مەملەكەت باسشىسى قاسىم-جومارت توقايەۆ «جاڭا جاعدايداعى قازاقستان: ءىس-قيمىل كەزەڭى» اتتى جولداۋىندا بيىل ەلىمىزدە وكىلەتتىك مەرزىمى اياقتالاتىن اۋىل اكىمدەرىن جەرگىلىكتى حالىق سايلايتىنىن ايتقان بولاتىن. بۇل – اشىق، دەموكراتيالىق ەل بولۋدى ماقسات ەتكەن مەملەكەتىمىزدىڭ ساياسي دامۋ ۇدەرىسىندەگى ماڭىزدى ءبىر قادامى ەكەنى ءسوزسىز.

بۇگىن استانا ۋاقىتىمەن تاڭعى ساعات 7:00-دەن باستاپ وبلىستاعى بارلىق سايلاۋ ۋچاسكەلەرى ءوز جۇمىسىن باستادى. تەكەلى قالاسىنا قاراستى رۋدنيچنىي اۋىلدىق وكرۋگىندە العاشقىلاردىڭ ءبىرى بولىپ قوعامدىق كەلىسىم كەڭەسىنىڭ ءتوراعاسى ومار كاشكەنبايەۆ ءوز تاڭداۋىن جاسادى.
ومار اقساقال ءوزىنىڭ ءومىر جولىن تۋعان اۋىلىمەن ۇشتاستىرىپ، تالاي جىل اۋىلدىڭ يگىلىگى جولىندا قىزمەت ەتكەن. بۇگىندە زەينەتكە شىعىپ، قوعامدىق كەڭەسكە ءتوراعالىق ەتىپ كەلەدى.

"بيىلعى اۋىل اكىمدەرىن سايلاۋداعى جاڭاشىلدىق – ازاماتتاردىڭ ءوزىن-وزى ۇسىنۋى. مۇنى اتالعان لاۋازىمدى قىزمەتكە باسەكەلەستىكتى ارتتىرا تۇسەتىن قاجەتتى ءبىر شارت دەپ قاراستىرۋعا ابدەن بولادى. ارينە، ءوزىن-وزى ۇسىنعان ازامات ەڭبەگى مەن جەتىستىكتەرى جايىندا ەل بىلەتىن، مەملەكەتتىك قىزمەتتە نەمەسە كاسىپكەرلىك سالاسىندا وڭبەك ەتكەن، بەلگىلى جەتىستىكتەرگە جەتكەن بولۋى لازىم. ەندەشە، تاجىريبەسى، ءبىلىمى بار ادال ازاماتتار بارىن سالىپ، ەلدىڭ مۇددەسىنە ەڭبەك ەتەمىن دەسە، نەگە قولداماسقا؟! بۇگىن مەن سايلاۋعا بارىپ العاشقىلاردىڭ ءبىرى بولىپ ءوز داۋسىمدى بەردىم. بارشا جەرلەستەرىمدى سايلاۋدا بەلسەندىلىك تانىتىپ، ءوز تاڭداۋلارىن جاساۋعا شاقىرامىن" دەيدى اقساقال.

اتاپ وتسەك رۋدنيچنىي اۋىلدىق وكرۋگىندە 3 كانديدات ساياسي ناۋقانعا قاتىسىپ جاتىر. تاريحي ساتتە اۋىلدىڭ 700-گە جۋىق اۋىل تۇرعىنى داۋىس بەرەدى دەپ كۇتىلۋدە.

ۇلجان ۇلداحان قىزى
تەكەلى قالاسى اكىمىنىڭ باسپا ءسوز حاتشىسى