باسقوسۋعا وبلىستىق باسقارما باسشىلارى، تۋريستىك اگەنتتىك پەن تاريحي، مادەني ورتالىق جەتەكشىلەرى جانە قولونەر شەبەرلەرى قاتىسىپ، اتالعان سالانى دامىتۋ جايىندا ۇسىنىس پىكىرلەرىن ءبىلدىردى. جيىنعا ءتوراعالىق ەتكەن ايماق باسشىسى وڭىرىمىزدەگى تۋريزم سالاسىن تۇلەتۋدەگى نەگىزگى العى شارتتارىن اتاپ ءوتتى.
– ءبىزدىڭ وبلىسىمىزدا تۋريستەر قىزىعاتىن تاريحي جانە مادەني نىساندار وتە كوپ. تاماشا تابيعاتىنىڭ ءوزى ءبىر توبە. سولاي بولا تۇرا، نەگە بىزگە تۇركياداعىداي تۋريستەر اعىلمايدى. سەبەبى، قوناقتارعا كورسەتىلەتىن قىزمەت ءتيىستى دەڭگەيدە جاسالماعان. مىنە، وسى كەمشىلىكتەردى جويۋىمىز كەرەك. ياعني، اۋەجايدان باستاپ قوناق ءۇي، سەرۆيس، ءدامحانا، گيدتەرگە دەيىن جوعارى دارەجەدە قىزمەت كورسەتەتىن بولسا، كەلۋشىلەردىڭ قاتارى ارتا تۇسەدى. سول ءۇشىن شەتەلدىك ارىپتەستەرمەن جان-جاقتى تاجىريبە الماسا وتىرىپ، قوناق كۇتۋدىڭ وزىق ۇلگىلەرىن ۇيرەنۋىمىز كەرەك، – دەدى وبلىس اكىمى.
سونداي-اق، ءوڭىر باسشىسى تۋريستىك يندۋستريانى دامىتۋ ماقساتىندا ارنايى باعدارلاما قۇرىلاتىنىن ايتتى. وسىنىڭ نەگىزىندە تۋريستىك نىساندارداعى ينفراقۇرىلىم ماسەلەسى شەشىلىپ، سەرۆيستىك قىزمەتتى جاقسارتۋعا باعىتتالعان جۇمىستار اتقارىلماق.
ودان بولەك، وبلىس باسشىسى شاردارا اۋدانىندا حالىقارالىق تۋريستىك فەستيۆال وتكىزۋدى تاپسىردى. شەتەلدىك تۋريستىك اگەنتتەردىڭ قاتىسۋىمەن وتەتىن شارانىڭ ماقساتى – شاعالالى شارداراداعى دەمالىس ايماقتارىن الەمدىك دەڭگەيدە ناسيحاتتاۋ.
ءوز كەزەگىندە تۋريستىك اگەنتتىكتەر قاۋىمداستىعىنىڭ ءتورايىمى گۇلميرا اقبەردييەۆا سەرۆيستىك قىزمەت كورسەتۋگە ۇيرەتەتىن ورتالىق اشۋدى ۇسىندى.
جيىن بارىسىندا وبلىس ورتالىعى تۇركىستان قالاسىنىڭ دامۋ جوسپارى دا كەڭىنەن تالقىلاندى. ايماق باسشىسى ق.ا.ياساۋي كەسەنەسىنىڭ ماڭىنا ەسكى شىعىستىق ۇلگىدەگى عيماراتتاردىڭ بوي كوتەرەتىنىن ايتتى.
تۇركىستان وبلىسى اكىمىنىڭ باسپا ءسوز قىزمەتى
