– بيىل ءبىز اۋىل شارۋاشىلىعىنداعى نەگىزگى وزەكتى ماسەلەلەرگە نازار اۋدارىپ، ونى جۇيەلى تۇردە شەشۋ جولدارىن قاراستىردىق. بىرىنشىدەن، جىلىجاي شارۋاشىلىقتارىن قولداۋدىڭ جاڭا تەتىكتەرى جاسالىپ، جىلىتۋ شىعىندارىن سۋبسيديالاۋ ەرەجەسى بەكىتىلدى. بيىلعى جىلعا بۇل ماقساتتا 500 ملن. تەڭگە ءبولىندى.
سونداي-اق جىلىجايلاردى ءبىر ورتالىقتان قاتتى وتىنمەن قامتاماسىز ەتۋ ءۇشىن ارنايى كووپەراتيۆ قۇرىلىپ، كومىر وندىرۋشىلەردەن تىكەلەي تاسىمالداۋ كەلىسىلدى.
ەكىنشىدەن، ماقتا شارۋاشىلىقتارىن دامىتۋ ماقساتىندا «Global Textile Solution»، «TST JETISAY TEXTILE»، «Cotton ماقتا» جانە «Tulpar Textile» جوبالارى جۇزەگە اسىرىلۋدا. ناتيجەسىندە ماقتا باعاسىنا ەكسپورتتىق تاۋەلدىلىكتى جوياتىن بولامىز.
سونداي-اق ماقتا داقىلىن رەنتابەلدىلىگى جوعارى داندىك جۇگەرى داقىلدارمەن الماستىرۋ ماقساتىندا «جىلىنا 150 مىڭ توننا جۇگەرى ءدانىن تەرەڭ وڭدەۋ زاۋىتى» جوباسى جۇزەگە اسىرىلۋدا.
ۇشىنشىدەن، سۋ شارۋاشىلىعىن دامىتۋ ءۇشىن «تۇران سۋ» مەملەكەتتىك كاسىپورىننىڭ جۇمىسىن جۇيەلەندىرۋ ەسەبىنەن، كانالداردى قالپىنا كەلتىرۋ جانە توتەنشە جاعدايلاردىڭ الدىن الۋ جۇمىستارىن مەرزىمىندە اتقارۋعا قول جەتكىزدىك. ناتيجەسىندە بيۋدجەت قارجىسى 28 پايىزعا ۇنەمدەلىپ، ەكونوميكالىق تيىمدىلىگى 1،5 -2 ەسە جوعارى بولدى، – دەدى دارحان ساتىبالدى.
ەگىستىكتى ءارتاراپتاندىرۋ ناتيجەسىندە كوكونىس، باقشا ونىمدەرىنەن رەكوردتىق 3،3 ملن توننا جينالدى. نارىقتى وتاندىق ونىمدەرمەن قامتاماسىز ەتۋ ماقساتىندا بيىل قۇنى 16،7 ملرد.تگ قۇرايتىن 25 جوبانى ىسكە اسىرۋ كوزدەلسە، سونىڭ قۇنى 14،1 ملرد.تگ بولاتىن ناقتى 22 جوبا قوسىلدى. ناتيجەسىندە 396 جۇمىس ورنى اشىلدى.
سالادا جاڭا تەحنولوگيا كەڭىنەن قولدانۋدا. قارقىندى باۋ كولەمى بيىل 5 405 گەكتارعا جەتكىزىلدى. ناتيجەسىندە، ونىمدىلىك 5 ەسەگە ارتىپ وتىر. بۇرىن 60-70 سەنتنەر بولسا، ءقازىر 300-350 سەنتنەرگە دەيىن ءونىم جينالۋدا.
سۋ ۇنەمدەۋ تەحنولوگياسى 31 788 گەكتارعا، «ءبىر القاپتان جىلىنا 2-3 ءونىم الۋ» جوباسى 9 403 گەكتارعا ەندىرىلىپ، سۋدى 2 ەسە ۇنەمدەۋگە مۇمكىندىك بەردى.
جىلىجايلاردىڭ جالپى كولەمى 1 640 گەكتارعا جەتىپ، 140 مىڭ توننا ءونىم جينالدى.
مال شارۋاشىلىعىنىڭ دامۋى بويىنشا وبلىس رەسپۋبليكادا الدىڭعى ورىندا. مال باسى جانە ونىمدىلىگى ورتاشا ەسەپپەن 5%-عا وسۋدە. ەت ەكسپورتى بويىنشا وبلىس رەسپۋبليكادا الدىڭعى ورىندا. ءىرى قارا مال ەتىنىڭ ۇلەسى 85%، ۇساق مال – 60% قۇرايدى. 10 مىڭ توننا ءىرى قارا مال، 4،6 مىڭ توننا قوي ەتى ەكسپورتقا جونەلتىلدى.
