ۆيكتور يۆانوۆيچ كوزودوي – ءنوۆوسىبىر وبلىسىنىڭ تۋماسى، تاريح عىلىمدارىنىڭ دوكتورى، پروفەسسور. 2012-2014 جىلدارى ءنوۆوسىبىر وبلىسى گۋبەرناتورىنىڭ ورىنباسارى، 2018-2019 جىلدارى – رەسەي عىلىم اكادەمياسىنىڭ ءسىبىر بولىمشەسى تاريح ينستيتۋتىنىڭ ديرەكتورى قىزمەتتەرىن اتقارعان.
عىلىمي-زەرتتەۋ سالاسى حح عاسىردىڭ باسىنداعى رەسەيدەگى ريەۆوليۋسيالار تاريحىن، ءسىبىردىڭ قوعامدىق-ساياسي كەڭىستىگىن جانە تاريحي تۇلعالار ءومىرىن قامتيدى.
الاش قوزعالىسىنىڭ جەتەكشىسى، كورنەكتى مەملەكەت جانە قوعام قايراتكەرى ءاليحان نۇرمۇحامەد ۇلى بوكەيحاننىڭ عۇمىرناماسى مەن تاريحي تۇلعاسىن زەردەلەۋگە ارنالعان زەرتتەۋ ەڭبەگىنىڭ تۇساۋكەسەر ءراسىمىن تاريحشى-عالىم – حح عاسىردىڭ باس كەزىندە الاش قوزعالىسىنىڭ ورتالىعى بولعان سەمەي قالاسىندا، ونىڭ ىشىندە ءاليحان بوكەيحان ەسىمىن يەلەنگەن ۋنيۆەرسيتەت قابىرعاسىندا وتكىزۋدى ۇيعارعان.
كىتاپتىڭ تۇساۋكەسەر راسىمىنە زيالى قاۋىم وكىلدەرى، عالىمدار، جوعارى وقۋ ورىنداردىڭ وقىتۋشىلارى مەن ءبىلىم الۋشىلارى (ستۋدەنتتەر، ماگيسترانتتار مەن دوكتورانتتار)، اكىمشىلىك وكىلدەرى، ساياسي پارتيالار مەن قوعامدىق ۇيىمداردىڭ وكىلدەرى، مۋزەيلەر مەن كىتاپحانالاردىڭ باسشىلارى، ارحيۆ قىزمەتكەرلەرى مەن ب ا ق وكىلدەرى قاتىستى. سونداي-اق تۇساۋكەسەر ءراسىمىن الەۋمەتتىك جەلىلەر مەن ZOOM ۆيدەو بايلانىس جۇيەسى ارقىلى قازاقستان مەن رەسەيدەن مىڭداعان كورەرمەندەر تاماشالادى.
ەكى جارىم جىلدان استام عىلىمي ىزدەنىستەرىنىڭ ناتيجەسىندە جارىق كورگەن ەڭبەگىندە عالىم ءاليحان بوكەيحانعا – قازاقستان تاريحىنداعى تۇتاس ءداۋىردىڭ – اۋماقتىق، ساياسي، قوعامدىق بىتىراڭقىلىق مەرزىمىنەن باستاپ، ەل تاۋەلسىزدىگىن العانعا دەيىنگى كەزەڭنىڭ ءون بويىنا ىقپال ەتكەن تۇلعا دەگەن رەتىندە باعا بەرەدى. قازاق مەملەكەتتىلىگىنىڭ قالىپتاسۋىندا ايرىقشا ءرول اتقارعان قايراتكەردى اۆتور "ءداۋىر ادامى" دەپ اتايدى.
كىتاپقا دەرەككوزدەر، ماتەريالدار مەن فاكتىلەر، ونىڭ ىشىندە عىلىمي اينالىمدا بۇرىن پايدالانىلماعان دەرەكتەر: مۇراعاتتىق قۇجاتتار، مەمۋارلار، ساياسي جانە مەملەكەتتىك، پارتيا جانە اسكەري قايراتكەرلەردىڭ ەستەلىكتەرى، سول جىلدارداعى گازەتتەر مەن جۋرنالدارداعى جاريالانىمدار ەنگىزىلگەن. كىتاپ تاريحشىلارعا، قوعامتانۋشىلار مەن ساياساتتانۋشىلارعا، ستۋدەنتتەرگە، سونداي-اق كوپشىلىك وقىرمان قاۋىمعا ارنالىپ جازىلعان.
كىتاپتىڭ تۇساۋكەسەر ءراسىمى بارىسىندا عالىمعا سالتاناتتى تۇردە ءاليحان بوكەيحان ۋنيۆەرسيتەتىنىڭ قۇرمەتتى پروفەسسورى اتاعى بەرىلدى.
الداعى ۋاقىتتا كىتاپ تانىستىرىلىمى شوقان ءۋاليحانوۆ اتىنداعى تاريح جانە ەتنولوگيا ينستيتۋتىنىڭ ۇيىمداستىرۋىمەن نۇر-سۇلتان، الماتى، پاۆلودار جانە قاراعاندى قالالارىندا وتەدى. كىتاپتى قازاق تىلىنە اۋدارۋ جۇمىستارى دا قولعا الىندى.
