bailanysty sý kóp qajet bolǵan shilde aiynda qatty sezilgen.
Qazirgi tańda Baizaq aýdanyndaǵy egis alqaptary úshin sekýndyna 35-40 tekshe metr sý qajet, biraq sharýalar onyń tek jartysyna jýyǵyn alyp otyr. Osynyń sebebinen olar sýdy kezekpen paidalanýǵa májbúr. Basym daqyldar retinde qant qyzylshasy, júgeri, kókónister men baý-baqsha ónimderi belgilengen. Eger alqapqa sý jetpese, daqyldar ónim bermeitini belgili.
Senatorlar atalǵan máseleni Qazaqstannyń Ekologiia, geologiia jáne tabiǵi resýrstar ministrligimen, jergilikti atqarýshy organdarmen birlese sheshýge nietti.
Fermerler depýtattardyń aldynda ózge de máselelerdi kóterdi. Bitik ónim alǵannyń ózinde kásiporyndar qarjylai tabys tappaityn jaǵdailar da kezdesedi eken. Ótken kúzde jinalǵan qyzylshany agrarlar Merki qant zaýytyna ótkizgen, biraq aqshasyn áli kúnge deiin almaǵan.
Senat depýtaty Muratbai Joldasbaev bul máseleniń dereý sheshilýi úshin kómek kórsetetinin jetkizdi.
«Eger taraptardyń biri kelisim shartyn oryndamaǵan jaǵdaida ekinshi tarap sotqa júginýge májbúr bolady. Men tiisti sharalardy qolǵa alyp, máseleniń tez sheshilýi úshin atsalysamyn», - dedi senator.
QR Parlamenti Senatynyń Baspasóz qyzmeti
