مەديسينالىق كومەكتى ۇيىمداستىرۋ دەپارتامەنتىنىڭ ديرەكتورى گۇلنار سارسەنبايەۆا ناۋقاستىڭ جاعدايى جاقسارىپ، ەسىن جيعانىن جەتكىزدى، دەپ حابارلايدى Dalanews.kz.

“ناۋقاستىڭ احۋالى بىرتە-بىرتە وڭالىپ كەلەدى. تولىق قالپىنا كەلۋ مەرزىمى اعزاسىنىڭ ەرەكشەلىگىنە بايلانىستى بولادى. ءبىز ونىڭ جاعدايىن ۇنەمى قاداعالاپ وتىرامىز،” – دەدى سارسەنبايەۆا.

ايتا كەتەيىك، بۇعان دەيىن سەمەيدە جاڭا جىلدىق شىرشانى بەزەندىرۋ كەزىندە ءمۇعالىم بيىكتەن قۇلاپ، اۋىر جاراقات العان ەدى.

وقۋ-اعارتۋ ءمينيسترى عاني بەيسەمبايەۆ Facebook-تەگى پاراقشاسىندا اتالعان وقيعاعا بايلانىستى وبلىس باسشىلىعى ءادىل ءارى جان-جاقتى تەكسەرۋ جۇرگىزۋ كەرەك ەكەنىن ايتقان بولاتىن.

"سەمەي قالاسىندا مۇعالىمدەردى جاڭاجىلدىق شىرشانى بەزەندىرۋگە تارتۋ جانە ارىپتەسىمىزدىڭ وسى ءىس بارىسىندا جاراقات الۋى — زاڭ بۇزۋشىلىقتىڭ ايقىن كورىنىسى. پەداگوگتەردى كاسىبي مىندەتتەرىنە جاتپايتىن مۇنداي جۇمىستارعا تارتۋ — «پەداگوگ مارتەبەسى تۋرالى» زاڭدى ورەسكەل بۇزۋ دەپ سانايمىن. بۇل وقيعاعا بايلانىستى وبلىس باسشىلىعى ءادىل ءارى جان-جاقتى تەكسەرۋ جۇرگىزىپ، الداعى ۋاقىتتا مۇنداي كەلەڭسىزدىكتەردىڭ قايتالانۋىنا جول بەرمەۋ ءۇشىن ءتيىستى شارالار قابىلدايدى دەپ ۇمىتتەنەمىن"، — دەپ جازدى ول.

بۇل وقيعاعا ءماجىلىس دەپۋتاتى اسحات ايماعامبەتوۆ تە پىكىر بىلدىرگەن ەدى.

“پەداگوگ مارتەبەسى تۋرالى” زاڭنىڭ 6-بابىندا مۇعالىمدەردى كاسىبي مىندەتتەرىنە جاتپايتىن جۇمىستارعا تارتۋعا قاتاڭ تىيىم سالىنعان. جاڭا جىلدىق شىرشا ورناتۋ، كوشە تازالاۋ، باسقا دا ناۋقاندارعا ماجبۇرلەپ قاتىستىرۋ سياقتى ەسكى “داستۇرلەردەن” ءبىرجولا باس تارتۋىمىز كەرەك. بۇل – زاڭدى ورەسكەل بۇزۋ”، – دەدى دەپۋتات.

اسحات ايماعامبەتوۆ وسى جاعدايعا بايلانىستى ناقتى شارالار قابىلداۋ قاجەت ەكەنىن العا تارتتى:

1. وبلىس باسشىلىعى بۇل وقيعانى مۇقيات تەرگەپ، جاۋاپتى تۇلعالاردى جازالاۋى ءتيىس.

2. مۇعالىمدەردى كاسىبي مىندەتىنە جاتپايتىن جۇمىستارعا تارتۋدى توقتاتۋ ءۇشىن مينيسترلىك باقىلاۋدى كۇشەيتۋى قاجەت.

3. ءبىلىم باسقارمالارى مەن مەكتەپ اكىمشىلىكتەرى پەداگوگتاردىڭ قۇقىقتارىن قاتاڭ ساقتاۋ بويىنشا ءوز مىندەتتەرىن ورىنداۋى ءتيىس.

“مەملەكەت باسشىسى ءاردايىم مۇعالىمدەردىڭ مارتەبەسىن قورعاۋ مەن ولاردىڭ قۇقىقتارىن ساقتاۋ ماسەلەسىن ەرەكشە نازاردا ۇستاپ كەلەدى. ءبىزدىڭ مىندەتىمىز – سول تالاپتاردى ورىنداپ، زاڭنىڭ جۇمىس ىستەۋىن قامتاماسىز ەتۋ”، – دەدى ايماعامبەتوۆ.