مەملەكەت پايداسىنا 375 ميلليارد تەڭگەدەن اساتىن اكتيۆتەر قايتارىلدى، - دەپ حابارلايدى Dalanews.kz.

مەملەكەت باسشىسىنىڭ زاڭسىز شىعارىلعان اكتيۆتەردى قايتارۋ جونىندەگى تاپسىرمالارىن ورىنداۋ ءۇشىن باس پروكۋراتۋرا باسقا دا جاۋاپتى مەملەكەتتىك ورگاندارمەن بىرلەسىپ، ءتيىستى جۇمىستار ىستەپ جاتىر.

"نەگىزگى ماقسات - مۇنداي اكتيۆتەردى قازاقستان تۇرعىندارىنىڭ يگىلىگى ءۇشىن زاڭدى اينالىمعا شۇعىل تارتۋ. اكتيۆتەردى قايتارۋ پروسەسى قاتاڭ تۇردە زاڭعا سايكەس جانە زاڭنىڭ ولشەم شارتتارىنا سايكەس كەلەتىن ادامدارعا عانا قاتىستى جۇرگىزىلىپ جاتىر"، - دەپ جازىلعان باس پروكۋراتۋرانىڭ باسپا ءسوز قىزمەتى حابارلاماسىندا.

باس پروكۋراتۋرا ەلدەگى 1 مىڭنان اسا جانە شەتەلدەگى 150-دەن اسا مۇلىك تۋرالى مالىمەتتەردى تالداپ جاتىر. تالداۋدا تاعى 600 ميلليارد تەڭگەنىڭ باعالى قاعازدارى قامتىلعان. ەلىمىزدە 200-دەن اسا جانە شەتەلدە 140 بانك شوتى انىقتالدى. 2 تريلليون تەڭگەگە جۋىق كۇدىكتى ترانزاكسيالار تەكسەرىلىپ جاتىر.

پرەمەر-مينيستردىڭ باسشىلىعىمەن كوميسسيا 325 ميلليارد تەڭگەدەن اسا سوماعا اكتيۆتەردى مەملەكەتكە قايتارۋ تۋرالى كەلىسىمدەر مەن تالاپتاردى ماقۇلدادى، ونىڭ ىشىندە 272 ميلليارد تەڭگە تەڭگەرىمىندەگى اقشالاي قاراجات بار. ولار ماڭىزدى الەۋمەتتىك جانە ەكونوميكالىق جوبالاردى جۇزەگە اسىرۋعا باعىتتالاتىنى ايتىلدى.

سونداي-اق، ەلىمىزدەگى جانە شەتەلدەگى قۇنى 50 ميلليارد تەڭگەدەن اساتىن اكتيۆتەر مەملەكەتكە بەرىلدى. ولاردىڭ ىشىندە ءبىرقاتار ستراتەگيالىق كەن ورىندارى، مونوپوليستىك كومپانيالار، ونداعان مىڭ گەكتار جەر، سونداي-اق، ءوندىرىس وبەكتىلەرى، قوناقۇيلەر، بيزنەس ورتالىقتارى، ۆيللالار، پاتەرلەر، ءساندى كولىكتەر، زەرگەرلىك بۇيىمدار جانە تاعى باسقالارى بار.

ءتىزىلىمنىڭ كەيبىر سۋبەكتىلەرى ءوز ەركىمەن جالپى قۇنى 30 ميلليارد تەڭگە بولاتىن جوعارى تەحنولوگيالىق ينۆەستجوبالاردى جۇزەگە اسىرۋعا مىندەتتەمە العان. ولاردىڭ ىشىندە قۇبىرلار، قاپتامالار، حيميالىق، ازىق-تۇلىك جانە ت.ب. ونىمدەردى شىعاراتىن ءوندىرىس نىساندارى بار. وسىلايشا، كەمىندە 300 جاڭا جۇمىس ورنىن قۇرۋ جوسپارلانىپ وتىر، جىلدىق سالىق 1 ميلليارد تەڭگەدەن اسۋعا ءتيىس.

اكتيۆتەردى قايتارۋ پروسەسىنىڭ تاعى ءبىر ماڭىزدى بولىگى - الەۋمەتتىك جوبالاردى جۇزەگە اسىرۋ. ماسەلەن، تىزىلىمدەگى تۇلعالار ءوز ەركىمەن قىزمەتتەرىن ەرەكشە قاجەتتىلىگى بار ادامدار جانە باسقا دا الەۋمەتتىك وسال توپتار تەگىن پايدالانا الاتىن، قۇنى 5 ميلليارد تەڭگەدەن اساتىن زاماناۋي مادەني-اعارتۋ ورتالىعىن سالىنۋعا مىندەتتەمە العان.

باس پروكۋراتۋرانىڭ اكتيۆتەردى قايتارۋ جونىندەگى كوميتەتىنىڭ ماجبۇرلەپ قايتارۋ تەتىكتەرىن ىسكە اسىرۋ شەڭبەرىندە كوپتەگەن، ونىڭ ىشىندە قالاي پايدا بولعانى تۇسىنىكسىز اكتيۆتەرگە قاتىستى تالاپ قويۋلار بەرىلدى.

ولاردىڭ ءبىرى بويىنشا 11 ميلليارد اقش دوللارىنان اسا قارجىنى، سونداي-اق، 400 ميلليون تەڭگە سوماسىنا زەرگەرلىك بۇيىمدار مەن مادەني قۇندىلىقتاردى ماجبۇرلەپ قايتارۋ تۋرالى سوت شەشىمى قابىلدانىپ، كۇشىنە ەندى.

2022 جىلدان باستاپ ەكونوميكانى دەمونوپوليزاسيالاۋ شارالارىن قوسا العاندا جالپى سوماسى شامامەن 1،7 تريلليون تەڭگەنىڭ اكتيۆى، ونىڭ ىشىندە شەتەلدەن 750 ميلليون اقش دوللارى مەملەكەتكە قايتارىلدى.