استاناداعى ينتەللەكتۋالدى بەينەباقىلاۋ جۇيەسى “Sergek” جاڭا وپەراتورعا اۋىسادى. جۇيەنى ازىرلەۋشى كومپانيا مەن قالا اكىمدىگى اراسىنداعى مەملەكەتتىك-جەكەمەنشىك ارىپتەستىك (ءمجا) كەلىسىمشارتىنىڭ مەرزىمى اياقتالدى. بۇل كەلىسىم قايتا جاسالمايدى، دەپ حابارلايدى Dalanews.kz Bes.media-عا سىلتەپ.
ءماسليحات دەپۋتاتتارى جاڭا وپەراتور رەتىندە بىرىككەن اراب امىرلىكتەرىنىڭ (ءباا) Presignt كومپانياسىن بەكىتتى. ول الداعى بەس جىلدا قالاداعى بەينەباقىلاۋ جۇيەسىن باسقاراتىن بولادى.
Presignt كومپانياسى 2025-2030 جىلدار ارالىعىندا استاناداعى جاڭا “Smart City” جوباسىن ىسكە اسىرۋعا كىرىسەدى. جوبا قۇنى 53 ميلليارد تەڭگە، بۇل قارجى تولىقتاي جەكە ينۆەستور ەسەبىنەن جۇمسالادى. جوبادا قازاقستاندىق كومپانيالاردىڭ ۇلەسى 60% بولماق.
جاڭا وپەراتور ءوز قاراجاتى ەسەبىنەن بەينەباقىلاۋ ينفراقۇرىلىمىن جاڭعىرتىپ، قاۋىپسىزدىكتى كۇشەيتۋگە مىندەتتەلەدى. كومپانيا كەلىسىمشارت بويىنشا تولەمدەردى تەك جوبانى تولىق ىسكە قوسقاننان كەيىن عانا الادى.
Presignt مىندەتتەمەلەرى:
- 10 000 جاڭا بەينەباقىلاۋ كامەراسىن ورناتۋ؛
- 502 زاماناۋي اپپاراتتىق-باعدارلامالىق كەشەندەردى جولدارعا ورناتۋ؛
- 8 000 كامەرانى تەرروريزمگە وسال نىساندارعا (جەكەمەنشىك مەكتەپتەر مەن بالاباقشالار، ۆوكزالدار، اۋەجاي، LRT) ينتەگراسيالاۋ؛
- بارلىق جۇيەنى تۇراقتى ەلەكتر قۋاتىمەن قامتاماسىز ەتۋ؛
- تالشىقتى-وپتيكالىق بايلانىس ارنالارى ارقىلى قوسىلۋدى ۇيىمداستىرۋ؛
- دەرەكتەردى وڭدەۋ ورتالىعىن قۇرۋ؛
- قالالىق كوممۋنالدىق قىزمەتتەرگە ارنالعان ءبىرىڭعاي سيتۋاسيالىق ورتالىقتى ۇيىمداستىرۋ.
جاڭا جوبانىڭ باستى ماقساتى – 100% قوعامدىق ورىنداردى بەينەباقىلاۋمەن قامتۋ جانە جول-كولىك قاۋىپسىزدىگىن ارتتىرۋ. جاساندى ينتەللەكت قالاداعى كولىك قوزعالىسىن ءتيىمدى رەتتەۋگە كومەكتەسەدى، ال ۇلكەن دەرەكتەردى تالداۋ ۋربانيستيكالىق پروسەستەردى وڭتايلاندىرادى.
جۇيەنىڭ قاۋىپسىزدىگىنە ەرەكشە كوڭىل بولىنبەك. بەينەباقىلاۋ دەرەكتەرىنە قولجەتىمدىلىك ۇقك جانە مەملەكەتتىك كۇزەت قىزمەتىنىڭ باقىلاۋىندا بولادى.
