قازاقستاندا بانك كارتاسىن ءۇشىنشى تۇلعالارعا بەرگەنى ءۇشىن جاۋاپكەرشىلىك ەنگىزىلدى، دەپ حابارلايدى Dalanews.kz.
قىلمىستىق كودەكستىڭ جاڭا 232-1 بابىنا بانك دەرەكتەرىن ءۇشىنشى تۇلعالارعا بەرگەنى ءۇشىن، سونداي-اق، ماتەريالدىق سىياقى نەمەسە مۇلىكتىك سيپاتتاعى پايدا ءۇشىن نەمەسە ولاردى الۋ ماقساتىندا ءۇشىنشى تۇلعانىڭ مۇددەسى ءۇشىن يا بولماسا پايدانى كوزدەپ، تولەمدەر نەمەسە اقشا اۋدارىمدارىن جاساعانى ءۇشىن قىلمىستىق جاۋاپكەرشىلىك ەنگىزىلدى.
ءىىم مالىمەتىنشە، الاياقتار وسى دەرەكتەردى قىلمىستىق كىرىستى قولما-قول اقشاعا اينالدىرۋ نەمەسە باسقا ازاماتتاردى الداۋ ءۇشىن پايدالانادى.
"كوپ جاعدايدا زارداپ شەككەندەر وزدەرىنىڭ قىلمىسقا قاتىسۋشى ەكەنىن تۇسىنبەيدى. جەكە جانە بانك دەرەكتەرى جاي عانا اقپارات ەمەس، بۇل - ءسىزدىڭ مۇلكىڭىزدىڭ، قاۋىپسىزدىگىڭىزدىڭ جانە زاڭ الدىنداعى جاۋاپكەرشىلىگىڭىزدىڭ كىلتى"، - دەدى ءىىم وكىلدەرى.
ءىىم مىناداي كەڭەس بەردى:
- ەشقاشان بانك دەرەكتەرىڭىزدى ءۇشىنشى تۇلعالارعا بەرمەڭىز؛
- كارتاڭىزدى نەمەسە شوتىڭىزدى بەرۋ ارقىلى "وڭاي اقشا تابۋعا" كەلىسپەڭىز؛
- كۇدىك تۋىنداعان جاعدايدا بانككە نەمەسە قۇقىق قورعاۋ ورگاندارىنا حابارلاسىڭىز.
