Qazaqstan Prezidenti Kaspii mańy memleketterin teńizdiń tartylýyna qarsy kúresý, bioalýantúrlilikti saqtaý jáne ekologiialyq qaterlerdi boljaý úshin ǵylymi zertteýler men zamanaýi tehnologiialardy biriktirýge shaqyrdy, dep habarlaidy dalanews.kz.
– Soltústik Aral teńiziniń aýmaǵyn 36 paiyzǵa ulǵaitýǵa qol jetkizdik. Sonyń nátijesinde sý sapasy jaqsaryp, balyq qory qalpyna keldi, jaǵalaýdaǵy aýmaqtardyń ekonomikalyq ómiri birtindep jandana bastady. Ekologiialyq saiasatymyzdyń mańyzdy baǵyttarynyń biri – bioalýantúrlilikti saqtaý. Júieli sharalardyń nátijesinde kiikterdiń sany qalpyna keltirildi. Qar barysynyń popýliatsiiasy saqtalyp, sirek kezdesetin janýarlar tabiǵi ortaǵa qaita jiberilip jatyr. Bul oń tájiribeni Kaspii teńiziniń biregei ekojúiesin saqtaý úshin de qoldanýǵa bolady dep sanaimyz. Biz Turan jolbarysyn qaita qalpyna keltirýge arnalǵan arnaiy baǵdarlamany júzege asyryp jatyrmyz. Osy oraida biregei janýar – Amýr jolbarysynyń birneshe darasyn jibergeni úshin Resei Federatsiiasynyń Úkimetine jáne jeke ózine, Resei Prezidenti Vladimir Vladimirovich Pýtinge alǵysymdy bildirgim keledi. Qazir olar bizdiń tabiǵi jaǵdaiymyzǵa sátti beiimdelip jatyr, – dep atap ótti Qasym-Jomart Toqaev.
Prezident Kaspii teńiziniń ekojúiesin tiimdi basqarý úshin zamanaýi tehnologiialardy qoldanýdyń mańyzyn atap ótti. Memleket basshysy sý resýrstarynyń jai-kúii, jaǵalaý syzyǵynyń ózgerýi, bioalýantúrlilik, lastaný, ózen aǵyny jáne basqa da negizgi kórsetkishter týraly derekterdi óńdep, taldaýǵa arnalǵan ortaq tsifrlyq platforma qurý múmkindigin qarastyrýdy usyndy.
– Spýtniktik tehnologiialar, jasandy intellekt jáne zamanaýi boljaý júieleri naqty ýaqyt rejiminde monitoring júrgizýge, ekologiialyq qaterlerdi der kezinde anyqtap, olardyń aldyn alýǵa múmkindik beredi. Mundai platforma ǵalymdarymyzdyń, tiisti memlekettik organdar men halyqaralyq uiymdardyń jumysyna ortaq tsifrlyq negiz bola alar edi, – dep sanaidy Qasym-Jomart Toqaev.
