ٶمٸردەن وزعان انامنىڭ قايتپايتىنىن تٷسٸنەمٸن, دەگەنمەن جٷرەگٸڭ قولتاڭسىپ, كٶڭٸلٸڭ قوبالجىپ, جانىڭ جابىرقاپ تۇرادى. جان سارايىڭ بوس قالعانداي كٷي كەشەدٸ ەكەنسٸڭ. اناشىم جانىمدا جٷرگەندە قايتىپ كٶرە المايتىنىمدى ويلاماپپىن, بەلكٸم قۇنتتاماعان بولارمىن. ەندٸ مٸنە, اۋىلعا كەلسەم ەردايىم كٷلٸمسٸرەپ قارسى الاتىن انامنىڭ ەدەبٸن ەشكٸم ورىنداي المايتىنىنا كٶز جەتكٸزدٸم. اناما تەن مەيٸرٸم مەن ىستىق ىقىلاس ٶزٸمەن بٸرگە ٸلەسٸپ كەتكەندەي...
انامنىڭ شەكسٸز مەيٸرٸمٸ, كەنەن پەيٸلٸ, اقىل-پاراساتى جەنە ٸسكەرلٸگٸ انالار قۇدٸرەتٸنٸڭ ەتالونى ٸسپەتتٸ سيمۆولعا اينالعانداي. ەتتەڭ, اعايىن-تۋىستى باۋراپ الاتىن كەڭ پەيٸلٸڭ, ۇرپاقتارىڭدى ايالاعان نۇرلى جٷرەگٸڭ - جەردٸڭ تارتۋ كٷشٸندەي قۋاتتى ەدٸ. ەتتەڭ, ارداقتى انا, سٸزدٸڭ قۇدٸرەتتٸ قۋاتىڭىزدان نەر العان ۇرپاقتارىڭىز ٷشٸن تٸرلٸكتەگٸ ورنىڭىز ويسىراپ تۇر.
ٶمٸردەن وزعانىنا بٸر جىل بولسا دا, انام مەنٸمەن ٷنەمٸ بٸرگە جٷرگەندەي. قازاقى پايىمدا, ادام و دٷنيەگە اتتانعان سوڭ, ونىڭ رۋحى بۇ دٷنيەدەگٸ جاقىندارىن جەلەپ-جەبەپ جٷرەدٸ دەگەن تٷسٸنٸك بار. مٷمكٸن, انام الىپ اعاش «ەۋليەاعاشتاي» بالالارىن پاناسىنا الىپ جٷرگەندەي ەلەستەيدٸ. انا مەن بالا اراسىنداعى جٸپسٸز بايلانىس, مٷمكٸن, مەڭگٸ بولار. ەلٸ كٷنگە, قۋانىشتى سەتتەرٸمدە بالاشا قۋانىپ, قينالعان تۇستارىمدا جانى اشىپ مەنٸ قولداپ جٷرگەندەي سەزٸنەمٸن. كٶزگە كٶرٸنبەيدٸ, دەگەنمەن تٷيسٸك سونى مەڭزەيدٸ. اللانىڭ ادامزاتتى ۇلى مەيٸرٸممەن جاراتقانى حاق بولسا, بالالارىن دا مەيٸرٸممەن دٷنيەگە ەكەلگەن انامنىڭ رۋحى مەن ٷشٸن مەڭگٸلٸك.
انامنىڭ دٷنيەدەن ٶتۋٸ ماعان ٷلكەن وي سالدى. مەن ەر جاسى ەلۋدەن اسسام دا, ماعان اقىل ايتۋدان ەستە جالىقپادى, ەسٸرەسە, قاتقىل مٸنەزٸمدٸ – كەشٸرٸممەن قاراۋعا باعىتتاپ وتىراتىن. ەرەكشە جان ەدٸ. اسىرا ماقتاعانىم ەمەس, «جاقۇت جان» دەگەن اتقا ساي مىقتى جان بولاتىن. تٸرشٸلٸگٸندە انام تۋرالى تولعاۋىمدا, ماقالا تاقىرىبىن «جاقۇت جان» دەپ اتاعان ەدٸم. ەلبەتتە, ۇرپاق جالعاسىن سومداعان, شەكسٸز مەيٸرٸمٸمەن ەۋلەتتٸڭ يگٸلٸگٸن يدٸرگەن, قالتقىسىز قىزمەتٸمەن قوعام قۇرمەتٸنە بٶلەنگەن, مەنٸڭ انام, شىنىمەن دە, كٶزگە وتتاي باسىلاتىن جاقۇت جان ەدٸ.
