سارقان اۋدانىنىڭ اكىمدىگى قوس جاڭالىقتى قۋانا جەتكىزدى. اۋداننىڭ مالىمەتىنشە، باسپانالى بولعانداردىڭ اراسىندا جەتىم بالالار، ءى، ءىى توپتارعا مۇگەدەك جاندار، مۇمكىندىگى شەكتەۋلى بالالاردى تاربيەلەۋشى، كوپ بالالى جانە تولىق ەمەس وتباسىلار، زەينەتكەر، اۋعان سوعىسىنىڭ ارداگەرى، مەملەكەتتىك جانە بيۋدجەتتىك قىزمەتكەرلەر، تۇرعىن ءۇيى اپاتتى دەپ تانىلعان وتباسى دا بار. بۇل 5 قاباتتى تۇرعىن ءۇيدىڭ قۇرىلىسىنا جالپى سوماسى 505،630 ملن تەڭگە قاراجات جۇمسالعان.
– مەن وسى قۋانىشتى كوپ كۇتتىم. 10 جىلعا جۋىق جالدامالى ۇيدە تۇرىپ كەلدىم، وندا بالالارىما ەشقانداي قولايلى جاعداي بولمادى. ەندى وتباسىمىزبەن كيەلى شاڭىراعىمىزدىڭ تابالدىرىعىن جاڭا ۇمىتمەن، اق نيەتپەن اتتاعالى وتىرمىز، – دەدى جاڭا پاتەر يەسى كوپ بالالى انا پەريزات قۇدياروۆا.
تۇرعىن ۇيلەر زامان تالابىنا ساي بارلىق كوممۋنيكاسيالىق جەلىلەرگە قوسىلعان. سونداي-اق، بالالار وينايتىن الاڭقايمەن قوسا اۆتوكولىك تۇراعى دا قاراستىرىلعان.
تاعى ءبىر اقجولتاي جاڭالىق - سارقان قالاسىندا بالالاردى وڭالتۋعا ارنالعان ورتالىق ەسىگىن ايقارا اشتى. وندا جالپى سوماسى 37،4 ملن تەڭگەگە قۇرال-جابدىقتار ساتىپ الىنعان، سونىڭ 27،7 ملن تەڭگەسى وڭالتۋ قۇرالدارىنا جۇمسالدى.
مۇندا MotoMed ترەجانەرى، ۆەرتيكاليزاتور، ERGO قۇرىلعىسى، رەسيكۋلياتور، دەلفا-1 لوگوپەد ترەناجەرى جانە باسقا دا قۇرىلعىلار بار. زاماناۋي قۇرالدارمەن جابدىقتالعان 22 كابينەتتە 55 جوعارى بىلىكتى مامان قىزمەت كورسەتەدى. ورتالىققا بالالاردى تاسىمالداۋعا ارنالعان ارناي جاڭا اۆتوكولىك تە بولىنگەن. اۋلاسى اباتتاندىرىلعان، بالالارعا ارنالعان ويىن الاڭدارى بار.
نىساننىڭ اشىلۋ سالتاناتىنا ارنايى بارعان وبلىستىق جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسىنىڭ باسشىسى مارجان مۇرات:
– بۇنداي ورتالىقتاردى مەيلىنشە كوپتەپ اشقان ءجون. ەرەكشە كۇتىمدى تالاپ ەتەتىن بالالاردى ۇيدە ۇستاماۋ كەرەك. بالانى ارنايى بىلىكتى مامادارعا اپارۋ ارقىلى قانداي دا ءبىر جەتىستىكتەرگە جەتۋگە بولادى. سارقان اۋدانىندا اشىلىپ وتىرعان ورتالىقتىڭ ەرەكشەلىگى، بۇل جەردە بالالاردى تاڭنان كەشكە دەيىن قالدىرۋعا بولادى. سونداي-اق الىس اۋىلداردان قاتىنايتىن اتا-انالار وسى ورتالىقتا 6 ايعا دەيىن قالىپ، ەمدەۋ بارىسىندا بالالارىنىڭ جانىندا بولا الادى، – دەدى.
بۇل نىساندا الەۋمەتتىك-مادەني، الەۋمەتتىك-ەكونوميكالىق، الەۋمەتتىك-پسيحولوگيالىق، الەۋمەتتىك-مەديسينالىق، الەۋمەتتىك-قۇقىقتىق باعىتتار بويىنشا قىزمەت كورسەتىلەدى.
– وڭالتۋ ورتالىعىنىڭ قالامىزدا اشىلعانىنا ريزامىن. وسىندا 11 جاستاعى نەمەرەمدى اكەلدىم. جىل سايىن ەلورداعا وڭالتۋعا باراتىنبىز. ەندى ەشقايدا سابىلماي وسى ورتالىقتىڭ ماماندارىنا جۇگىنەمىن، بالامنىڭ دەنساۋلىعىندا وڭ وزگەرىستەر بولادى دەپ ۇمىتتەنەمىن، – دەيدى سارقاندىق ساۋلەت نۇرمۇحامەد قىزى.
ايتا كەتەيىك، ورتالىق ورنالاسقان عيماراتتى كۇردەلى جوندەۋگە 27 ملن تەڭگە جۇمسالعان. جالپى مۇنداي ورتالىقتاردىڭ سانى جەتىسۋ جەرىندە 11 بولسا، سونىڭ 4-ەۋى مەملەكەتتىك مەكەمە.
