سەمەي قالاسى ءقازىر الەۋمەتتىك ماڭىزى بار ازىق-تۇلىك ونىمدەرىمەن 107،3% قامتاماسىز ەتىلگەن. دەگەنمەن قالادا الەۋمەتتىك ماڭىزى بار ازىق-تۇلىك ونىمدەرىنىڭ كەيبىرى قىمباتتاعانى بايقالادى.
مىسالى، ءبىرىنشى سۇرىپتى ۇننىڭ باعاسى 4%، قاراقۇمىق جارماسى 5،7%، تاۋىق ەتى 3%، پاستەرلەنگەن ءسۇت 2،3% قىمباتتاعان. سونداي-اق، سارى ماي مەن سۇزبەنىڭ دە باعاسى وسكەن. ەسەسىنە ءسابىزدىڭ باعاسى 5،3%، پياز 5،7%، قانت 1% ارزاندادى. بۇل مەملەكەتتىك ورگاندار ۇسىنعان رەسمي اقپارات ەكەنىن اتاپ وتكەن ءجون.
دانيار شاكارىموۆتىڭ ايتۋىنشا، نان باعاسى تۇراقتى ساقتالادى.
- ءبىز كۇندەلىكتى باعاعا مونيتورينگ جۇرگىزەمىز. ساۋدا ورىندارىندا ناننىڭ باعاسى 65-تەن 85 تەڭگەگە دەيىن ساتىلادى. قالادا جۇمىس ىستەيتىن شاعىن ناۋبايحانادا ناننىڭ ورتاشا كوتەرمە باعاسى – 70 تەڭگە. دۇكەندەردە بۇل نان بەس تەڭگەگە بولشەك ۇستەمەمەن ساتىلادى.
«سەمنان» كومپانياسى ءوز نانىن 85 تەڭگەدەن ساتادى. الەۋمەتتىك ناننىڭ ەڭ قىمباتى 85 تەڭگەدەن اسپايدى، - دەدى ءبولىم باسشىسىنىڭ مىندەتىن اتقارۋشى.
