قازاقستاننىڭ تۋماسى ساۋلە وماروۆا اقش قارجى مينيسترلىگىندە قارجىلىق باقىلاۋ باسقارماسىنىڭ باسشىسى لاۋازىمى قىزمەتىنەن باس تارتتى، دەپ حابارلايدى Dalanews.kz.
بۇعان دەيىن اقش پرەزيدەنتى دجو بايدەن وماروۆانىڭ كانديداتۋراسىن وسى لاۋازىمعا ۇسىنعان بولاتىن. الايدا قازاق قىزىنىڭ كانديداتۋراسىن ماقۇلداۋ كەزىندە قارسىلىققا تاپ بولدى، ول جەتكىلىكتى داۋىس جيناي المادى.
ريا نوۆوستي مالىمەتىنشە، Cەناتتاعى تىڭداۋلاردا رەسپۋبليكالىق سەناتور دجون كەننەدي وماروۆانىڭ كوممۋنيستىك جۇيەنىڭ مۇشەسى بولعانىن بەتىنە باستى. ءوز كەزەگىندە ساۋلە وماروۆا ونىڭ وتباسى كوممۋنيزمنەن زارداپ شەككەنىن العا تارتتى.
اقش پرەزيدەنتى دجو بايدەن:
"مەن ساۋلە وماروۆانىڭ ۆاليۋتالىق باقىلاۋ باسقارماسىنىڭ باسشىسى لاۋازىمىنا كانديداتۋراسىن قايتارىپ الۋ تۋرالى ءوتىنىشىن قابىلدادىم".
ساۋلە وماروۆا 1966 جىلى ورال قالاسىندا دۇنيەگە كەلگەن. ممۋ، ۆيسكونسين ۋنيۆەرسيتەتى جانە سولتۇستىك-باتىس ۋنيۆەرسيتەتىن بىتىرگەن. كورنەلل ۋنيۆەرسيتەتىنىڭ بانكتىك قۇقىق بويىنشا پروفەسسورى.
