ونەركاسىپ جانە قۇرىلىس ءمينيسترى قانات شارلاپايەۆ ەلدە ەسكى كولىكتەر كوبەيسە، قازاقستاندىقتارعا جولداردا ءجۇرۋ اسا ءقاۋىپتى بولاتىنىن ايتادى، - دەپ حابارلايدى Dalanews.kz Qaz365.kz-كە سىلتەپ.

كۇزدە رەسەيدە كادەگە جاراتۋ الىمىنىڭ مولشەرلەمەسىن 70-85% ارتتىرۋ جوسپارلانىپ وتىر. بۇل قازاقستانعا قالاي اسەر ەتۋى مۇمكىن؟ بۇل سۇراققا بۇگىن ونەركاسىپ جانە قۇرىلىس ءمينيسترى قانات شارلاپايەۆ جاۋاپ بەردى. شەنەۋنىك بۇل ەلدەگى اۆتوموبيل باعاسىنىڭ وسۋىنە اسەر ەتپەيدى دەپ بولجايدى. 

“باعا ايىرماشىلىعىنا بايلانىستى، وكىنىشكە قاراي، ەكولوگياعا زيان كەلتىرەتىن جانە جولداردا وتە ءقاۋىپتى جاعداي تۋعىزاتىن ەسكى كولىكتەردىڭ ۇلكەن اعىنى قايتادان پايدا بولۋى مۇمكىن. مىنە، وسىنداي تاۋەكەل بار، بۇل وتە ناقتى تاۋەكەل. باسقا ەلدەر زاڭمەن يمپورتتان قورعانادى، ونى اۆتوحلام دەپ اتايىق. ال ءبىز قورعانۋدىڭ قاجەتى جوق دەپ سانايمىز. مىنە، وسى وسىمگە بايلانىستى تاۋەكەل بار (رەسەيدەگى ۋتيلسبور ستاۆكالارى-اۆتور.) اۆتوحلام قازاقستانعا اعىلادى جانە ءبىزدىڭ ازاماتتارىمىزعا جولداردا ءجۇرۋ الدەقايدا ءقاۋىپتى بولادى”، – دەدى قانات شارلاپايەۆ ۇكىمەت كۋلۋارىندا. 

بۇل رەتتە، مينيسترلىك باسشىسى كورشى ەلدەردىڭ كادەگە جاراتۋ ماسەلەسى بويىنشا ۇستانىمىنا نازار اۋداردى. 

“ولار ونى جويىپ قانا قويمايدى، ونى كوتەرەدى. بۇل جەردە قازاقستان كولەمى جاعىنان دا، كادەگە جاراتۋ الىمىن باستاپقى تىركەۋ جاعىنان دا كورشىلەردەن ەداۋىر ارتتا قالعانىن ءتۇسىنۋ كەرەك”، – دەپ تۇيىندەدى شارلاپايەۆ.