رەسەي پروپاگانداسى "ءتىل ءپاترۋلىنىڭ" مۇشەسى دەپ اتاعان قۇزايىروۆ ريددەردەگى جار دەگەندەگى جالعىز قازاق مەكتەبىنىڭ جابىلماۋىن تالاپ ەتكەن ەدى. وسى ارىز-شاعىمنىڭ نەگىزىندە اكىمدىككە بارعان بەلسەندىنى رەسمي تىلدە سويلەيتىن قىزمەتكەرلەر قارسى العان.
مەملەكەتتىك ءتىلدىڭ تابانعا تاپتالىپ جاتقانىنا قىنجىلعان قۇزايىروۆ بولعان جايدى ۆيدەوعا ءتۇسىرىپ، جۇرتشىلىققا جاريا ەتكەن بولاتىن.
ريددەردى مەمتىلدىڭ مۇشكىل جاعدايى ءقازاقتىلدى ورتادا قىزۋ تالقىلانىپ، قوعامدىق رەزونانس تۋدىردى. كەيىننەن ەلىمىزدەگى رەسەيشىل كۇشتەردىڭ قىسىمىمەن قۇزايىروۆتىڭ ۇستىنەن قىلمىستىق ءىس قوزعالعانى ءمالىم بولدى.
وسىعاي بايلانىستى youtube ارناسىندا ۇندەۋ جاريالاعان ءتىل جاناشىرى داۋدىڭ باسى مەملەكەتتىك قۇرىلىمداردا قازاق ءتىلىنىڭ كەنجە قالۋىنان تۋىنداعانىن ايتىپتى.
"قازاق ءتىلى قاشان دا ءوسىپ، وركەندەۋى كەرەك دەپ ەسەپتەيمىن. ونى مەملەكەتتىك قىزمەتكەرلەر ءبىلۋى مىندەتتى. اكىمدىككە "شاڭىراق" مەكتەبىنىڭ ماسەلەسى بويىنشا باردىق. مەملەكەتتىك ورگاندار الدىندا وسى ماسەلەنى كوتەرىپ، مەملەكەتتىك تىلدە سويلەدىك. سول كەزدە اكىمدىك قىزمەتكەرلەردىڭ كوپشىلىگى قازاق ءتىلىن مۇلدە مەڭگەرمەگەنى انىقتالدى. سوعان اشۋ-ىزامىز كەلدى»، - دەيدى قۇزايىروۆ.
داۋلى ۆيدەودا باس جارىلىپ، كوز شىعارداي ورەسكەل ارەكەتكە بارماعان قۇزايىروۆ ايتسە دە، وسى ارەكەتى ءۇشىن اكىمدىك قىزمەتكەرلەرىنەن كەشىرىم سۇراپتى.
بەلسەندى اكىمدىككە كىرۋدىڭ تالاپتارىن ەسكەرمەگەنىن، ەموسياعا ەرىك بەرگەنىن ايتادى.
"مەملەكەتتىك ورگاندار قىزمەتكەرلەرىنە قولايسىزدىق تۋعىزىپ، ولاردىڭ جۇمىسىنا كەدەرگى كەلتىرگەنىم ءۇشىن كەشىرىم سۇرايمىن. ولار (اكىمدىك قىزمەتكەرلەرى) تاراپىنان ءدال سونداي ادەكۆاتتى جانە ءدال وسىنداي رەاكسيا بولار دەپ ءۇمىت ەتەمىن. ال جازىلۋشىلاردان الاڭداماۋدى جانە ادامداردىڭ ۇلتىنا نازار اۋدارماۋدى سۇرايمىن، سەبەبى ءبىز ءبارىمىز قاي ۇلت بولساق تا - قازاقستاندىقپىز، - دەگەن ەكەن ءسوزىنىڭ سوڭىندا قۇزايىروۆ.
DALA INSIDE تەلەگرام ارناسىنىڭ پايىمداۋىنشا ءتىل جاناشارىن كەشىرىم سۇراۋعا ءماجبۇر ەتكەن بولۋى مۇمكىن. بۇعان دەيىن ءورىستىلدى اقپارات قۇرالدارى ريددەر اكىمدىگىنىڭ ءتورت قىزمەتكەرى قۇزايىروۆتىڭ ۇستىنەن ارىز جازعانىن حابارلاعان. مۇنى ىشكى ىستەر ءمينيسترىنىڭ ورىنباسارى مارات قوجايەۆ راستاعان بولاتىن.
ال ماجىلىسمەن ەرمۇرات باپي دياس قۇزايىروۆتى قولداۋ جونىندە بۇگىن ءبىر توپ دەپۋتات ارنايى مالىمدەمە قابىلداعانىن، ءماتىنى بۇگىن جاريالاناتىنىن ايتتى.
