سالىنىپ جاتقان مەترو ستانسيالارىن ارالاۋ كەزىندە قالا اكىمىنە قۇرال-جابدىقتاردى جەتكىزۋ، قۇرىلىس جانە ارلەۋ جۇمىستارىنىڭ جاعدايى تۋرالى باياندالدى. «سارىارقا» مەن «دوستىق» ستانسيالارىنىڭ دايىندىعى 80%-دان اسادى. باقىتجان ساعىنتايەۆ مەترو قۇرىلىسىن بەلگىلەنگەن مەرزىمدە اياقتالۋىنا باقىلاۋدى كۇشەيتۋدى جانە قوسىمشا جۇمىس كۇشىن جۇمىلدىرۋ قاجەتتىگىنە نازار اۋداردى.
مەترونىڭ باسقا نىسانى – قالقامان ستانسياسىندا ءمونتاجدى-ششيتتى قازۋ جۇمىستارى دايىن جانە ءۇشىنشى ىسكە قوسۋ كەشەنى تۋننەلىندەگى جۇمىستار قارقىندى جۇرۋدە. مەگاپوليس اكىمى باقىتجان ساعىنتايەۆ ياسساۋي كوشەسىنەن ناۋرىزباي داڭعىلىنىڭ اكىمشىلىك ورتالىعىنا دەيىن ۇزاراتىن اباي داڭعىلىنداعى جول جامىلعىلارىن توسەۋدى جىلدامداتۋدى تاپسىردى.
الماتىنىڭ نەگىزگى ارتەريالارىنىڭ ءبىرى – اباي داڭعىلىن ۇڭگىلەۋ جۇمىستارى 70%-عا ورىندالدى. باقىتجان ساعىنتايەۆ اعىمداعى جىلدىڭ سوڭىنا دەيىن داڭعىلدا كولىك قوزعالىسىن اشۋدى مىندەت ەتىپ قويدى. جاڭارعان اباي داڭعىلى رايىمبەك داڭعىلىمەن ءتۇيىسىپ، الاتاۋ كوشەسىنە شىعادى. ءقازىر الاتاۋ كوشەسىندە اسفالتتىڭ جوعارعى قاباتىن توسەۋ، تروتۋار مەن ۆەلوسيپەد جولدارىنا جارىق جۇيەسىن ورناتۋ، اباتتاندىرۋ جۇمىستارى جۇرۋدە. نىسان شامامەن 80%-عا دايىن. جۇمىستى تولىق اياقتاۋ كۇزگە جوسپارلانعان.
قالا اكىمى شۇعىلا شاعىن اۋدانىنداعى «Aلما سيتي» تك-نىڭ قۇرىلىس بارىسىن قاراپ شىقتى. «نۇرلى جەر» مەملەكەتتىك باعدارلاماسى اياسىندا مۇندا 3788 پاتەرلى 128 ءۇي سالىنادى. ولاردى حالىقتىڭ الەۋمەتتىك وسال توپتارى مەن كوپبالالى انالارعا بولەتىن بولادى. بۇدان وزگە، جۇمىس ىستەيتىن جاستارعا جالعا جانە نەسيەگە بەرىلەتىن باسپانا ۇسىنىلادى. باقىتجان ساعىنتايەۆ قۇرىلىس جۇرگىزۋشىنىڭ نازارىن سالىنىپ جاتقان ۇيلەردىڭ ساپالى ءارى قاسبەتتەرىنىڭ زاماناۋي قالا تالاپتارىنا ساي بولۋىنا اۋداردى.
مەگاپوليس اكىمىنە قالانىڭ وسى بولىگىن دامىتۋدىڭ الدىن الا جاسالعان جوسپارى دا كورسەتىلدى. كەشەندى جوسپار بويىنشا ءارقايسىسى 1200 ورىندى ءۇش مەكتەپ، سونداي-اق بالاباقشا مەن سوسو ورنالاساتىن نىساندار سالۋ دا قاراستىرىلعان. باقىتجان ساعىنتايەۆ تۇرعىندار بوس ۋاقىتتارىن وتكىزەتىن ساياباق اۋماقتارى مەن سكۆەرلەردىڭ ورىندارىن بەلگىلەۋدى تاپسىردى.
ناۋرىزباي اۋدانىنداعى قونايەۆ كوشەسى بويىنداعى ياسساۋي كوشەسىنەن ءاشىموۆ كوشەسىنە دەيىنگى ۋچاسكەسى رەكونسترۋكسيالانۋدا. وسى ۋچاسكە ارقىلى جاندوسوۆ كوشەسىنەن قالادان شىعۋعا بولادى. رەكونسترۋكسيا تار كوشەنى كەڭەيتەدى ءارى تروتۋارى مەن ۆەلوسيپەد جولدارى بار ءتورت جولاقتى جول سالىنادى. كولىك قوزعالىسى ءۇشىن ونى كۇزدە اشۋ جوسپارلانۋدا.
باقىتجان ساعىنتايەۆ تاۋسامالى، اقجار، قۇرامىستاعى ينجەنەرلىك جەلىلەردىڭ قۇرىلىسىن، تاستىبۇلاق شاعىن اۋدانىنداعى جولدى قالپىنا كەلتىرۋ جۇمىسىن تاعى ءبىر رەت قاراپ شىقتى. سوڭعى شاعىن اۋدان تۇرعىندارى جۇمىس ساپاسىنا قاتىستى ايتقان وتىنىشتەرىنە دەر كەزىندە نازار اۋدارعانى ءۇشىن العىستارىن ءبىلدىردى. قالا اكىمى جەرگىلىكتى تۇرعىنداردى بەلسەندىلىك تانىتۋعا جانە مەردىگەردىڭ ساپاسىز جۇمىسىنا ەسكەرتۋ جاساۋعا شاقىردى.
بۇدان وزگە، باقىتجان ساعىنتايەۆ قارعالى وزەنى بويىنداعى سۋ دايىنداۋ ستانسياسىنىڭ قۇرىلىس بارىسىن تەكسەردى. جوبانىڭ مەردىگەرى بارلىق قاجەتتى قۇرال-جابدىقتاردىڭ الىنعانىن، نىساندى جىل سوڭىنا دەيىن پايدالانۋعا بەرۋدى جوسپارلاعاندارىن باياندادى.
جالپى، اقجار، شۇعىلا، تاستىبۇلاق، تاۋجولى، جايلاۋ، قارعالى، قۇرامىس شاعىن اۋداندارىندا 122 شاقىرىم سۋ قۇبىرى مەن 85 شاقىرىم كارىز جەلىلەرى سالىنۋدا. جۇمىس تولىق اياقتالعاننان كەيىن، ونىڭ ىشىندە قارعالى ءسۇزۋ ستانساسىنىڭ قۇرىلىسى بىتكەن سوڭ، اۋداننىڭ 70 مىڭ تۇرعىنى تازا اۋىز سۋمەن قامتاماسىز ەتىلەتىن بولادى.
الماتى اكىمى «بيۋدجەتكە قاتىسۋ» جوباسى اياسىندا قالقامان جانە قۇرامىس شاعىن اۋداندارىنىڭ تۇرعىندارى تاڭداعان بالالاردىڭ ويىن الاڭدارى، سپورت جانە ۆوركاۋت الاڭدارى سالىناتىن جوبالارمەن تانىستى. ب. ساعىنتايەۆ اقجار شاعىن اۋدانىنداعى جاندوسوۆ كوشەسى بويىندا سالىنىپ جاتقان جاياۋ جۇرگىنشىلەر ايماعىن دا قاراپ شىقتى.
