الماتىدا اتىس ۇيىمداستىرىپ، التى ادامدى اجال قۇشتىرعان رۋسلان كۇلىكبايەۆ سوت پەن پوليسيادان كەك الماق بولعان.
بۇل تۋرالى ۆرەميا گازەتىنە سىلتەمە جاساعان kaz.365info.kz جازادى. باسىلىم ءتىلشىسى كۇلىكبايەۆتىڭ تەرگەۋ كەزىندەگى تۇسىنىكتەمەسىنەن شاعىن ءۇزىندى جاريالاپتى. سونىمەن، ول نە دەدى؟
ءوز سوزىندە كۇلىكبايەۆ بالا كەزىنەن كاسىبي تۇردە كيكبوكسينگپەن اينالىسقانىن ايتقان. ءتىپتى، وبلىستىق جارىستاردا ونەر كورسەتكەن ەكەن. الايدا جۇلدەلى ورىندارعا ىلىكپەپتى.
– اسكەردە بولعان جوقپىن، ءبىراق اڭشىلىق قابىلەتىم جاقسى دامىعان. سەبەبى، بۇدان بۇرىن كاسىبي تۇردە پەينتبولمەن اينالىستىم.
مەن شىنىمەن دە سوتتاردان، پروكۋرورلاردان جانە پوليسيادان ءوش العىم كەلدى. سەبەبى، مەنى ادىلەتسىز تۇردە تۇرمەگە جاپتى.
الدىمەن مەن المالى اۋداندىق سوتىنا باردىم، ءبىراق ول جاقتا فورما كيگەن ەشكىمدى كەزدەستىرگەم جوق. وسى ارادان المالى اۋداندىق ىشكى ىستەر باسقارماسىنا تۋرا تارتىپ، پوستتان سىرتقا شىعىپ كەلە جاتقان ادامدى اتتىم.
سوسىن باسقا پوليسەيلەرگە وق جاۋدىردىم. مەن فورما كيگەندەردى عانا كوزدەدىم، بەيبىت تۇرعىندارعا وق اتقان جوقپىن، – دەيدى كۇلىكبايەۆ.
ال جەزوكشەنىڭ ولتىرۋىنە قاتىستى مىناداي تۇسىنىكتەمە بەرىپتى:
«بۇدان بۇرىن مەن ونىمەن جانە ونىڭ قۇربىلارىمەن كەزدەسىپ، ىستەرىنىڭ حارام ەكەنىن ايتقام. ونىڭ ۇستىنە، بۇل قاسيەتتى رامازان ايى بولاتىن. ولار ماعان قۇلاق اسقان جوق. مىنە، سول كەزدە ونى اتىپ ءولتىردىم. ماكاروۆ تاپانشاسىن كوشەدەن تاۋىپ الدىم، قاي جەردە ەكەنى ەسىمدە جوق…».
كۇلىكبايەۆتىڭ قولىندا بولعان ەكى قارۋدى دا پوليسەيلەر تەكسەرىپ ۇلگەرىپتى، ەكەۋى دە ەش جەردە تىركەلمەگەن جانە باسقا قىلمىستارعا قاتىسى جوق.
