«اقتوبە اقپارات» ورتالىعىنىڭ مالىمەتىنشە، اقتوبە وبلىسىنىڭ اكىمى بەردىبەك ساپاربايەۆ وڭىردە مۇناي كەنىشىن بۇرعىلاۋمەن اينالىساتىن قىتايلىق «ۇلى قورعان» كومپانياسىنىڭ ۆيسە-پرەزيدەنتى مەن ليانكۋمەن كەزدەستى. ەكىجاقتى اڭگىمە بارىسىندا وبلىس اكىمى قازاق جۇمىسشىلارىن قىسقارتپاي، باسقا شىعىنداردى قاراجات ۇنەمدەۋگە كەڭەس بەردى.
بەردىبەك ماشبەك ۇلىنىڭ ويىنشا، كومپانيا باسشىلارى قاراجات ۇنەمدەگىسى كەلسە، ءىس-ساپارلار سانىن قىسقارتۋ كەرەك. ويتكەنى، كومپانيادا جۇمىس ىستەيتىن شەتەلدىك ماماندار ءوز وتاندارىنا ءجيى قاتىنايتىن كورىنەدى. سونداي-اق، كومپانيا قوسالقى بولشەكتەردى قىتايدان ساتىپ الادى ەكەن. اكىمنىڭ پىكىرىنشە، بۇل دا كومپانيا ءۇشىن قوسىمشا شىعىن بولىپ وتىر.
«ءقازىر ۇنەممەن ءومىر ءسۇرۋ كەرەك. شەتەلدىك مامانداردى ءبىزدىڭ ەلگە تارتۋ ماسەلەسىن قاتاڭ قاداعالايتىن بولامىز. ءبىز ءقازىر ءوز ازاماتتارىمىزدى جۇمىسپەن قامتۋىمىز قاجەت. كومپانيا 15 جىل بويى مول تابىس تاۋىپ كەلدى. سوندىقتان، قازىرگى داعدارىس ۋاقىتىندا قۇرىلتايشىلارى قولداۋ كورسەتىپ، نەسيەنى تولەۋ ۋاقىتىن سوزۋ كەرەك. قاجەت بولسا جارعىعا وزگەرىس ەنگىزىپ، وزگە دە قىزمەت تۇرىمەن اينالىسساڭىزدار بولادى»، – دەدى ساپاربايەۆ كەزدەسۋ بارىسىندا.
10 شىلدە كۇنى «ۇلى قورعان» ج ش س جۇمىسشىلاردىڭ سانىن قىسقارتپاۋ ماقساتىندا مەملەكەتتىك ورگاندارمەن بىرلەسە ارنايى ۇسىنىستار ازىرلەۋى ءتيىس.
دەرەككوز: «ۇلت پورتالى»
