رەسەي فەدەراسياسىنىڭ قورعانىس ءمينيسترى سەرگەي شويعۋ القا ماجىلىسىندە ورتالىق ازياداعى ۇكىمەتتىك ەمەس ۇيىمدار "رەسەيگە قارسى ارەكەتتەرىن ايتارلىقتاي ارتتىرعانىن" جانە "الدىن الۋ شارالارى قابىلدانىپ جاتقانىن" ايتتى. وسىلايشا شويعۋ ورتالىق ازياعا ەسكەرتۋ جاساعانداي بولعان، - دەپ حابارلايدى Dalanews.kz.
"ايماقتا (ورتالىق ازيادا) 100-دەي باتىسشىل ۇكىمەتتىك ەمەس ۇيىم جۇمىس ىستەپ تۇر. ولاردىڭ 16 مىڭ بولىمشەلەرى مەن وكىلدىكتەرى بار. ارنايى اسكەري وپەراسيا كەزىندە بۇل ۇكىمەتتىك ەمەس ۇيىمدار انتيرەسەيلىك ورتالىق ازيا مەملەكەتتەرى مەن رەسەي فەدەراسياسىنىڭ اسكەري-تەحنيكالىق، ەكونوميكالىق جانە مادەني ىنتىماقتاستىعىن ازايتۋ ماقساتىندا رەسەيگە قارسى (انتيرەسەيلىك) ارەكەتتەرىن ايتارلىقتاي ارتتىردى.
ءبىز قاجەت شارالاردى بەلسەندى قولدانا باستايمىز"، - دەيدى شويعۋ.
ءبىراق شويعۋ قانداي شارالار قابىلداناتىنىن ناقتىلاماعان.
بۇعان دەيىن سەرگەي شويعۋ ورتالىق ازياداعى ستراتەگيالىق باعىتتاعى جاعداي كۇردەلى ەكەنىن ايتقان بولاتىن. ونىڭ سوزىنشە، بۇل ايماققا اۋعانستان جاقتان ءقاۋىپ ءتونىپ تۇر.
"سوڭعى ءبىر جىلدا "يسلام مەملەكەتى" سودىرلارىنىڭ سانى 15 پايىزعا وسكەن. ولاردىڭ باستى ماقساتى – ۇقشۇ-نىڭ وڭتۇستىك شەكارالارىندا راديكالدى يدەولوگيا مەن ديۆەرسيالىق ارەكەتتەردى تاراتۋ"، - دەپ توپشىلاعان شويعۋ.
سونىمەن قاتار، سەرگەي شويعۋ بيىل ورتالىق اسكەري وكرۋگتە نەگىزگى كۇش ايماق ەلدەرىندەگى داعدارىستى جاعدايلاردى رەتتەۋگە جانە قازاقستان، قىرعىزستان جانە تاجىكستان اۋماقتارىندا وتەتىن جەتى وقۋ-جاتتىعۋعا قاتىسۋعا باعىتتالاتىنىن حابارلادى. اسكەرلەردى وقىتۋدىڭ ناتيجەسى ۇقشۇ-نىڭ ۇجىمدىق جەدەل ارەكەت ەتۋ كۇشتەرىنىڭ "ءوزارا ءىس-قيمىل-2024" وقۋ-جاتتىعۋى بولادى، وعان بەس مەملەكەتتىڭ اسكەري كونتينگەنتتەرى قاتىسادى.
