مەرەكەلىك شارادا «قىران ەلىم – قازاقستان» حورەوگرافيالىق-سازدى تەاترلاندىرىلعان قويىلىممەن اشىلعان مەرەكەلىك كەشتە ۇلتتىق مەرەكەنىڭ ءمان-مازمۇنى جان-جاقتى ايشىقتالدى. تۇركىستان وبلىسىنىڭ اكىمى دارحان ساتىبالدى كوپشىلىكتى رەسپۋبليكا كۇنىمەن قۇتتىقتاپ، تاۋەلسىزدىكتىڭ باعا جەتپەس قۇندىلىق ەكەنىن ايتتى.
– بارشاڭىزدى رەسپۋبليكا كۇنى مەرەكەسىمەن شىن جۇرەكتەن قۇتتىقتايمىن. بۇل مەرەكەنىڭ ءمانى ايرىقشا. مەملەكەت باسشىسى قاسىم-جومارت توقايەۆ ۇلىتاۋدا وتكەن ءبىرىنشى قۇرىلتايدا رەسپۋبليكا كۇنىنە ۇلتتىق مەرەكە مارتەبەسىن قايتارۋدى ۇسىندى. بيىل، 25 قازان – ۇلتتىق مەرەكەگە اينالىپ، رەسپۋبليكا كۇنى بولىپ بەكىتىلدى. الەمدە ءتىلى، ءدىنى، مادەنيەتى بار بولسا دا، تاۋەلسىزدىك الا الماي جۇرگەن ۇلتتار كوپ. بۇل رەتتە باسقا قونعان باقتى باعالاعان ءجون. قازاقستان رەسپۋبليكاسىنىڭ تۇراقتىلىعىن ساقتاۋ، دامىتۋ – بارشامىزدىڭ مىندەتىمىز. مىزعىماس بىرلىك پەن ىزگى تىرلىگىمىز ارقىلى جاڭا قازاقستاندى دامىتۋعا اتسالىسا بەرەيىك. تۇركىستانىمىز تۇرلەنىپ، قازاقستانىمىز گۇلدەنە بەرسىن! – دەگەن دارحان ساتىبالدى ەلدى دامىتۋعا ۇلەس قوسقان ءبىر توپ ازاماتقا مەملەكەتتىك ماراپاتتاردى تاپسىردى.
اتاپ ايتساق، تۇركىستان ءوڭىرىنىڭ ەڭبەگىمەن دارالانعان ازاماتتارىنا «پاراسات»، «قۇرمەت»، ءىىى دارەجەلى «ەڭبەك داڭقى» وردەندەرى ۇسىنىلدى. سونىمەن بىرگە «ەرەن ەڭبەگى ءۇشىن»، «ەرلىگى ءۇشىن»، «شاپاعات» مەدالدارى مەن قۇرمەت گراموتالارى دا ءوز يەلەرىن تاپتى.
رەسپۋبليكا كۇنىنە ارنالعان سالتاناتتى جيىندا وبلىس اكىمى وڭىردە اتقارىلعان جۇمىستارعا توقتالىپ، الداعى جوسپارلاردى دا باياندادى.
– تاۋەلسىزدىگىمىزدىڭ ارقاسىندا ەلىمىز وركەندەپ، تاريحىمىز دارىپتەلدى. سونىڭ ءبىر دالەلى – تۇركىستان وبلىسىنىڭ قۇرىلۋى. تۇركىستان قالاسىنىڭ تاريحي رولىنە ءمان بەرىلىپ، رۋحاني ورتالىققا اينالدى. 4 جىلدا وبلىستىڭ الەۋمەتتىك-ەكونوميكالىق دامۋ قارقىنى ارتا ءتۇستى. 2018 جىلمەن سالىستىرعاندا جالپى وڭىرلىك ءونىم 1،6 ەسەگە ارتىپ، كولەمى 2 ترلن. 796 ملرد. تەڭگەنى قۇرادى. بيىل ونى 3 ترلن. تەڭگەگە جەتكىزۋدى كوزدەپ وتىرمىز. الداعى ۋاقىتتا باعدارىمىزدى وزگەرتىپ، كۇشتى وبلىستىڭ ونەركاسىپ الەۋەتىن دامىتۋعا باعىتتاۋىمىز قاجەت.
بۇگىنگى تاڭدا وبلىس ءۇشىن ماڭىزدى بىرنەشە ءىرى جوبانى ىسكە اسىرۋ جوسپارلانۋدا. جالپى وبلىستا ونەركاسىپتى دامىتۋعا بارلىق مۇمكىندىكتەر بار. اۋدان، قالالاردا يندۋستريالدى ايماقتار اشىلعان. سونىمەن قاتار وڭىرگە ينۆەستورلار تارتۋ ماقساتىندا تۇركىستان قالاسى اۋماعىندا «Turkistan» ارنايى ەكونوميكالىق ايماعى قۇرىلعان. وسىعان بايلانىستى جەرگىلىكتى بيزنەس وكىلدەرىن جاڭا جۇمىس جانە ءوندىرىس ورىندارىن اشۋعا اتسالىسۋعا شاقىرامىن. ءبىز ءتيىستى جەر ۋچاسكەسىن ءبولىپ، قاجەتتى ينفراقۇرىلىمدى تارتۋعا جانە باسقا دا جەڭىلدىكتەرمەن قولداۋ كورسەتۋگە دايىنبىز، – دەدى دارحان ساتىبالدى.
«كونگرەسس حولل» كەشەنىنىڭ زاماناۋي كونسەرت زالىندا وتكەن مەرەكەلىك كەشتە وبلىستىڭ تانىمال ونەرپازدارى وتانشىلدىق باعىتتاعى اندەردى شىرقاپ، بيشىلەر ءوز ونەرلەرىمەن كورەرمەندەردى سەرپىلتتى. تاۋەلسىزدىك، وتان، بىرلىك، وتانشىلدىق ۇعىمدارى ءان مەن جىرعا ارقاۋ ەتىلىپ، ۇلتتىق اسپاپتاردان رۋحتى وياتاتىن كۇي توگىلدى.
جالپى رەسپۋبليكا كۇنىنە وراي تۇركىستاندا 1200-دەن استام ءىس-شارا وتكىزۋ جوسپارلانعان. بۇگىندە باسىم بولىگى ءوتىلىپ ۇلگەرگەن.
