Resei Federatsiiasynyń Qorǵanys ministri Sergei Shoiǵý alqa májilisinde Ortalyq Aziiadaǵy úkimettik emes uiymdar "Reseige qarsy áreketterin aitarlyqtai arttyrǵanyn" jáne "aldyn alý sharalary qabyldanyp jatqanyn" aitty. Osylaisha Shoiǵý Ortalyq Aziiaǵa eskertý jasaǵandai bolǵan, - dep habarlaidy Dalanews.kz.
"Aimaqta (Ortalyq Aziiada) 100-dei batysshyl úkimettik emes uiym jumys istep tur. Olardyń 16 myń bólimsheleri men ókildikteri bar. Arnaiy áskeri operatsiia kezinde bul úkimettik emes uiymdar antireseilik Ortalyq Aziia memleketteri men Resei Federatsiiasynyń áskeri-tehnikalyq, ekonomikalyq jáne mádeni yntymaqtastyǵyn azaitý maqsatynda Reseige qarsy (antireseilik) áreketterin aitarlyqtai arttyrdy.
Biz qajet sharalardy belsendi qoldana bastaimyz", - deidi Shoiǵý.
Biraq Shoiǵý qandai sharalar qabyldanatynyn naqtylamaǵan.
Buǵan deiin Sergei Shoiǵý Ortalyq Aziiadaǵy strategiialyq baǵyttaǵy jaǵdai kúrdeli ekenin aitqan bolatyn. Onyń sózinshe, bul aimaqqa Aýǵanstan jaqtan qaýip tónip tur.
"Sońǵy bir jylda "Islam memleketi" sodyrlarynyń sany 15 paiyzǵa ósken. Olardyń basty maqsaty – UQShU-nyń ońtústik shekaralarynda radikaldy ideologiia men diversiialyq áreketterdi taratý", - dep topshylaǵan Shoiǵý.
Sonymen qatar, Sergei Shoiǵý biyl Ortalyq áskeri okrýgte negizgi kúsh aimaq elderindegi daǵdarysty jaǵdailardy retteýge jáne Qazaqstan, Qyrǵyzstan jáne Tájikstan aýmaqtarynda ótetin jeti oqý-jattyǵýǵa qatysýǵa baǵyttalatynyn habarlady. Áskerlerdi oqytýdyń nátijesi UQShU-nyń Ujymdyq jedel áreket etý kúshteriniń "Ózara is-qimyl-2024" oqý-jattyǵýy bolady, oǵan bes memlekettiń áskeri kontingentteri qatysady.