انام سانالى عۇمىرىنىڭ 40 جىلدان استامىن كٷش-جٸگەرٸ مەن بار بٸلٸمٸن سارقا وتىرىپ, جاس ۇرپاقتى تەربيەلەۋگە ارناعان تەلٸمگەر-ۇستاز. ناعىز ۇستاز بولدى. انامنىڭ تەربيەشٸ-تەلٸمگەر بولۋى ماماندىق بولسا, ۇستازدىق ەتۋٸ جاراتىلىسىنان بويىنا دارىعان قۇدٸرەتتٸ قاسيەت ەدٸ. ۇستازدىق قۇدٸرەتٸ قانداي ەدٸ! سول قۇدٸرەتتٸ كٷشپەن ٶز قۇرساعىنان شىققان بالالارى مەن بالاباقشا بٷلدٸرشٸندەرٸنٸڭ تالاپتارىنا مۇقالماس جٸگەر بەرٸپ, ٶمٸرلەرٸنە ٶزەك بولار ەدەپ-ەدەتتٸ بويلارىنا دارىتا بٸلدٸ.
ٶمٸرگە ون ەكٸ قۇرساق ەكەلٸپ, ون بالاسىن ادام قاتارىنا قوستى. تٶرەحانوۆتار ەۋلەتٸنٸڭ قارا شاڭىراعىنداعى ىنتىماق-ىرىستى جاراستىرىپ, بالالارىنىڭ جەنە نەمەرە-شٶبەرەلەرٸنٸڭ اجىراماس بٸرلٸگٸن كٷيتتەدٸ. ٶنەگە-تەربيەسٸمەن بٸزدەرگە قيىندىقپەن كٷرەسۋدٸڭ وزىق ٷلگٸسٸن, اۋىرتپالىقتى جەڭٸپ شىعۋدىڭ ايشىقتى جولىن كٶرسەتتٸ. وسىنداي اقىل-جٸگەرٸ مول, پاراساتتى انادان تۋعانىمدى ماقتان تۇتامىن.
انا دەگەن جاراتۋشى قۇدٸرەتكە تەن بار اسىل قاسيەتتەر انامنىڭ بويىندا بار ەدٸ. ەڭ كەرەمەتٸ - قۇداي قوسقان قوساعى ەكەمٸزدٸڭ دە, اللا بەرگەن بالالارىنىڭ دا نە قالايتىنىن ايتپاي-اق تٷسٸنەتٸن جەنە ايتقىزباي ٸستەيتٸن ەدٸ. ەرينە, ەلەمدەگٸ اسىل انالاردىڭ ورنىنا مەنٸڭ انام جٷرە الاتىنىنا كەمٸل سەنەمٸن. ال انامنىڭ ورنىنا كٸم جٷرەدٸ? ەشكٸم دە جٷرە المايدى! بٸر كەم دٷنيە!
ارتىندا وتاعاسى, ۇرپاقتارى, ٶزٸن قۇرمەت تۇتقان ەل-جۇرتى قالدى. شٷكٸر! وسى قالىڭ قاۋىم ٷنەمٸ دۇعالارىنان تاستاماي جٷرەتٸنٸ كٶڭٸلگە دەمەۋ!
ەتتەڭ ... سەكسەننٸڭ سەڭگٸرٸنە جەتٸپ, گاۋھار تويدىڭ تٶرٸندە وتىرسام دەگەن ارمان ٷدەسٸنە جەتە المادى.
ارداقتى انا جاتقان جەرٸڭ جەنناتتىڭ تٶرٸ بولعاي!
ايبىن ەدەپحانۇلى تٶرەحانوۆ
