رۋزا نەگە جالعىز?

امال جوق جەككٶرٸنٸشتٸ بولاسىڭ. مىڭمەن جالعىز الىسۋ وڭاي ما? 

تٸل مايدانىنداعى جالعىز جاۋىنگەر دəل قازٸر - رۋزا بەيسەنبايتەگٸ. جوق, راس. تٸل ٷشٸن كٷرەستە دəل سول سيياقتى جانكەشتٸلٸك تانىتىپ جٷرگەندەر از. جوقتىڭ قاسى, تٸپتٸ. 

نەگە جانكەشتٸ? سٸز, مىسالعا سٸز كوندۋكتور قازاقشا سٶيلەمەگەنٸ ٷشٸن تراۆمايدى توقتاتار ما ەدٸڭٸز? تٸل ٷشٸن تەمٸر رەلستٸڭ استىنا تٷسۋگە جٷرەگٸڭٸز داۋالار ما ەدٸ? 

ترامۆاي تٷك ەمەس, پويىزدى شە?

ەسٸگٸنەن «گوۆوريتە پو رۋسسكيي» دەپ قارسى الاتىندارعا قارسى اشتىق جارييالاۋعا  كەرەك دەسەڭٸزدەر, "ٶزٸمنٸڭ ٶلٸمٸم ارقىلى بٷكٸل دٷنيە جٷزٸنە مارگينال, قۇبىجىق قازاق بيلٸگٸن كٶرسەتٸپ, قازاق تٸلٸنە حالىقارالىق اراشا سۇراۋعا" (رۋزانىڭ ٶز سٶزٸ), اشتىق جارييالاۋعا بارا الار ما ەدٸڭٸز?

رۋزا جانكەشتٸ سول سەبەپتٸ. تٸل مايدانىندا شىن كٷرەسٸپ جٷرگەن جالعىز جاۋىنگەر. بۇل ٷشٸن اقى المايدى. كٶزالداۋ دا ەمەس مۇنىسى. ۇپاي جيناۋ دا ەمەس. كٶرگەنبٸز. كٶزٸمٸز جەتكەن. ول تازا جانكەشتٸ.

تٶزۋدەن شارشاعان. كٷتۋدەن شارشاعان سەبەبٸ. تٶزگەننەن, كٷتكەننەن تٸلدٸڭ تاعدىرى وڭالماسىن تٷسٸنگەن ول. كٷرەسۋگە بەل بايلاعان سوسىن. وسىنداي جولمەن.

بۇل قانداي جول?  بəلكٸم بٸرەۋگە تىم تۇرپايى, تىم راديكالدى كٶرٸنەر. انىعى, ورىندى.

رۋزانىڭ وسى كٷنگە دەيٸنگٸ تٸلگە قاتىستى تالاپتارىنىڭ بارلىعى زاڭدى.

ەڭ الدىمەن اقىلعا سييادى, اقىماقشىلىق ەمەس. مەملەكەتتٸك تٸلدە سٶيلەۋدٸ تالاپ ەتۋ ارانداتۋ ەمەس ٶيتكەنٸ. 

سول رۋزا جالعىز. رۋزا نەگە جالعىز? كٷللٸ كەرەكۋدە رۋزانىڭ بٸر جاعىنا شىعىساتىندار جوق پا سوندا?  

كەرەكۋدٸڭ زييالىلارى قايدا? كەرەكۋدٸڭ اقىن -جازۋشىلارى قايدا? 

رۋزا كٶرگەندٸ ولار نەگە كٶرمەيدٸ? رۋزا ايتقاندى ولار نەگە ايتپايدى? 

جارايدى كٶرمەي-اق قويسىن, ايتپاي-اق قويسىن. بٸراق قىسىلتاياڭعا تاپ بولعاندا رۋزا نەگە əلەۋمەتتٸك جەلٸدەگٸ جۇرتتان اراشا سۇراۋى كەرەك?

رۋزا ترامۆايدىڭ تابانىندا تاپتالا جازداعاندا ولار قايدا بولدى? رۋزا پۋتينشٸلدەرمەن, جٸكشٸلدەرمەن يت تارتىسقا تٷسكەندە نەگە جانىنان تابىلعان جوق? قازاق زييالىسىنىڭ بٸر مٷددەسٸ, بəلكٸم بٸر پارىزى تٸلدٸ قورعاۋ ەدٸ عوي. 

تٸلدٸڭ تابانعا تاپتالۋىنا تٶزبەۋشٸلٸك تانىتقان رۋزاعا دەمەۋ بولۋعا نەگە جارامادى ولار?

تٷسٸنگەنٸمٸز, دەل وسى كەرەكۋدە تٸل ٷشٸن دəل وسى – رۋزا سيياقتى كٷرەسۋ كەرەك. تٶزٸمدٸلٸكتەن تٶزبەۋشٸلٸككە. تٸلٸڭنٸڭ قۇقىعى بۇزىلسا ايتۋعا. الىسۋعا. سوتتاسۋعا. تٸل تۋرالى تالابىڭنىڭ əدٸل, ودان بۇرىن زاڭدى ەكەنٸن دəلەلدەۋگە. كەرەكۋ ٶزگەرمەيدٸ əيتپەسە...

دۋمان بىقاي