اقتوبەلىك بەلسەندىلەر جۇڭگو تاراپىنان سەزىلەتىن الەۋمەتتىك تەڭسىزدىككە الاڭداۋلى. بەردىبەك ساپاربايەۆ اقتوبەلىك بەلسەندىلەرمەن اشىق كەزدەسۋ وتكىزدى. ەل ماسەلەسى، جەر ماسەلەسىنە الاڭداعان جيىندا جۇڭگو مەن قازاق جۇمىسشىلارى اراسىنداعى الەۋمەتتىك تەڭسىزدىك تە ايتىلدى.
بۇل تۋرالى NUR.KZ -كە سىلتەمە جاساپ، dalanews.kz سايتى حابارلايدى.
«كەشەگى شىققان ميتينگتە كوپشىلىك جۇڭگو ماسەلەسىن كوتەردى. ءبىز مويىنداۋىمىز كەرەك. وبلىس كولەمىندە جۇڭگو تاراپىنان الەۋمەتتىك تەڭسىزدىك بار. جۇڭگو شىن مانىندە ءابسوليۋتتى بيلىككە يە بولىپ كەلە جاتىر. ەكونوميكانىڭ 60-70 پايىزى سولاردىڭ قولىندا دەسەك، ارتىق ايتقاندىق ەمەس. بۇل اقتوبە توڭىرەگىندە. ەگەر ەكونوميكانىڭ تەتىگى كىمنىڭ قولىندا بولسا، بيلىك تە، ءسوز دە، ىقپال دا سونىڭ قولىنا كوشۋى ابدەن مۇمكىن. ءبىز قىتايدان كەلگەندەر مەن جەرگىلىكتى جۇمىسشىلار اراسىنداعى الەۋمەتتىك تەڭسىزدىككە نازار اۋدارۋىمىز كەرەك»، - دەيدى نۇرلىباي قوشامان ۇلى.
وڭىردەگى شەتەل ازاماتتارىنىڭ ساناۋلى ەكەنىن ايتقان وبلىس باسشىسى جاعدايدىڭ باقىلاۋدا ۇستاپ وتىرعانىنا سەندىردى.
«مەن ءبىزدىڭ وبلىستا قانشا شەتەل ازامات جۇمىس ىستەيدى دەگەندى تالدادىم. جالپى وبلىستا جۇمىس ىستەيتىن ادامداردىڭ سانى 430 مىڭعا جۋىق. سونىڭ ىشىندە رۇقسات بەرىلگەن 1 400 شەتەلدىك ازامات بولۋ كەرەك. قازىرگى جۇمىس جاساپ جاتقان شەتەلدىڭ ادامدارى - 1 100. ونىڭ ىشىندە 70-80 جۇڭگو بار. مەن بارلىق جۇڭگو كومپانياسىنىڭ باسشىلارىنا: «ەگەر قىسقارتۋ بولسا، ءبىرىنشى جۇڭگو ازاماتى قىسقارۋ كەرەك. قىتايدى جىبەرەسىڭدەر انا جاققا دەپ ايتىپ وتىرمىن»، - دەدى وبلىس اكىمى.
بەردىبەك ماشبەك ۇلى ەل ەكونوميكاسىنىڭ تىزگىنى شەتەلدىكتەرگە بەرىلمەيتىنىن باسىپ ايتتى.
«ەشقاشان، مەملەكەت باسشىسى، ءبىز ءتىرى تۇرعان كەزدە، جۇمىس ىستەپ جاتقان كەزدە، ءبىز بيلىكتى، اسىرەسە، ەكونوميكانى شەتەلگە بەرمەيمىز. ءبىز دە قازاقستاننىڭ ازاماتىمىز. وتكەن سەنبى كۇنى جاڭاجولدا بولدىم، سول جەردە قوندىم. شىنىن ايتقاندا ول جەردە قازاقتاردىڭ تۇرىپ جاتقان جەرى قىتايلاردان جاقسى، ەكى ادامنان تۇرادى. قىتايلار 4-5 ادامنان تۇرىپ ۇيرەنىپ قالعان. جۇمىسشىلارمەن سويلەستىم، جاعدايلارىن سۇرادىم. ول جەردە تەك ءبىر ماسەلە بار، ول - ماماندار. ماماندار بىزدە بولماعانان كەيىن سونداي جالاقى تولەنەدى. ول مەملەكەت اراسىنداعى كەلىسىمگە سايكەس. ال جۇمىسشىلار اراسىندا ايىرماشىلىق جوق. «جۇڭگو قاپتاپ كەتتى» دەپ ايتادى. ءبىز ەندى اي قاراپ وتىرعان جوقپىز. ەكىنشىدەن مەملەكەتىمىزدىڭ زاڭى بار. ءاربىر كەلەتىن جۇڭگو، وزبەك، ورىس بولا ما وعان رۇقسات بەرىلەدى. كەيىنگى كەزدە قاراپايىم جۇمىسشى اكەلمەۋ جونىندە تالاپ قويىلىپ وتىر» ،- دەدى اقتوبە وبلىسىنىڭ اكىمى بەردىبەك ساپاربايەۆ.
