جۇمىسشى ماماندىقتار جىلى اياسىندا سەنات جانىنداعى سەناتورلار كەڭەسىنىڭ 11 مۇشەسى شىعىس قازاقستان وبلىسىنداعى تەحنيكالىق جانە كاسىپتىك ءبىلىم بەرۋ (تجكب) ۇيىمدارىن ارالايدى، - دەپ حابارلايدى Dalanews.kz
شقو اكىمدىگىندە سەناتورلار كەڭەسىنىڭ مۇشەلەرى شىعىس قازاقستان وبلىسىنىڭ اكىمى نۇرىمبەت ساقتاعانوۆپەن كەزدەستى.
"ساپارلارىڭىزدىڭ نەگىزگى تاقىرىبى – ءوڭىردىڭ ەڭبەك نارىعىن بىلىكتى كادرلارمەن قامتاماسىز ەتۋ. بۇل – كۇن تارتىبىندەگى باستى مىندەتتەردىڭ ءبىرى. بۇگىنگى كۇنى بۇل ءبىز ءۇشىن جاي عانا ستاتيستيكا نەمەسە جوسپار ەمەس، بۇل – ءوڭىر دامۋىنىڭ كەپىلى.
قازاقستان رەسپۋبليكاسىنىڭ پرەزيدەنتى قاسىم-جومارت كەمەل ۇلى توقايەۆتىڭ باستاماسىمەن 2025 جىل – جۇمىسشى ماماندىقتار جىلى بولىپ جاريالاندى. بۇل – جاي عانا سيمۆوليكالىق قادام ەمەس. بۇل – ەڭبەك ادامىنا دەگەن ينستيتۋسيونالدىق قۇرمەتتىڭ كورىنىسى. شىعىس قازاقستاندا ءبىز بۇل باعىتتاعى جۇمىستى ناقتى كورسەتكىشتەر مەن كاسىپورىنداردىڭ قاجەتتىلىكتەرىنە سۇيەنە وتىرىپ جۇرگىزىپ كەلەمىز.
بۇگىندە وبلىس ەكونوميكاسىنىڭ نەگىزىن ماشينا جاساۋ، مەتاللۋرگيا، اۋىل شارۋاشىلىعى جانە قۇرىلىس سالالارى قۇرايدى. وسى سالالاردى كادرلارمەن قامتاماسىز ەتۋ – باستى ماقساتىمىز"، – دەدى شقو اكىمى نۇرىمبەت ساقتاعانوۆ.
وبلىستىڭ 38 كوللەدجىندە 20 مىڭنان استام ستۋدەنت 101 سۇرانىسقا يە ماماندىق بويىنشا ءبىلىم الۋدا، ولاردىڭ تورتتەن ءبىرى جۇمىسشى ماماندىقتارى بويىنشا وقيدى. كوللەدج ستۋدەنتتەرىنىڭ 23%-ى جۇمىسشى ماماندىقتارىن مەڭگەرۋدە. وڭىردە دۋالدى وقىتۋ جۇيەسى جۇيەلى تۇردە ەنگىزىلۋدە – 27 كوللەدجدە جانە 448 كاسىپورىندا 5 مىڭ ستۋدەنت ءبىلىمىن تىكەلەي وندىرىستە الۋدا.
"وڭىردەگى كادر ماسەلەسىن جۇيەلى تۇردە شەشۋ ءۇشىن 2024 جىلدان باستاپ العاش رەت «شىعىس مامانى» جەڭىلدەتىلگەن يپوتەكالىق باعدارلاماسىن ىسكە قوستىق. باعدارلاما ەڭ الدىمەن جىلۋ ەنەرگەتيكاسى سالاسىنداعى ماماندارعا ارنالعان. بۇل – ءبىر جاعىنان ەڭبەككە ىنتالاندىرۋ بولسا، ەكىنشى جاعىنان وڭىرگە كادر تارتۋدىڭ ءتيىمدى قۇرالى. باعدارلامانىڭ ناتيجەسى وڭ بولعان جاعدايدا، ونى كەڭەيتۋ جوسپارلانۋدا"، – دەدى نۇرىمبەت ساقتاعانوۆ.
