سايلاۋدىڭ سوڭىندا كەتەتىن ديرەكتورلاردىڭ ايلىعىن كەسىڭىز – ءمۇعالىم مينيسترگە تالاپ قويدى

Dalanews 07 جەلت. 2020 10:24 578

بەلسەندى ۇستاز ايمان ساعيدۋللا مەكتەپ ىشىندە سايلاۋ ۋچاسكىلەرىن ۇيىمداستىرۋعا قارسى. ول بۇل ناۋقانعا ءبىلىم وردالارىن ارالاستىرماۋدى سۇراپ، ءمينيسترى ايماعامبەتوۆكە بىرنەشە تالاپ قويدى دەپ حابارلايدى Dalanews.kz. 

ونىڭ پىكىرىنشە ءاربىر سايلاۋدا ۇستازدار اق تەر، كوك تەرگە تۇسەدى. وسىلايشا ۇستاز بەدەلىن قۇلدىراتىپ، اتالعان ماماندىقتىڭ ءقادىرىن كەتىرىپ وتىرمىز. ءسوي دەگەن ساعيدۋللا ايماعامبەتوۆكە ءۇن قاتىپ، ءبىرقاتار ۇسىنىستى ورتاعا سالىپتى.

ۇستازدىڭ ۇسىنىسى

اسحات ايماعامبەتوۆ مىرزا! حالىق ءۇشىن جاساۋىڭىز قاجەت ءبىر ءىس بار.

1. مەكتەپكە سايلاۋدى جاقىنداتپاۋ.

2. مەكتەپ مۇعالىمدەرى مەن باسشىلارىنىڭ كوميسسيا مۇشەلىگىنە كىرۋىنە تيىم سالۋ. (قاجەت بولسا، زاڭعا ەنگىزۋ. )

3. سايلاۋ ۋچاستكەلەرىن مەكتەپ عيماراتىنان اشۋعا تيىم سالۋ.

بۇل سايلاۋدىڭ ارام ىسىنە مۇعالىمدەردى ارالاستىرىپ، ءمۇعالىمنىڭ بەدەلىن تۇسىرۋگە جول بەرمەۋدىڭ نەگىزگى جولى.

سوندىقتان مەكتەپ پەن ءمۇعالىمدى سايلاۋدان قورعاپ، وسى ماسەلەنى قولعا الۋىڭىزدى سۇرايمىن! – دەيدى بەلسەندى ۇستاز.




بۇدان بولەك ول، مەكتەپ ديرەكتورلارىن سايلاۋ اياقتالعانشا قىزمەتىنەن شەتتەتىپ، ايلىق جالاقىلارىن تولىق قىسقارتۋ كەرەك دەپ سانايدى. سەبەبى سايلاۋعا اتسالىساتىن ديرەكتورلار نەگىزگى جۇمىسىن ۇمىتىپ، ناۋقاننىڭ سوڭىندا كەتەدى.

«سايلاۋ ۋچاسكەسى كوميسسياسىنىڭ ءتوراعاسى مەكتەپ ديرەكتورلارى. ديرەكتورلاردىڭ جۇمىس ۋاقىتى تاڭعى 8.00 دەن 18.00 ارالىعىندا.

ولار سول ارالىقتا ديرەكتورلىق جۇمىسىنا جالاقى الادى. سوندا سايلاۋ كوميسسيانىنىڭ ءتوراعاسى رەتىندە قاي كەزەڭدە جۇمىس ىستەيدى؟ تۇندە مە؟ ارينە، ديرەكتورلىق جۇمىسىنىڭ ۋاقىتىندا جۇمىس جاساپ ءجۇر.


سوندىقتان سايلاۋ كوميسسياسىنىڭ ءتوراعاسى بولىپ جۇمىس ىستەپ جۇرگەن مەكتەپ ديرەكتورلارىن، سايلاۋ بىتكەنشە، ۋاقىتشا ديرەكتورلىق قىزمەتتەن شەتتەتىپ، جالاقىلارىن تولىق قىسقارتۋلارىڭىزدى سۇرايمىن. سايلاۋ كوميسسياسىنىڭ ءتوراعاسى بولعانى ءۇشىن دە جالاقى الادى. ءبىر ادام ءبىر ۋاقىتتا ەكى جۇمىستى قالاي ىستەيدى؟ مەملەكەتتىڭ، حالىقتىڭ اقشاسى دالادا جاتقان جوق.

اقشالارىن قىزعانبايمىن. جاساماعان جۇمىسىنا اقشا تولەپ وتىرسىزدار.

ويلانىپ كورىڭىزشى. ءبىر ۋاقىتتا ەكى جۇمىس ىستەي الا ما؟

وسىلاي ءبىر كەزەڭدە ەكى جۇمىس ىستەپ، ەكى جۇمىستان جالاقى الۋعا زاڭ نە دەيدى»، - دەپ جازدى ول جەلىدەگى پاراقشاسىندا.

ايتا كەتسەك، 2021 جىلدىڭ 10-قاڭتارىندا ق ر پارلامەنتى ءماجىلىسى مەن ءماسليحاتتارىنىڭ سايلاۋى وتەدى. وسىعان دەيىن وتكەن پرەزيدەنت سايلاۋىنا مەكتەپ ديرەكتورلارى مەن مۇعالىمدەر جاپپاي قاتىسىپ، ناۋقاننىڭ كورىگىن قىزدىرعان ەدى.

ۇسىنىلعان
سوڭعى جاڭالىقتار