ءماجىلىس دەپۋتاتى رينات زايىتوۆ ءماجىلىس وتىرىسىندا ماڭدايشا جازۋلارى مەن داۋىستىق جارناماعا قاتىستى وزەكتى ماسەلە كوتەرىپ، جاۋاپتى ورگاندارعا ساۋال جولدادى، دەپ حابارلايدى Dalanews.kz.
ونىڭ ايتۋىنشا، رەسپۋبليكالىق ماڭىزى بار قالالار – شەتەلدىك تۋريستەر كوپتەپ كەلەتىن ورتالىقتار. دەگەنمەن ءقازىر كوشەدەگى ماڭدايشا جازۋلار ءۇش ءتۇرلى الىپبيدە بەرىلەدى.
"ءقازىر مينيماليزم زامانى. كيريلليسانى ەكىنىڭ ءبىرى ءتۇسىنىپ جاتقان جوق. سوندىقتان كەم دەگەندە مەملەكەتتىك ەمەس مەكەمەلەردىڭ ماڭدايشا جازۋلارىن ديزاين كودقا سايكەس تەك لاتىن الىپبيىمەن راسىمدەۋگە رۇقسات بەرۋ كەرەك. وسى ماسەلەگە ۇكىمەت قانداي كوزقاراس بىلدىرەدى؟" – دەپ سۇرادى دەپۋتات ساۋدا جانە ينتەگراسيا ءمينيسترى سەرىك جۇمانعاريننەن.
سونىمەن قاتار دەپۋتات استانا مەن الماتى قالالارىنىڭ اكىمدىكتەرىنە داۋىستىق جارناماعا قاتىستى ۇسىنىلىپ جاتقان شەكتەۋلەر تۋرالى ساۋال جولدادى.
"سىزدەر داۋىستىق جارنامانى توقتاتامىز دەپ جاتىرسىزدار. بۇل قالاي جۇزەگە اسپاق؟ مىسالى، "التىن وردا" بازارىندا ءمۇقاعاليدىڭ ولەڭدەرىن وقىپ، كىتاپ ساتاتىن اعامىز بار. ونى كورۋ ءۇشىن ارنايى باراتىن ادامدار بار. ول نەگە جازىقتى؟ نەمەسە استانادا ءشامشىنىڭ اندەرىن شىرقايتىن ءبىر اپامىز بار. الاتاۋ تەاترىنىڭ 'قازاقشا تەراپيا' ۇجىمى بار. ولاردىڭ قىمبات بيلبوردتارعا جارناما جاساۋعا مۇمكىندىكتەرى جوق. سوندىقتان دومبىرالارىن الىپ، مەترونىڭ ىشىندە ءان شىرقاپ، ونەرلەرىن پاش ەتەدى.
بۇل جارنامانىڭ ەرەكشە ءارى ادەمى ءتۇرى. ەندى ولاردىڭ بارىنە ايىپپۇل سالاسىزدار ما؟ ولاردىڭ جاعدايى نە بولماق؟" – دەدى زايىتوۆ.
