الەۋمەتتىك جەلىلەردە رەسەي ازاماتتارىنا قازاقستاندا بەرىلگەن ءجسن-نىڭ (جەكە سايكەستەندىرۋ ءنومىرى) جاپپاي جويىلىپ جاتقانى تۋرالى اقپارات تارادى. ىشكى ىستەر مينيسترلىگى كوشى-قون قىزمەتى كوميتەتىنىڭ باسشىسى اسلان اتالىقوۆ بۇل اقپاراتتى راستادى، ءبىراق ماسەلەنىڭ ءمان-جايىنا توقتالا كەتتى، – دەپ حابارلايدى Dalanews.kz.

«جسن-دەر كەرى قايتارىلىپ جاتقان جوق، ولار راسىمدەۋ كەزىندە زاڭبۇزۋشىلىق انىقتالعاندارعا قاتىستى جويىلۋدا. ءقازىر تەكسەرىس ءجۇرىپ جاتىر. قاي باپ بويىنشا قىلمىستىق ءىس قوزعالعانىن ناقتى ايتا المايمىن، بۇل – تەرگەۋ دەپارتامەنتىنىڭ قۇزىرىنداعى ماسەلە. تەرگەۋ اياقتالعان سوڭ، مۇمكىن ارىپتەستەرىم تولىق اقپارات بەرە الادى. تەرگەۋ ءىسىنىڭ قۇپيالىعى بار، ءىس ءالى اياقتالعان جوق، تەكسەرۋ مەن انىقتاۋ جۇمىستارى جالعاسۋدا»، – دەدى اتالىقوۆ.

جەلىدە تاراعان اقپاراتقا سايكەس، ءجسن-دى قاشىقتان راسىمدەۋدى ەلىمىزدەگى ەكىنشى دەڭگەيلى بانكتەردىڭ ءبىرى جۇرگىزگەن. ال زاڭ بويىنشا ءجسن-دى راسىمدەۋ ءۇشىن ءوتىنىش بەرۋشى ازاماتتىڭ ءوزى جەكە كەلۋى مىندەتتى. ياعني قاشىقتان راسىمدەۋ – زاڭسىز ارەكەت. اتالىقوۆ بانك اتاۋىن ناقتىلامادى، ءبىراق قازاقستان بويىنشا مۇنداي جاعدايلاردىڭ «وننان استامى» انىقتالعانىن جەتكىزدى.

«بۇل بىرەن-ساران جاعداي ما، الدە جاپپاي سيپات الدى ما؟» دەگەن جۋرناليستەردىڭ ساۋالىنا كوميتەت باسشىسى: «ءقازىر وسى فاكتىلەردىڭ ءبارى تەكسەرىلىپ جاتىر. ازىرگە ناقتى كۇدىكتىلەر دە جوق. تەرگەۋ جالعاسۋدا»، – دەپ قىسقا قايىردى.

كوميتەت باسشىسىنىڭ ايتۋىنشا، قازاقستان زاڭىنا سايكەس، راسىمدەۋ كەزىندە ەرەجە بۇزىلسا نەمەسە جسن العان شەتەلدىك ەل اۋماعىندا تۇرمايتىن بولسا، ءتيىستى ورگاننىڭ ءوتىنىشى بويىنشا جسن كۇشىن جويا الادى.

ءىىم ۇسىنعان اقپاراتقا سۇيەنسەك، بيىل 9 مىڭ رەسەي ازاماتى قازاقستاندا جسن العان. جالپى ەلىمىزدە تۇرۋعا ىقتيارحات العان رەسەيلىكتەر سانى – 87 مىڭعا جەتكەن.

ايتا كەتەيىك، بىلتىر ەلىمىزدە 435 408 شەتەل ازاماتىنا جسن بەرىلگەن. ونىڭ ىشىندە رەسەي ازاماتتارى – 233 013، وزبەكستاننان – 121 719، قىتايدان – 25 654، تاجىكستاننان – 13 846، قىرعىزستاننان – 9 308 ازامات تىركەلگەن.