وزبەكستاننان كەلگەن ءبىر توپ يمامدار مەن ءدىنتانۋشى مامانداردى سارىاعاش اۋدانى اكىمىنىڭ ورىنباسارى سمايل تاسقۇلوۆتىڭ ارنايى قابىلداۋىندا بولدى.
جيىن بارىسىندا قازىرگى تاڭدا بەلەڭ الىپ تۇرعان قوعامداعى كەرىاعار ءدىني اعىمداردىڭ الدىن الۋ، ەكسترەميزم مەن تەرروريزمدى بولدىرماۋ ماسەلەلەرى قارالدى.
قازىرگى كەزدە ءدىني فۋندەمەنتاليزم مەن لاڭكەستىك ءبىر عانا ايماققا، ءبىر عانا مەملەكەتكە ءتان نارسە بولماي وتىر. الەمدىك دارەجەدە لاڭكەستىككە اپاراتىن ءدىني ەكسترەميزم جالعاسا تۇسۋدە. ءتۇرلى توپتار وسىنى پايدالانۋ ارقىلى ساياسي-ەكونوميكالىق ماسەلەلەردى شەشۋگە تىرىسۋدا. بۇل رەتتە قازاقستان پرەزيدەنتى ن.ءا.نازاربايەۆ بىلاي دەپ اتاپ كورسەتتى: «قازاقستاندا تەرروريزم، سەپاراتيزم جانە ەكسترەميزم پروبلەمالارى بار. اسىرەسە حالىقارالىق تەرروريزمنىڭ كەڭ قانات جايعانىن جانە حالىقارالىق قاۋىمداستىق پەن ايماقتاردىڭ ساياسي-الەۋمەتتىك جانە ەكونوميكالىق ماسەلەلەرمەن ۇشتاسىپ، ساياسيلانعانىن ەسكەرسەك، ولاردىڭ تاراپىنان تۋىنداعان ءقاۋىپ ويدان شىعارىلعان ەمەس، ناقتى جانە شىنايى ومىرلىك ءقاۋىپ» دەگەن بولاتىن. سوندىقتان بۇل باعىتتا قىراعىلىق تانىتۋدىڭ ماڭىزى زور.
– ءبارى دە، تۇپتەپ كەلگەندە، قانتوگىسپەن، ەكونوميكالىق كۇيرەۋمەن اياقتالاتىنىن كورىپ وتىرمىز. سوندىقتان، الەمدەگى وقيعالاردى وي ەلەگىنەن وتكىزىپ، قورىتىندى جاساۋ – قوعامنىڭ دا، ساياسي پارتيالار مەن قوزعالىستاردىڭ دا، ءبىلىم بەرۋ جۇيەسىنىڭ دە اۋقىمدى دۇنيەتانىمدىق، رۋحاني جۇمىسىنىڭ ءبىر بولىگى، – دەپ اتاپ ءوتتى سمايل تاسقۇلوۆ ءوز سوزىندە. سونىمەن قاتار، كەلگەن قوناقتارمەن الداعى ۋاقىتتا كەزدەسۋلەر مەن جيىندار وتكىزىلەتىن جەتكىزىپ، كورشى ەلدىڭ ءدىنتانۋشىلار مەن يمامدارعا العىسىن ايتتى.
Dalanews.kz
