رۋدنىي قالاسىنىڭ تۇرعىنى ەكاتەرينا كورچاگيناعا قاتىستى “ۇساق بۇزاقىلىق” بابى بويىنشا اكىمشىلىك ءىس قوزعالدى، دەپ حابارلايدى Dalanews.kz.

پوليسيانىڭ مالىمدەۋىنشە، 21 قاراشادا وتكەن قوعامدىق تىڭداۋ بارىسىندا ايەل بەلگىلەنگەن رەگلامەنتتى بۇزىپ، دورەكى ءارى بەيادەپ سوزدەر قولدانعان. بۇل ارەكەتىمەن ول قاتىسۋشىلارعا قۇرمەتسىزدىك كورسەتىپ، قوعامدىق ءتارتىپتى بۇزعان.

اكىمشىلىك سوت ايەلگە 20 اەك (78 640 تەڭگە) كولەمىندە ايىپپۇل سالدى.

ەسكە سالايىق، 21 قاراشا كۇنى رۋدنىي قالاسىندا كوشە اتاۋلارىن وزگەرتۋگە ارنالعان تاريحي قوعامدىق تىڭداۋ ءوتتى.

تىڭدالىمدا قالاداعى يۆان فرانكو كوشەسىن - ءاليا مولداعۇلوۆا، ال 50 لەت وكتيابريا كوشەسىن - دوستىق دەپ وزگەرتۋ ماسەلەسى قارالدى. رۋدنىي قالاسىنىڭ بەلسەندىسى ءارى جەرگىلىكتى اۆتومەكتەپتىڭ ديرەكتورى ەكاتەرينا كورچاگينا تىڭداۋ كەزىندەگى سوزىمەن قىزۋ تالقىعا ءتۇستى. 

بۇل وقيعاعا قاتىستى ساياساتتانۋشى دانيار اشىمبايەۆ نازار اۋدارىپ، تالداۋ جاساعان بولاتىن. 

ال زاڭگەر ادىلەتحان مولداحان كورچاگينانىڭ ارەكەتىن “ۇلتارالىق ارازدىقتى قوزدىرۋدىڭ مادەني نۇسقاسى” دەپ باعالاپ، ونىڭ ءسوزى قىلمىستىق كودەكستىڭ 174-بابى بويىنشا سارالانۋى مۇمكىن ەكەنىن ايتتى.

"ارىز جازامىز. باسقا ۇلت وكىلدەرىنە ايتارىم: قازاقستاندا تۇرۋ ۇناماي ما، رەگلامەنت، زاڭناماسى ۇناماي ما - باسقا ەلگە كوشىڭىزدەر. بۇل ۇلتارالىق الاۋىزدىقتىڭ مادەنيە ءتۇرى. "رەگلامەنتتەرىڭىزگە تۇكىرگەنىم بار" دەپ تۇر. ءقازىر كەڭەس ۇكىمەتى جوق"، - دەدى زاڭگەر.