تۇركىستان وبلىسىنداعى سارىاعاش مەدرەسە-كوللەدجىندە «كىتاپتى سىيعا تارتۋ» اكسياسى ءوتتى. اتالعان ءىس-شاراعا سارىاعاش اۋدانى اكىمىنىڭ ورىنباسارى الديار قوزىبايەۆ ، «FARAB» وبلىستىق امبەباپ كىتاپحاناسىنىڭ ءبولىم مەڭگەرۋشىسى دانا تاجەنوۆا، وبلىستىق ءدىن ىستەرى باسقارماسى باسشىسى رۇستەم سابىرجان ۇلى، قازاقستان مۇسىلماندارى ءدىني باسقارماسىنىڭ تۇركىستان وبلىسى بويىنشا وكىلى ەرجان تولەپوۆ، «سارىاعاش مەدرەسە-كوللەدجىنىڭ» ديرەكتورى دىنمۇحامەد سمانوۆ قاتىسىپ، ءىس-شارانىڭ ماڭىزدىلىعىنا توقتالدى، – دەپ حابارلايدى Dalanews.kz تۇركىستان وبلىسى اكىمىنىڭ باسپا ءسوز قىزمەتىنە سىلتەمە جاساپ.
تۇركىستان وبلىسىنىڭ ءدىن ىستەرى باسقارماسى جانە مادەنيەت باسقارماسىنىڭ ۇيىمداستىرۋىمەن وتكەن اكسيا اياسىندا سارىاعاش مەدرەسە-كوللەدجىنە 300-دەن اسا كىتاپ سىيعا بەرىلدى. اتاپ ايتساق، «FARAB» وبلىستىق كىتاپحاناسىنان 100 كىتاپ، سارىاعاش اۋدانىنىڭ كىتاپحاناسى اتىنان 100 كىتاپ، قازىعۇرت جانە كەلەس اۋدانىنىڭ كىتاپحانالارىنان 60 كىتاپ، ماقتاارال جانە جەتىساي اۋدانىنىڭ كىتاپحانالارىنان 100 كىتاپ، تۇركىستان وبلىسىنىڭ باس يمامىنىڭ اتىنان 3 كىتاپ سىيعا تارتىلدى.
ايتا كەتەيىك، ق ر پرەزيدەنتىنىڭ كەڭەسشىسى مالىك وتاربايەۆتىڭ ۇسىنىسىمەن، وبلىس اكىمدىگىنىڭ تاپسىرماسىنا سايكەس ۇيىمداستىرىلعان ءىس-شارا ماقساتى – كىتاپ مارتەبەسىن كوتەرۋ، جاستاردى پاتريوتيزمگە، ەڭبەكتى سۇيۋگە، جالپىۇلتتىق قۇندىلىقتى ءاربىر جاستىڭ بويىنا ءسىڭىرىپ، ءبىلىمدى دە مادەنيەتتى بولىپ تاربيەلەنۋىنە ۇلەس قوسىپ، كىتاپ وقۋدى ناسيحاتتاپ، ۇلتتىق اقىن-جازۋشىلاردىڭ شىعارمالارىن ناسيحاتتاۋ، كىتاپحاناعا وقىرمان تارتۋ، كىتاپ قورىن تولىقتىرۋ.
