رۋدنىي قالاسىندا دۇكەندەردىڭ بىرىندە شابۋىل جاسالىپ، قىلمىستىق ءىس قوزعالدى، دەپ حابارلايدى DalaNews.
وقيعا لەنين كوشەسىندەگى دۇكەندە بولعان. الەۋمەتتىك جەلىلەردەگى مالىمەتتەرگە سايكەس، ىشكە كىرگەن ەكى ەر ادام اگرەسسيۆتى ارەكەت تانىتىپ، مۇلىكتى بۇلدىرگەن. ولاردىڭ ءبىرى كاسسا جانىنداعى كالكۋلياتوردى سىندىرسا، ەكىنشىسى قايىرىمدىلىق جاشىگىنىڭ پلومباسىن جۇلىپ العان.
كۇدىكتىلەر جاشىكتەگى قاعاز اقشانى الىپ كەتكەن، ال تيىنداردى قالدىرعان. سونداي-اق، مۇمكىندىگى شەكتەۋلى جاندارعا ارنالعان كوتەرگىش قۇرىلعى دا زاقىمدانعان.
وقيعادان كەيىن دۇكەن قىزمەتكەرلەرى پوليسيا شاقىرعان. كۇدىكتىلەردىڭ جەكە باسى انىقتالعانىمەن، ۇرلانعان اقشا تابىلماعان.
قوستاناي وبلىسى پوليسيا دەپارتامەنتىنىڭ مالىمەتىنشە، اتالعان دەرەك بويىنشا رۋدنىي قالاسىنىڭ 32 جاستاعى تۇرعىنىنا قاتىستى قىلمىستىق ءىس قوزعالدى. قازىرگى ۋاقىتتا ول دەنساۋلىعىنا بايلانىستى مەديسينالىق مەكەمەگە ورنالاستىرىلعان.
تەرگەۋ امالدارى جۇرگىزىلىپ جاتىر.
