سەمەيدە دەسترۋكتيۆتى ءدىني اعىمدى ۇستانعان وتباسى 8 بەن 13 جاس ارالىعىنداعى ءۇش بالاسىن مەكتەپكە جىبەرمەي قويعان، دەپ حابارلايدى Dalanews.kz.
اتا-اناسىنىڭ ۇستانىمىنا بايلانىستى بالالار ءبىلىم الۋ مۇمكىندىگىنەن ايىرىلعان. پروكۋراتۋرانىڭ ارالاسۋىنان كەيىن بالالار مەكتەپكە قابىلداندى، ال ولاردىڭ اناسى اكىمشىلىك جاۋاپكەرشىلىككە تارتىلدى.
ەسكە سالايىق، بۇعان دەيىن قاراعاندى وبلىسىندا دەسترۋكتيۆتى ءدىني اعىمىن ۇستاناتىن وتباسى 15 جاستاعى قىزدارىن كۇيەۋگە بەرىپ جىبەرگەنى بەلگىلى بولعان ەدى. قىلمىس جاسادى دەگەن كۇدىكپەن 38 جاستاعى ەر ادام ۇستالدى. بۇل تۋرالى 16 ناۋرىزدا وبلىستىق پوليسيا دەپارتامەنتىنىڭ باسپا ءسوز قىزمەتى مالىمدەدى.
ۆەدومستۆونىڭ مالىمەتىنشە، ارىز پوليسياعا 15 ناۋرىزدا تۇسكەن. سول كۇنى قىلمىستىق ءىس قوزعالىپ، كۇدىكتى ۇستالىپ، ۋاقىتشا ۇستاۋ يزولياتورىنا قامالدى.
بۇل وقيعاعا ق ر وقۋ-اعارتۋ مينيسترلىگى بالالاردىڭ قۇقىقتارىن قورعاۋ كوميتەتى دە تۇسىنىك بەردى.
"قىز تۋعان اكەسىنىڭ قاسىندا، وعان بارلىق قاجەتتى پسيحولوگيالىق كومەك كورسەتىلىپ جاتىر جانە قۇقىقتىق قولداۋ كورسەتىلەدى. وبلىستىق بالالار قۇقىقتارى جونىندەگى ۋاكىل اكەسىمەن بايلانىستا، سونىمەن قاتار وگەي اكە مەن اناسىن قىلمىستىق جاۋاپكەرشىلىككە تارتۋ تۋرالى ءوتىنىش بەردى. بالالاردىڭ قۇقىقتارىن قورعاۋ كوميتەتى جاعدايدى نازاردا ۇستاپ، بالانىڭ قۇقىعىن قورعاۋ ءۇشىن بارلىق شارانى قابىلداپ جاتىر"، - دەلىنگەن حابارلامادا.
