«كەزدەسۋ بارىسىندا مينيستر جۇرتشىلىقتى الاڭداتقان ساۋال - ماماندىقتار جىكتەۋىشىنە (كلاسسيفيكاتورى) توقتالدى. بۇل قۇجات 2011 جىلدان باستاپ تالقىعا ءتۇسىپ جاتقانىن ەسكە سالعان ەرلان ساعادييەۆ مينيسترلىك ماڭىزدى قۇجاتتاردى كوپشىلىك تالقىسىنا سالماي ەنگىزبەيتىنىن ايتتى. سونداي-اق بۇل ساۋال جوو رەكتورلارى كەڭەسىندە تالقىلانىپ جاتقانىن اتاپ ءوتتى»، – دەيدى باسپا ءسوز وكىلدەرى.
تاعى ءبىر اسا ماڭىزدى سۇراق، بۇل – 11-سىنىپ وقۋشىلارىن حيميا، فيزيكا، بيولوگيا پاندەرىن اعىلشىن تىلىندە وقىتۋ. «بۇل ماسەلەنى تالقىلاۋعا بولادى» دەگەن مينيستر اكادەميك عالىمدار – قازاقستاننىڭ ەڭبەك سىڭىرگەن قايراتكەرى، مەملەكەتتىك سىيلىقتىڭ يەگەرى، فيلولوگيا عىلىمىنىڭ دوكتورى سەرىك قيرابايەۆ پەن گەوگرافيا عىلىمىنىڭ دوكتورى، پروفەسسور ءاليا بەيسەنوۆامەن كەزدەسكەنىن، سوندا وسى سۇراقتى تالقىعا سالعاندارىن ايتقان.
– الەمدە تەحنيكالىق عىلىم ءبىر تىلگە كەلىپ جاتىر. وزدەرىڭىز جاقسى بىلەسىزدەر، بۇرىنىراقتا نەمىس كلاسسيكالىق اتوم مەكتەبى، فرانسۋز ۇلتتىق حيميا مەكتەبى، ورىس يادرولىق مەكتەبى بولدى. ءقازىر ولار جوق. گەرمانيادا تەحنيكالىق سالاعا گرانتتاردى اعىلشىن تىلىندە قابىلدايدى، – دەگەن ەرلان ساعادييەۆ كۇنى كەشە پەداگوگيكالىق ۇجىممەن كەزدەسكەنىن، سوندا وقۋشىلاردى جوعارى سىنىپتاردا اعىلشىن تىلىندە وقىتۋ ماسەلەسىنە توقتالعاندارىن ايتادى.
– تاياۋدا الماتى، شىمكەنت، تالدىقورعاندا مەكتەپ ديرەكتورلارى مەن مۇعالىمدەرمەن كەزدەسكەندە ولارعا اتا-انا بالاسىن جوعارى سىنىپتاردا اعىلشىن تىلىندە وقىتقىسى كەلمەسە، ءوزى شەشسىن دەگەن سۇراقتى قويعان بولاتىنبىز، الايدا، ولاردىڭ باسىم كوپشىلىگى بۇلاي ەتۋگە بولمايتىنىن ايتادى. پەداگوگتاردىڭ سوزىنشە، بۇلاي بولاتىن بولسا، وقۋشىلار اراسىندا ءوزارا ءبولىنۋ بولۋى مۇمكىن. تالانتتى نە تالانتسىز دەگەن سوزدەر تۋىنداۋى ىقتيمال. سول سەبەپتى دە بارلىعىنا بىردەي وقىتقان ءجون. ونىڭ ۇستىنە اتا-انالاردىڭ 80 پايىزى بالالارىنىڭ اعىلشىن تىلىندە ءبىلىم الۋىن قالايدى. اتا-انالاردىڭ، ۇستازداردىڭ پىكىرلەرىنە، ۇلتتىق باعدارلاماعا جۇگىنىپ وتىرمىز. ەشتەڭەنى ويدان قۇراستىرىپ وتىرعان جوقپىز. باعدارلاما 2019 جىلدان باستالادى. وعان دەيىن بارلىعىن باقىلاۋدا ۇستايمىز. ەگەر باسقا دا پىكىرلەر بولاتىن بولسا، اشىق تالقىلاۋعا دايىنبىز. مۇمكىن ۇلتتىق عىلىم اكادەمياسى جانىنان وسىنداي قوعامدىق سۇراقتاردى تالقىلاۋ ءۇشىن ورگان قۇرارمىز، – دەيدى ءبىلىم جانە عىلىم ءمينيسترى.
سونداي-اق كەزدەسۋ بارىسىندا بۇدان وزگە دە ماسەلەلەر ورتاعا سالىنىپ، عالىمدار ءسوز سويلەدى. ءومىردىڭ ءوزى قاجەت ەتىپ وتىرعان – وقۋشىلارعا ءۇش تىلدە ءبىلىم بەرۋدە، ەڭ باستىسى، قازاق تىلىنە باسىمدىق بەرىلەتىنى ايتىلعان.
