قازاقستان رەسپۋبليكاسى پرەمەر-مينيستردىڭ ءبىرىنشى ورىنباسارى رومان سكليار جۇمىس ساپارىمەن "نۇر جولى" قازاقستان-قىتاي اۆتوكولىك وتكىزۋ بەكەتىندە بولدى، دەپ حابارلايدى Dalanews.kz.
اتالعان ءىس-شارا مەملەكەت باسشىسىنىڭ شەكارا ماڭىنداعى ينفراقۇرىلىمدى جاڭعىرتۋ جانە لوگيستيكالىق باعىتتاردىڭ تيىمدىلىگىن ارتتىرۋ جونىندەگى تاپسىرمالارىن جۇزەگە اسىرۋ اياسىندا ءوتتى.
ساپار بارىسىندا رومان سكليار پۋنكتتىڭ ينفراقۇرىلىمى جانە وندىرىستىك قىزمەتىمەن تانىستى، راسىمدەردى سيفرلاندىرۋ، وتكىزۋ قابىلەتى دەڭگەيىن، سونداي-اق جۇك تاسىمالىنىڭ اشىقتىعى مەن ۇزدىكسىز جۇرگىزىلۋىن قامتاماسىز ەتۋ بارىسىن باعالادى.
تەكسەرۋ قورىتىندىسى بويىنشا پرەمەر-مينيستردىڭ ءبىرىنشى ورىنباسارى جاۋاپتى مەملەكەتتىك ورگاندارعا ۆەدومستۆوارالىق ءوزارا ءىس-قيمىلدى كۇشەيتۋ، وتكىزۋ پۋنكتتەرىن جاڭعىرتۋدى جەدەلدەتۋ، جۇكتەردى وڭدەۋ مەرزىمدەرىن ساقتاي وتىرىپ، سانيتارلىق-باقىلاۋ تالاپتارىن قامتاماسىز ەتۋ، سونداي-اق وتكىزۋ پروسەستەرىنىڭ تيىمدىلىگىن ارتتىرۋ ءۇشىن زاماناۋي IT-شەشىمدەردى ەنگىزۋ جونىندە ءبىرقاتار تاپسىرما بەردى.
وتكىزۋ پۋنكتتەرىنىڭ قحر-مەن بەلسەندى ەكونوميكالىق ءوزارا ءىس-قيمىل جاعدايىندا ەكسپورتتىق-يمپورتتىق وپەراسيالاردى ورنىقتى دامىتۋ جانە ەلىمىزدىڭ ترانزيتتىك الەۋەتىن ارتتىرۋ ءۇشىن ستراتەگيالىق ماڭىزدىلىعى اتاپ ءوتىلدى.
اتالعان تاپسىرمالاردىڭ ورىندالۋى ۇكىمەتتىڭ تۇراقتى باقىلاۋىندا بولادى.
