سارىاعاش اۋدانىنداعى جىلىجاي قىزاناق وسىرۋمەن اينالىسادى. اۋماعى 7 گا بولاتىن القاپتا جىلىنا ەكى رەت ءونىم جينالادى. العاشقى كوشەت اقپان ايىندا وتىرعىزىلىپ، ونىڭ ءونىمى مامىر-ماۋسىم ايلارىندا جينالادى. ەكىنشى رەت تامىزدا قايتا ەگىلىپ، قازان مەن قاراشا ايلارىندا جيىن-تەرىم جۇمىستارى باستالادى.
قىزاناق جيناۋدىڭ دا ءسىز بەن ءبىز بىلمەيتىن وزىندىك ەرەجەلەرى مەن تالاپتارى بار.
ءقازىر مۇندا 40-قا جۋىق قولى بوس قىز-كەلىنشەك تەرىم جۇمىسىنا قاتىسۋدا. ولاردىڭ الدى كۇنىنە 50-دەن 100 قوراپقا دەيىن ءونىم جينايدى. ءقازىر جىلىجايدا قىزاناق تەرۋ جۇمىستارى قارقىندى جۇرگىزىلىپ جاتىر.
وسىنداعى مامانداردىڭ ايتۋىنشا، ءاربىر تۇپتەن 7-8، ءتىپتى 10 كگ دەيىن ءونىم الۋعا بولادى. جينالعان دايىن ءونىم قوراپتارعا سالىنىپ، قويماعا جەتكىزىلەدى. جاڭا تەحنولوگياعا يەك ارتقان ديقاندار ونىڭ يگىلىگىن دە كورە باستاپتى. ءقازىر 1 گەكتاردان 100 توننا ءونىم جيناۋدا. دەمەك 7 گەكتاردان 700 توننا قىزاناق تەرىلەدى. سوندا جىلىنا 1400 توننا ءونىم الىنادى.
دايىن ءونىمنىڭ 70 پايىزى ەلىمىزدىڭ وزگە وبلىستارىنا جونەلتىلسە، قالعان 30 پايىزى رەسەيگە ەكسپورتتالادى. ءقازىر جىلىجاي ىشىندەگى اۋا ءبىرقالىپتى تەمپەراتۋرانى ۇستاپ تۇرادى. ەگەر شامادان تىس ىسي باستاسا، اۆتوماتتى جۇيە بىردەن ىسكە قوسىلىپ، جىلىجاي تەرەزەلەرى اشىلادى.
جالپى، وبلىستاعى جىلىجايلاردىڭ 55 پايىزى وسى سارىاعاش اۋدانىنا تيەسىلى. ال رەسپۋبليكاداعى جىلىجايلاردىڭ 80 پايىزى تۇركىستان وبلىسىنىڭ اۋماعىندا ورنالاسقانىن ەسكەرسەك، جاڭا تەحنولوگيالاردى ەنگىزۋ ارقىلى ءونىم كولەمىن ارتتىرۋعا تولىق مۇمكىندىك بار.
