ءماجىلىس وتىرىسىندا "سامۇرىق-قازىنا" ۇلتتىق ءال-اۋقات قورى ەكونوميكالىق دامۋدىڭ درايۆەرى ەمەس، كەرىسىنشە تەجەگىشى بولىپ وتىر دەگەن سىن ايتىلدى، دەپ حابارلايدى Dalanews.kz.
"باسقارۋ مەن ساتىپ الۋداعى جۇيەلىك تەڭگەرىمسىزدىكتەر جويىلمايىنشا، "سامۇرىق-قازىنا" ۇلتتىق ءال-اۋقات قورى ەكونوميكالىق دامۋدىڭ قوزعاۋشى كۇشى ەمەس، تەجەگىشى بولىپ قالا بەرەدى"، – دەدى ءماجىلىس دەپۋتاتى ءادىل ءجۇبانوۆ سارسەنبى كۇنى وتكەن وتىرىستا.
ونىڭ ايتۋىنشا، 2008 جىلى قۇرىلعان بۇل قور باستاپقىدا داعدارىسقا قارسى ساياساتتىڭ ستراتەگيالىق ينستيتۋتى ءارى ۇزاق مەرزىمدى ەكونوميكالىق ءوسۋدىڭ درايۆەرى رەتىندە جوسپارلانعان.
"الايدا ءىس جۇزىندە قوردىڭ قىزمەتى قوعامدا ەكونوميكالىق تيىمدىلىگى مەن اشىقتىعى تۇرعىسىنان سەنىمسىزدىك تۋدىرىپ وتىر"، – دەپ مالىمدەدى ءجۇبانوۆ.
دەپۋتاتتىڭ ايتۋىنشا، قور قۇرامىنداعى كومپانيالار نارىقتىق ەكونوميكاعا بەلسەندى ارالاسادى، بۇل ولاردىڭ ارتىقشىلىقتى جاعدايىمەن بايلانىستى.
"مەملەكەتتىك ساتىپ الۋدىڭ ءبىرىڭعاي ەلەكتروندىق بازاسىنىڭ مالىمەتى بويىنشا، 2024 جىلى "سامۇرىق-قازىنا" توبىنىڭ ساتىپ الۋلارىنىڭ 60%-دان استامى ءبىر كوزدەن جۇزەگە اسقان. مۇنداي تاجىريبە نارىق قاعيداتتارىنا قايشى كەلەدى جانە كوررۋپسيالىق تاۋەكەلدەرگە جول اشادى، مونوپولياعا سەبەپكەر بولادى"، – دەدى ول.
دەپۋتاتتىڭ ايتۋىنشا، 2024 جىلى قازاقستان Transparency International ۇيىمىنىڭ جەمقورلىقتى قابىلداۋ يندەكسىندە 180 ەلدىڭ ىشىندە 90-ورىندا تۇر.
ءجۇبانوۆتىڭ سوزىنە قاراعاندا، قوردىڭ نەگىزگى اكتيۆتەرى – "قازمۇنايگاز"، "قازاقستان تەمىر جولى"، KEGOC – قارجىلىق كورسەتكىشتەرىنىڭ تومەندەۋىنە جانە قارىز جۇكتەمەسىنىڭ ارتۋىنا تاپ بولعان. سونىمەن قاتار، ايقىن ترانسفورماسيا ستراتەگيالارىنىڭ جوقتىعى دا سىنعا ىلىككەن.
ول "سامۇرىق-قازىنانى" باسەكەگە قابىلەتتى ەكونوميكانى دامىتۋعا باعىتتالعان، جەكە سەكتور ءۇشىن تارتىمدى پلاتفورما رەتىندە قايتا قۇرۋدى ۇسىندى.
