اۋقىمدى شاراعا ق ر پارلامەنتى، ق ر كونستيتۋسيالىق سوتى، ق ر جوعارعى سوتى، ق ر ەكولوگيا جانە تابيعي رەسۋرستار مينيسترلىگى، ق ر اۋىل شارۋاشىلىعى مينيسترلىگى، ەڭبەك جانە حالىقتى الەۋمەتتىك قورعاۋ مينيسترلىگى، الماتى قالاسى مامانداندىرىلعان تابيعات قورعاۋ پروكۋراتۋراسى وكىلدەرى، بەلگىلى قازاقستاندىق زاڭگەرلەر جانە رەسەي، ەستونيا، پولشا، وزبەكستان عالىمدارى، وقىتۋشى-پروفەسسورلار مەن ءبىلىم الۋشى جاستار قاتىستى.
جيىننىڭ اشىلۋىندا ءال-فارابي اتىنداعى قازۇۋ-دىڭ باسقارما ءتوراعاسى – رەكتورى جانسەيىت تۇيمەبايەۆتىڭ قۇتتىقتاۋ ءسوزى وقىلدى.
«ساعىندىق بايسالوۆتىڭ شيرەك عاسىر بۇرىن ەلىمىزدىڭ ەكولوگيالىق احۋالى، سۋ ماسەلەسىن كوتەرگەن پروبلەمالارى ءالى دە وزەكتىلىگىن جويعان جوق. مەملەكەت باسشىسى قاسىم-جومارت توقايەۆ بۇگىندە «جاسىل ەكونوميكا» يدەياسىن ۇستانىپ، ەكونوميكانى كوگالداندىرۋ مەن قورشاعان ورتانى قورعاۋ ىسىنە ەرەكشە كوڭىل ءبولىپ وتىر. وسى ماسەلەلەردە جاڭا زاڭ جوبالارىن جاساۋشىلار ساعىندىق بايسال ۇلى نەگىزىن قالاعان زاڭ نورمالارىنا سۇيەنەتىنى انىق»، – دەلىندى حاتتا.
شارانى اشقان قازۇۋ-دىڭ باسقارما مۇشەسى – اكادەميالىق ماسەلەلەر جونىندەگى پرورەكتورى ءلاززات ەركىنبايەۆا عالىم مۇراسىن زەردەلەۋدىڭ ماڭىزىنا ءمان بەردى. قايراتكەر تۇلعانىڭ ۋنيۆەرسيتەت دامۋىنا، كاسىبي زاڭگەر مامانداردى تاربيەلەۋگە ۇلكەن ەڭبەك سىڭىرگەنىن ايتا كەلە، بىلىكتى زاڭگەر رەتىندە قازاقستاندا جەر-سۋ كودەكسىن، تابيعاتتى قورعاۋعا بايلانىستى زاڭ جوبالارىن دايىنداۋعا قاتىسقانىن اتاپ ءوتتى.
بەلگىلى زاڭگەر، پروفەسسور، قازۇۋ رەكتورىنىڭ كەڭەسشىسى ەركىن دۇيسەنوۆ ءوز سوزىندە ساعىندىق بايسالوۆتىڭ ادامگەرشىلىك قاسيەتى مەن ازاماتتىق كەلبەتىن ەسكە الدى. ءور مىنەزدى، ەڭبەكقور، ادال دا ءادىل جاننىڭ ىزگى قاسيەتتەرى كەيىنگى ۇرپاق ءۇشىن ونەگە ەكەنىن جەتكىزدى.
«ۋنيۆەرسيتەت قابىرعاسىندا ءجۇرىپ، جاستاردىڭ قامقورشىسى بولىپ، ءبىلىمدى شاكىرتتەر تاربيەلەدى. 70-تەن استام عىلىمي ەڭبەك جازىپ، وزىندىك عىلىمي مەكتەپ قالىپتاستىردى»، – دەدى ەركىن ەرمان ۇلى.
سونداي-اق كونفەرەنسيا بارىسىندا كاسپيي ۋنيۆەرسيتەتىنىڭ جەكە قۇقىق عىلىمي-زەرتتەۋ ينستيتۋتىنىڭ ديرەكتورى، اكادەميك مايدان سۇلەيمەنوۆ، د.ا.قونايەۆ اتىنداعى ەۋرازيالىق زاڭ اكادەمياسىنىڭ رەكتورى، پروفەسسور ءومىرالى جالايري جانە وزگە دە ارىپتەستەرى مەن شاكىرتتەرى ءسوز الدى. ولار ساعىندىق بايسالوۆتىڭ ەكولوگيا جانە جەر، سۋ قاتىناستارى سالاسىنداعى عىلىمي-تەوريالىق يدەيالارى مەن تۇجىرىمدامالارىن تالداپ، قازىرگى تاڭداعى ەكولوگيالىق قاۋىپسىزدىك جايىن قوزعادى. اتاپ ايتقاندا، «جاسىل قازاقستان» ۇلتتىق جوباسى شەڭبەرىندە حالىق ءۇشىن قولايلى ءومىر ءسۇرۋ ورتاسىن قۇرۋ جانە ەكولوگيالىق جاعدايدى جاقسارتۋ، سۋدى ءتيىمدى جانە ۇقىپتى پايدالانۋ، سيرەك كەزدەسەتىن جانە جويىلىپ بارا جاتقان جانۋارلار تۇرلەرى مەن يحتيوفاۋنانىڭ سانىن ۇلعايتۋ، جاسىل ەكپەلەر الاڭىن ۇلكەيتۋ، تابيعات پەن جانۋارلار دۇنيەسىنە ۇقىپتى قاراۋعا داعدىلاندىرۋ ارقىلى بيولوگيالىق ارتۇرلىلىكتى ساقتاۋ سياقتى وزەكتى ەكولوگيالىق ماسەلەلەر كەڭىنەن قاراستىرىلدى.
سونىمەن قاتار «بايسالوۆ وقۋلارى» اياسىندا ستۋدەنتتەرگە دەمەۋلىك شاكىرتاقىلار تابىستالدى. كونفەرەنسيا جۇمىسى ارى قاراي پلەنارلىق وتىرىسقا ۇلاستى.
ءال-فارابي اتىنداعى قازۇۋ-دىڭ
باسپا ءسوز قىزمەتى
