سەسسياعا وبلىس اكىمى، جامبىل وبلىسى قازاقستان حالقى اسسامبلەياسىنىڭ ءتوراعاسى كارىم كوكىرەكبايەۆ قاتىسىپ، بايانداما جاسادى. ءوڭىر باسشىسى ەلوردامىز – استانا قالاسىندا ەلباسىنىڭ توراعالىعىمەن وتكەن قازاقستان حالقى اسسامبلەياسىنىڭ كەزەكتى ححV سەسسياسىندا كوتەرىلگەن ماسەلەلەردىڭ ءمان-ماڭىزىنا توقتالدى. «جاڭعىرۋدىڭ نەگىزى – تۇراقتىلىق، بىرلىك، كەلىسىم» تاقىرىبىن وزەك ەتكەن سەسسيانىڭ ەلدىڭ ساياسي-ەكونوميكالىق، مادەني-رۋحاني ومىرىنە تاعى دا ءبىر سەرپىلىس اكەلگەنىن قوزعادى. پرەزيدەنت اتاپ كورسەتكەندەي، اسسامبلەيا قىزمەتىن جاڭا ساپالىق دەڭگەيگە كوتەرۋ قاجەتتىگىن ايتىپ ءوتتى.
– سەسسيادا سويلەگەن سوزىندە مەملەكەت باسشىسى قازاقستان حالقى اسسامبلەياسىنىڭ رۋحاني جاڭعىرۋعا بەلسەنە اتسالىساتىنىنا سەنىم ءبىلدىرىپ، اسسامبلەيا مۇشەلەرىنە ءوز الەۋەتىن ىسكە اسىرۋعا مۇمكىندىك بەرەتىن ءبىرقاتار جوباعا توقتالىپ ءوتتى. «تۋعان جەر» جوباسى اسسامبلەيا ءۇشىن زور مۇمكىندىكتەرگە جول اشىپ بەرەدى. ەكىنشى. قازاقستاننىڭ «100 جاڭا ەسىمى» جوباسىنا اسسامبلەيا تىكەلەي قاتىسىپ، باسى-قاسىندا ءجۇرۋى كەرەك. ءبىزدىڭ قانشاما زامانداستارىمىز، قانشاما اسسامبلەيا بەلسەندىلەرى ەل يگىلىگى ءۇشىن رياسىز قىزمەت ەتىپ ءجۇر. ۇلتىنا، قاي وڭىردەن ەكەنىنە قاراماستان، ءبىز ولاردىڭ بارلىعىن ەلگە تانىتا ءبىلۋىمىز كەرەك»، – دەي كەلە، ءبىزدىڭ الدىمىزعا ۇلكەن مىندەتتەر قويىپ، بىرنەشە ماڭىزدى جوبانى ىسكە اسىرۋدى تاپسىردى. سوندىقتان، بۇگىنگى باسقوسۋىمىزدىڭ نەگىزگى ماقساتى – جۇكتەلگەن مىندەتتەردى جۇيەلى تۇردە جۇزەگە اسىرۋ جولدارىن ايقىنداۋ، – دەدى كارىم ناسبەك ۇلى.
وبلىس باسشىسى «تۋعان جەر»، «قازاقستاننىڭ 100 جاڭا ەسىمى»، «قازاقستاننىڭ الەمدەگى قازىرگى زامانعى مادەنيەتى»، «جاڭا گۋمانيتارلىق ءبىلىم. قازاق تىلىندەگى 100 وقۋلىق» جوبالارىنىڭ قانداي رۋحاني سەرپىلىس اكەلگەنىن اتاپ ءوتىپ، «ۇلى دالا تاريحى» مادەني-تاريحي ەكسپەديسياسىنىڭ اتقارعان جۇمىسىنا توقتالدى. كيەلى جامبىل جەرىندەگى تاريحي ەسكەرتكىشتەر – اقتوبە – بالاساعۇن، كۇلان، ورنەك، كوستوبە، اقىرتاس سەكىلدى 5 تاريحي-مادەني مۇرامىزدىڭ يۋنەسكو تىزىمىنە ەنگەنى بۇكىل ۇلتتىڭ ماقتانىشى ەكەنىن ايتىپ، سوڭعى ون جىلدا وسى وڭىردە تۋىپ-وسكەن ازاماتتاردىڭ دەمەۋشىلىگىمەن ون سپورتتىق نىسان بوي كوتەرگەنىن ءسوز ەتتى.
جيىندا تاراز قالاسىنداعى «زولوتوي كاراۆان» تۋريستىك ورتالىعىنىڭ ديرەكتورى البينا ۆەيمەر ەكسپو-2017 حالىقارالىق كورمەسى اياسىندا وبلىستىڭ تاريحي-مادەني ورىندارىن ناسيحاتتاۋ باعىتىندا اتقارىلىپ جاتقان شارالاردى تىلگە تيەك ەتتى. مەركى اۋدانىنداعى «باحور» شارۋا قوجالىعىنىڭ مۇشەسى، اۋداندىق ءماسليحاتتىڭ دەپۋتاتى بابىر حاسانبايەۆ ۇلتتىق بىرلىك پەن كەلىسىم نەگىزىندە جالپىعا ورتاق ەڭبەك قوعامىن قۇرۋ كەرەك ەكەنىن ايتىپ، ءوزىنىڭ قولعا العان جۇمىستارىن باياندادى.
