SCAT اۋە كومپانياسى تاياۋ شىعىستاعى احۋالعا بايلانىستى مالىمدەمە جاسادى، - دەپ حابارلايدى Dalanews.kz.
2 قازاندا يران اۋماعىنىڭ اۋە كەڭىستىگىنىڭ جابىلۋىنا بايلانىستى SCAT اۋە كومپانياسى شارم-ەل-شەيح (مىسىر)، سونداي-اق دجيددا جانە مەدينا (ساۋد ارابياسى) باعىتتارىنداعى رەيستەردىڭ باعىتتارىن وزگەرتىپ، ۇشۋ ۋاقىتى ورتاشا ەسەپپەن ءبىر ساعاتقا ۇزاردى.
"قازىرگى ۋاقىتتا يراننىڭ اۋە كەڭىستىگى قايتا اشىلىپ، اۋە دالىزدەرى قولجەتىمدى. اۋە كومپانياسى جاعدايدى ۇنەمى باقىلاپ، قاجەت بولعان جاعدايدا رەيستەر كەستەسىنە قوسىمشا وزگەرىستەر ەنگىزۋگە دايىن. ءبىزدىڭ باستى مىندەتىمىز – جولاۋشىلاردىڭ قاۋىپسىزدىگى"، - دەيدى كومپانيا وكىلدەرى.
ايتا كەتەيىك، 2 قازانعا قاراعان ءتۇنى يران ءيزرايلدى راكەتامەن اتقىلادى. بۇل تۋرالى يزرايل اسكەرى مالىمدەدى. بۇكىل يزرايل اۋماعىندا دابىل قاعىلىپ، تۇرعىندارعا ءقاۋىپسىز جەرگە تىعىلۋعا بۇيرىق بەرىلدى.
يزرايل اسكەرى يران 400 راكەتا جىبەردى دەپ وتىر. ال يران يسلام ريەۆوليۋسياسى ساقشىلار كورپۋسىنىڭ ارنايى جاساعى بۇل شابۋىلدى حاماس ليدەرى يسمايل حانيانىڭ، "حەزبوللا" ليدەرى حاسان ناسىراللانىڭ جانە يران جاساعىنىڭ كومانديرى ابباس نيلفرۋشانىڭ ولىمىنە جاۋاپ ەكەنىن مالىمدەدى.
يزرايل تەلەارناسىنىڭ 12 ارناسىنىڭ حابارلاۋىنشا، ەۆرەي مەملەكەتى اۋە كەڭىستىگىن جاپتى. يراك پەن يوردانيا دا وسىنداي شەشىم قابىلدادى.
وسى جايتقا بايلانىستى ەلشىلىك پەن ءسىم دە تاياۋ شىعىستاعى جاعدايعا بايلانىستى شۇعىل مالىمدەمە جاسادى.
