ءىس-شارا ەلباسى كىتاپحاناسىنىڭ «قازاقستان جولى» جوباسىنىڭ اياسىندا ءوتتى، ونىڭ نەگىزگى يدەياسى بولاشاقتىڭ قوعامىن قۇرۋدىڭ سەرپىندى پروسەسى رەتىندە 30 جىل بويى ەلىمىزدىڭ وڭىرلەرى مەن قالالارىنىڭ دامۋىن پانورامالىق كەلبەتىن كورسەتۋ بولىپ تابىلادى.
قوناقتاردى جىلى قارسى العان ەلباسى كىتاپحاناسىنىڭ ديرەكتورى باقىتجان تەمىربولات: «تاۋەلسىزدىك كۇنى قارساڭىندا تاۋەلسىزدىك بەسىگى – الماتى قالاسىنا ارنالعان كورمەنى اشۋىمىزدىڭ سيمۆولدىق ءمانى وتە زور. وسىدان تۋرا 30 جىل بۇرىن، 1991 جىلعى جەلتوقساندا مەملەكەتىمىزدىڭ ەگەمەندىگىنىڭ نەگىزىن قالاعان تاريحي وقيعالار ورىن الدى، 1ء-شى جەلتوقساندا بۇكىلحالىقتىق پرەزيدەنت سايلاۋى، 10-شى جەلتوقساندا مەملەكەت باسشىسىنىڭ رەسمي ۇلىقتاۋ ءراسىمى ءوتتى جانە 16-شى جەلتوقساندا قازاقستان تاۋەلسىزدىگى رەسمي جاريالاندى»، - دەدى.
2015 جىلى ن.ءا. نازاربايەۆ «الماتى كوكتەمى» ءىس-شاراسىندا سويلەگەن سوزىندە: «الماتى-ماڭگىلىك كوكتەم قالاسى، ورتالىق ازيانىڭ ءىنجۋ-مارجانى... بۇل مەگاپوليس – قازاقستان تاۋەلسىزدىگىنىڭ «التىن بەسىگى»، رەسپۋبليكامىزدىڭ جاڭا تاريحى باستالعان قاسيەتتى مەكەن بولىپ تابىلادى» دەگەن ەدى.
«ءبىزدىڭ تاۋەلسىزدىگىمىز الماتىدا جاريالاندى. سوندىقتان بۇل قالانىڭ تاريحي ءرولى ەرەكشە. ءقازىر الماتى – ءبىزدىڭ ەكونوميكامىزدىڭ باستى قوزعاۋشى كۇشى»، - دەپ اتاپ ءوتتى مەملەكەت باسشىسى ق.-ج. توقايەۆ.
«الماتى – تاۋەلسىزدىكتىڭ التىن بەسىگى» كورمەسىنىڭ نەگىزگى ماقساتى – الماتى قالاسىنىڭ ارحيۆتىك قۇجاتتاردى، فوتوسۋرەتتەردى، مۇراعاتتار مەن مۋزەيلەر جيناقتارى مەن ەلباسى كىتاپحاناسىنىڭ ەكسپوناتتارىن كورسەتۋ ارقىلى الماتى قالاسىنىڭ تاۋەلسىز قازاقستان تاعدىرىنداعى ورنى مەن ءرولىن كورسەتۋ.
الماتى اكىمى باقىتجان ساعىنتايەۆ ۇسىنىلعان ەكسپوزيسيالار مەگاپوليستىڭ تاۋەلسىزدىكتىڭ وتىز جىلىنداعى جەتىستىكتەرىنە ارنالعانىن اتاپ ءوتتى.
– تاۋەلسىزدىك جىلدارىندا الماتى ەكونوميكاسى 1993 جىلعى 2،1 ملرد تەڭگەدەن 2020 جىلى 13،5 ترلن تەڭگەگە دەيىن، ال جان باسىنا شاققانداعى ءجوو 342،5 اقش دوللارىنان 16،7 مىڭ اقش دوللارىنا دەيىن ءوستى. حالىق سانى 1،8 ەسەگە ارتتى؛ 1991 جىلعى 1 134 مىڭ ادامنان 2021 جىلى 2 ميلليوننان استام ادامعا دەيىن. تاۋەلسىز قازاقستان دامۋىنىڭ جاڭا كەزەڭىندە قالا ەلىمىزدىڭ عىلىمي، ءبىلىم بەرۋ، زياتكەرلىك ورتالىعى بولىپ قالا بەرەدى جانە ءبىزدىڭ ۇلتىمىزدىڭ بىرەگەيلىگىنىڭ ايقىن كورىنىسى بولىپ تابىلادى، – دەدى باقىتجان ساعىنتايەۆ.
«الماتى – تاۋەلسىزدىكتىڭ التىن بەسىگى» كورمەسى ءۇش ەكسپوزيسيادان تۇرادى:
- «تاۋەلسىزدىكتىڭ باستاۋى» - بۇل 1986 جىلعى جەلتوقسان وقيعاسى، 1991-1997 جىلعى وقيعالار حرونيكاسى، سونداي-اق الماتى قالاسىندا قابىلدانعان ماڭىزدى تاريحي شەشىمدەر.
- «قازاقستاندىق جول: الماتىنىڭ 30 جىلداعى جەتىستىكتەرى» – مەگاپوليستىڭ تاۋەلسىزدىك جىلدارىنداعى الەۋمەتتىك، ەكونوميكالىق، مادەني سالالارداعى، سونداي-اق سپورتتاعى نەگىزگى جەتىستىكتەرى تۋرالى ماتەريالداردى كورسەتەدى. كورەرمەندەرگە ينتەراكتيۆتى تۇردە قالانىڭ الەمدىك مادەنيەت پەن وركەنيەتكە قوسقان ۇلەسى تۋرالى الماتى قالاسىندا 1991-2021 جىلدارى بولعان 30 ماڭىزدى وقيعامەن تانىسۋ مۇمكىندىگى ۇسىنىلدى.
- «ءبىزدىڭ بولاشاعىمىز: الماتى – 2050 ستراتەگياسى» - بولىمىندە الماتىنىڭ ۇزاق مەرزىمدى دامۋىنىڭ باستى باعدارلارى مەن ستراتەگيالىق باسىمدىقتارى ايشىقتالعان: الماتى – شەتسىز قالا؛ «اقىلدى» قالا؛ تەڭ مۇمكىندىكتەر قالاسى؛ ءقاۋىپسىز قالا؛ جاسىل قالا؛ جاھاندىق ىسكەرلىك ورتالىق؛ مادەني، كرەاتيۆتى قالا.
كورمە قازاقستان رەسپۋبليكاسىنىڭ تۇڭعىش پرەزيدەنتى – ەلباسى كىتاپحاناسىنىڭ مۋزەيىندە 2022 جىلعى 28 قاڭتارعا دەيىن جۇمىس ىستەيتىن بولادى، مەكەنجايى: بەيبىتشىلىك كوشەسى، 11.
