انشەيىندە ب ا ق وكىلدەرىنە سۇحبات بەرۋگە قۇلىقسىز قورعانىس مينيسترلىگى بۇل جولى بەلسەندى. اسكەردە 19 جاستاعى ۇلىنا زورلىق-زومبىلىق جاسالدى دەگەن ساربازدىڭ جاقىندارىنىڭ شاعىمىمەن كەلىسپەيدى.
وتان الدىنداعى بورىشىن اياقتاۋعا 8 كۇن قالعاندا رەناتتى ۇيىنە جەتكىزىپ تاستاعان، 4 اسكەريدىڭ ءبىرى امانگەلدى كوپجان. ول ساربازدىڭ ۇستىندەگى كيىمى ءبۇتىن بولعان، جازدىق اياق كيىمدى وزىنە ىڭعايلى بولۋى ءۇشىن كيگەنىن ايتتى. سونداي-اق ول اكەسىنىڭ ۇلىنىڭ دەنساۋلىعىنان حابارى بولماعان، دەيدى، دەلىنەدى استانا تەلەارناسىنىڭ سيۋجەتىندە.
امانگەلدى كوپجان، ديۆيزيون كومانديرىنىڭ تجيج بويىنشا ورىنباسارى:
"ول جەردە سول كىسىنىڭ اعاسى بولدى باحتيار دەگەن. سول كىسى ايتادى دا: ءبىر اۋليە بار. مەن سول اۋليەدەن قوڭىراۋ شالىپ سۇرادىم. سەن ونى قاماعانسىڭدار، ۇرعانسىڭدار، سوسىن ەسىنەن الجاستىرىپ جىبەرگەنسىڭدەر دەيدى. ۇرىپ جىبەرسەك ول جەرگە بارىپ نە قىلامىز؟".
اقتاۋ قالاسىنداعى 25/744 تەڭىز جاياۋ اسكەرلەرى بولىمىندەگىلەر ۇرمادىق دەپ اقتالىپ الەك. ءتىپتى اتا-اناسىنا ونى دالەلدەۋ ءۇشىن مەديسينالىق تەكسەرۋگە الىپ بارايىق دەپ ۇسىنىس تا جاسادىق دەپ وتىر. ءبىراق وعان قۇلاق اسپادى دەدى. تەك سۇراقتىڭ استىنا العاندارىن جەتكىزدى.
امانگەلدى كوپجان، ديۆيزيون كومانديرىنىڭ تجيج بويىنشا ورىنباسارى:
"ەسى دۇرىس ەمەس بولىپ تۇر عوي بالانىڭ. وز-وزىنە جاۋاپ بەرە المايتىن بالادان اۋزىنان "ءيا" دەگەن ءسوزى عانا شىقپاي تۇر دا، انالار شىعارا الماي تۇر دا".
سولاي-اق بولسىن، سوندا رەنات اسكەرگە قالاي قابىلدانعان؟ مەديسينالىق تەكسەرىس دۇرىس جۇرگىزىلمەگەنى مە؟ كوكەيدەگى كۇدىكتى ساۋالداردى اۋداندىق قورعانىس ىستەرى جونىندەگى ءبولىمنىڭ باستىعىنا جولدادىق.
باۋىرجان قۋاتوۆ، قىزىلوردا وبلىسى ارال اۋداندىق قورعانىس ىستەرى جونىندەگى ءبولىم باسشىسى:
"وبلىستىق قورىتىندى كوميسسيادان وتكىزىپ، قورىتىندى كوميسسيانىڭ قورىتىندىسى بويىنشا "ا" جارامدى بولىپ ءوتتى. ءبىرىنشى ساتىداعى جارامدى بالا. پسيحولوگيالىق تەستىلەۋدەن دە جاقسى وتكەن".
رەناتتىڭ اسكەردە بىرگە بولعان قارۋلاس دوستارىنىڭ ءبىرى، كۇدىكتى سەيىلتتى.
ونىڭ سوزىنشە ەلگە قايتاتىننان ءبىر اپتا بۇرىن، سارباز كومانديرلەرمەن سوزگە كەلىپ قالعان. سول كۇننەن باستاپ دوسىن كورمەگەن، تەك قايتاتىن كەزدە عانا ءبىراق كورىپتى.
بەكارىس تاڭاتاروۆ، ر.جەتكەرگەنوۆتىڭ جاۋىنگەرلىك دوسى:
"سوزگە كەلىپ قالعان كۇننەن باستاپ رەناتتى ءبولىمنىڭ سىرتىنداعى كازارماعا الىپ كەتتى. سودان باستاپ رەناتتى ءبىر اپتا كورمەدىك. پويىزدا كورگەن كەزدە رەنات باسقا جاعدايدا بولدى. باياعى ءبىر جىل قىزمەت كەتكەن رەنات جوق. باسقا ءتۇر، تانىماي قالدىق رەناتتى".
تۋىستارى بولسا، ساربازدى اسكەري شەندىلەر 8 كۇن بويى قيناعان دەپ وتىر. ونى رەناتتا ءبىر سوزىندە ايتىپ قالدى، دەيدى. قۇلاعىن تەسىپ، ايەل ەتىپ الامىز دەگەن كورىنەدى. وسى جاعدايدان سوڭ ونىڭ اتا-اناسى ءتيىس ورىندارعا شاعىم تۇسىرگەن. ءقازىر قىلمىستىق ءىس قوزعالىپ، تەرگەۋ باستالعان.
بەكەن شىنتىلەۋوۆ، ق ر قك اسكەري پوليسيا باس باسقارماسى باسشىسىنىڭ ورىنباسارى:
"قىلمىستىق ءىس اياسىندا ءتيىستى ساراپتامالار جۇرگىزىلىپ رەنات جەتكەرگەنوۆتىڭ تۋىستارىنىڭ بارلىق تۇجىرىمدارى مۇقيات تەكسەرىلەدى. سونداي-اق تەرگەۋدىڭ تولىقتىعى مەن وبەكتيۆتىلىگىن قامتاماسىز ەتۋگە باعىتتالعان باسقا دا تەرگەۋ ءىس-شارالارى جۇرگىزىلەتىن بولادى".
بۇعان دەيىن دە اقتاۋداعى 25/744 اسكەري بولىمىندە بىرنەشە رەت شۋ شىققان. اراسىندا رەنات سياقتى ەسىنەن ايىرىلعاندارى دا بار.
https://youtu.be/IcoShbTPqAI
