– ساپاربايەۆ ۋادە بەردى، كەيىن ورىندامادى دەپ جۇرمەڭىزدەر. ءبىراق، جاس جۋرناليستەرگە بولمە بەرەمىز. بيىل ءبىر جاتاقحانا قۇرىلىسى اياقتالادى، ەكىنشىسىن كەلەسى جىلى تاپسىرامىز. سودان كەيىن ءۇشىنشى جاتاقحانا قۇرىلىسى بار. مەنىڭ ارمانىم – جاس ماماندارعا كومەكتەسۋ. دارىگەر، مۇعالىمدەر، ارتىستەر مەن سپورتشىلاردىڭ باسپانا ماسەلەسىن شەشىپ بەرسەك دەيمىن، – دەيدى وبلىس باسشىسى بەردىبەك ماشبەك ۇلى.
«ءتىلشىنىڭ» حابارلاۋىنشا، ءوڭىر باسشىسى اقتوبە وبلىسىنان وزگە جاققا كەتىپ قالعان جاس ماماندارمەن سويلەسكەنىن دە جاسىرمادى.
– كەيبىرىمەن تىلدەستىم. «جاعدايىمىز بولماعان سوڭ، كەتىپ قالدىق» دەيدى. بۇگىندە وبلىستا ءبىلىم، مەديسينالىق كلاستەر قالىپتاستىرىپ جاتىرمىز. ال ول ءۇشىن جاس ماماندار كەرەك-اق. ارينە، ماسەلەنى بۇگىن-ەرتەڭ شەشىپ بەرەمىن دەمەيمىن، – دەيدى بەردىبەك ساپاربايەۆ.
جالپى، جۋرناليستەردىڭ ءۇي-جايى تۋرالى ماسەلە بىلتىر دا، بيىل جىل باسىندا دا كوتەرىلدى. جەلتوقسان ايىندا وسى ساۋالدى بەلگىلى جۋرناليست مەيرامگۇل ساتايەۆا قويعان بولاتىن. كەيىن وبلىس باسشىسى «ريكا» مەدياحولدينگىنىڭ ۇجىمىمەن كەزدەسكەندە ارىپتەسىمىز دينارا جانالينا دا قوزعادى.
رەسپۋبليكالىق «جاس الاش» گازەتىنىڭ اقتوبە وبلىسىنداعى مەنشىكتى ءتىلشىسى بايان سارسەمبينانىڭ ايتۋىنا قاراعاندا، اقتوبەلىك جاس تىلشىلەردىڭ «باسىنان سيپاپ، قامقورلىق تانىتىپ» جاتقان ەشكىم جوق.
– اقتوبە وبلىسىندا جاس جۋرناليستەر لەگى قالىپتاستى. ءقازىر ولاردىڭ ورتا جاسى وتىزدان اسىپ بارادى. كوبىسىنىڭ جاعدايلارى بولماعاندىقتان كەتىپ جاتىر. تەلەكومپانيالار مەن گازەتتەردە باسشىلارى ەشقانداي جاعداي جاساعان جوق. ولاردىڭ ماڭدايىن سيپاماعاننان كەيىن، كومەكتەسىپ جىبەرمەگەن سوڭ، كوپشىلىگى الماتى، استانا قالالارىنا كەتتى. ەربول سەيىلحان، ءاليا تالاسوۆا، ايگۇل جۇبانىش تالانتتى كادرلار كەتىپ قالدى، – دەيدى بايان سارسەمبينا.
اعا بۋىن ءجۋرناليستىڭ پايىمىنشا، بۇگىندە اقتوبە جۋرناليستيكاسىندا باسپانا ماسەلەسىنەن وزگە، كادر ماسەلەسى دە وزەكتى. «جۋرناليست دايارلايتىن وقۋ ورداسى دا جوق، ول ءۇردىس الدەقاشان توقتاپ قالدى» دەيدى بايان سارسەمبينا.
اسقار اقتىلەۋ