باعدارلاما اياسىندا سەناتورلار كەڭەسىنىڭ مۇشەلەرى وبلىستىڭ دەپۋتاتتار كورپۋسىمەن كەزدەسىپ، د. سەرىكبايەۆ اتىنداعى شقتۋ-دىڭ لۋ بان شەبەرحاناسىندا بولدى.
قازىرگى ۋاقىتتا مۇندا «كولىك، كولىك تەحنيكاسى جانە تەحنولوگيالارى»، «تاسىمالداۋدى ۇيىمداستىرۋ، قوزعالىس جانە كولىكتى پايدالانۋ» ءبىلىم بەرۋ باعدارلامالارى بويىنشا 400-گە جۋىق ستۋدەنت پەن ماگيسترانت ءبىلىم الۋدا، ولاردىڭ قاتارىندا شەتەلدىك ستۋدەنتتەر دە بار.
وتكەن جىلى «كولىك ماشينا جاساۋىنداعى سمارت-تەحنولوگيالار مەن جاساندى ينتەللەكت» اتتى جاڭا يننوۆاسيالىق ءبىلىم بەرۋ باعدارلاماسى اشىلدى.
لۋ بان شەبەرحاناسى ينجەنەرلىك تاجىريبە يننوۆاسيالىق جوباسىنىڭ (EPIP – Engineering Practice Innovation Project) ستاندارتتارىنا سايكەس ينجەنەرلەردى دايارلاۋ بويىنشا سەرتيفيكاتتالعان ورتالىق بولىپ تابىلادى.
مۇندا EPIP ادىسىمەن ينجەنەرلىك پراكتيكالىق جوبالاردى وقىتۋعا ارنالعان كابينەت جانە جاڭا تەحنولوگيالاردى ازىرلەۋ بويىنشا ستارتاپ-يدەيالاردى ىلگەرىلەتۋ، جاڭا ەلەكتروموبيل ۇلگىلەرىن پيلوتتىق تەستىلەۋ ماقساتىندا ستۋدەنتتىك ءعىلىمي-بىلىم بەرۋ ۇيىرمەسى قۇرىلعان.
ۋنيۆەرسيتەتتە «كولىك، كولىك تەحنيكاسى جانە تەحنولوگيالارى»، «تاسىمالداۋدى ۇيىمداستىرۋ، قوزعالىس جانە كولىكتى پايدالانۋ» ءبىلىم بەرۋ باعدارلامالارى بويىنشا دۋالدى وقىتۋ جۇزەگە اسىرىلۋدا. وقۋ بازاسى – قوستاناي وبلىسىنداعى ءىرى اۆتوكولىك ءوندىرۋشى – «Allur» زاۋىتى.
قازىرگى ۋاقىتتا «SMART Driving Technology» جاڭا نىسانىنىڭ قۇرىلىسى جۇرگىزىلۋدە. سونىمەن قاتار، كەلىسىم اياسىندا جۇڭگو سەرىكتەستەرى تاراپىنان جالپى قۇنى شامامەن 3 ملن يۋان بولاتىن 6 ەلەكتروموبيل، ونىڭ ىشىندە 2 جۇرگىزۋشىسىز كولىك بەرىلمەك.
ورتالىقتىڭ ماقساتى – اۆتوموبيل جۇيەلەرىن جەتىلدىرۋ ءۇشىن وزىق تەحنولوگيالاردى ازىرلەۋ جانە ەنگىزۋ. مۇندا عىلىمي زەرتتەۋلەر جۇرگىزۋ، ينتەللەكتۋالدى جۇيە تەحنولوگيالارىن وقىتۋ، تەحنيكالىق مامانداردىڭ بىلىكتىلىگىن ارتتىرۋ كۋرستارىن ۇيىمداستىرۋ، سونداي-اق قازاقستان مەن ورتالىق ازيادا ينتەللەكتۋالدى جۇيە تەحنولوگيالارىن ەنگىزۋ جانە ىلگەرىلەتۋ جوسپارلانۋدا.
جۇمىس ساپارى اياسىندا سەناتورلار كەڭەسىنىڭ مۇشەلەرى سونداي-اق وسكەمەن جوعارعى پوليتەحنيكالىق كوللەدجىن، «ءۇلبى مەتاللۋرگيالىق زاۋىتى» اق مەن «ۆوستوك-مولوكو» ءجشس-ىن ارالايدى.