– ءبىز، ت.رىسقۇلوۆ جانە مەركى اۋداندارىنىڭ 47 شارۋا قوجالىعى بىرىگىپ، «مەركى ونىمدەرى» اۋىل شارۋاشىلىعى وندىرىستىك كووپەراتيۆىن قۇردىق. بۇل دا حالىقتىڭ ىنتىماعىنان باستاۋ الاتىن ىرزىعى مول ءىستىڭ كەپىلى دەپ بىلەمىن. كووپەراتيۆكە بىرىگۋ ارقىلى، مەملەكەتتىك قولداۋلاردىڭ جەڭىلدەتىلگەن تۇرلەرىن پايدالانۋ مۇمكىندىگى تۋدى. بۇل بىرىگۋدىڭ ماڭىزىن نەسيە جانە ليزينگپەن تەحنيكا العاندا ءجىتى تۇسىندىك. ءبىزدىڭ «باحور» شارۋا قوجالىعى بىلتىر «ىرىس» باعدارلاماسى ارقىلى 35 ميلليون تەڭگەگە رەسەيدەن 100 اسىل تۇقىمدى ءىرى قارا العانبىز، بۇگىنگى كۇنى ونىڭ سانىن 208-گە جەتكىزدىك، – دەيدى ول.
جاندۇنيەنىڭ تازالىعى، رۋحاني بىرلىك دەگەن وسى شىعار. تالاس اۋدانىنىڭ تۇرعىنى، كوپ بالالى انا ۋليانا كيم ۇل-قىزىنىڭ 5-ەۋىن بالالار ۇيىنەن اسىراپ العان ەكەن. ال 4-ەۋى اپكەسىنىڭ بالالارى كورىنەدى. وتباسىلىق قۇندىلىقتاردى ەڭ قاستەرلى ۇعىم دەپ سانايتىن انا ءۇشىن انا مەن بالا اراسىنداعى قارىم-قاتىناستان اسقان ماڭىزدى ەشنارسە جوق. جيىندا ول وسىنى ايتتى.
قورداي اۋدانىنداعى «بەرەكە» گۋمانيتارلىق-تەحنيكالىق كوللەدجى ديرەكتورىنىڭ تاربيە ءىسى جونىندەگى ورىنباسارى كاميليا دۋرگالوۆا وي-ورە كەڭ بولۋى ءۇشىن ءتىل ۇيرەنۋ قاجەت دەيدى. «التىن ۇيا مەكتەبىمدى اياقتاعان سوڭ، ماماندىق تاڭداۋدا كوپ ويلانعان جوقپىن. ەلباسىمىزدىڭ بىزگە ارناعان ءار سوزدەرىنەن مەنىڭ ساناما سىڭگەنى تىلدەردى مەڭگەرۋ بولدى. ءسويتىپ، «شەت تىلدەر مەن مادەنيەتىن وقىتۋدىڭ تەورياسى مەن ادىستەمەسى» ماماندىعىن تاڭداپ، وقۋ ورنىنا ءتۇستىم. مەملەكەتتىك تىلمەن قاتار، اعىلشىن، ورىس، تۇرىك تىلدەرىن جەتىك مەڭگەردىم»، دەي كەلە مەملەكەتتىك جاستار ساياساتى شەڭبەرىندە اتقارىلىپ جاتقان جانە ءوزى جەتەكشىلىك ەتەتىن اۋداندىق ەتنومادەني ورتالىقتىڭ جۇمىسىنا قىسقاشا توقتالدى. سارىسۋ اۋدانى اكىمىنىڭ ورىنباسارى دينارا اسانوۆا جانە تالاس اۋدانىنداعى قاسقابۇلاق اۋىلدىق وكرۋگىنىڭ اكىمى سۋلحادين مۋستافايەۆ «100 ناقتى قادام» – ۇلت جوسپارىنىڭ 4ء-شى باعىتىنىڭ ورىندالۋى تۋرالى بايانداما جاساپ، قوعامدىق كەلىسىم مەن تۇراقتىلىقتى ساقتاۋ بويىنشا قولعا العان شارالاردىڭ جايىن ءسوز ەتتى. سەسسيا سوڭىندا وزبەك ەتنومادەني بىرلەستىگىنىڭ ءتوراعاسى ب.مۋمينوۆ جامبىل وبلىسى قازاقستان حالقى اسسامبلەياسىنىڭ ءتوراعاسىنىڭ قوعامدىق ورىنباسارى بولىپ سايلاندى.
نۇرىم سىرعابايەۆ
«اق جول» گازەتى
