Áleýmettik jelilerde Resei azamattaryna Qazaqstanda berilgen JSN-niń (jeke sáikestendirý nómiri) jappai joiylyp jatqany týraly aqparat tarady. Ishki ister ministrligi Kóshi-qon qyzmeti komitetiniń basshysy Aslan Atalyqov bul aqparatty rastady, biraq máseleniń mán-jaiyna toqtala ketti, – dep habarlaidy Dalanews.kz.
«JSN-der keri qaitarylyp jatqan joq, olar rásimdeý kezinde zańbuzýshylyq anyqtalǵandarǵa qatysty joiylýda. Qazir tekseris júrip jatyr. Qai bap boiynsha qylmystyq is qozǵalǵanyn naqty aita almaimyn, bul – tergeý departamentiniń quzyryndaǵy másele. Tergeý aiaqtalǵan soń, múmkin áriptesterim tolyq aqparat bere alady. Tergeý isiniń qupiialyǵy bar, is áli aiaqtalǵan joq, tekserý men anyqtaý jumystary jalǵasýda», – dedi Atalyqov.
Jelide taraǵan aqparatqa sáikes, JSN-di qashyqtan rásimdeýdi elimizdegi ekinshi deńgeili bankterdiń biri júrgizgen. Al zań boiynsha JSN-di rásimdeý úshin ótinish berýshi azamattyń ózi jeke kelýi mindetti. Iaǵni qashyqtan rásimdeý – zańsyz áreket. Atalyqov bank ataýyn naqtylamady, biraq Qazaqstan boiynsha mundai jaǵdailardyń «onnan astamy» anyqtalǵanyn jetkizdi.
«Bul biren-saran jaǵdai ma, álde jappai sipat aldy ma?» degen jýrnalisterdiń saýalyna komitet basshysy: «Qazir osy faktilerdiń bári tekserilip jatyr. Ázirge naqty kúdiktiler de joq. Tergeý jalǵasýda», – dep qysqa qaiyrdy.
Komitet basshysynyń aitýynsha, Qazaqstan zańyna sáikes, rásimdeý kezinde ereje buzylsa nemese JSN alǵan sheteldik el aýmaǵynda turmaityn bolsa, tiisti organnyń ótinishi boiynsha JSN kúshin joia alady.
IIM usynǵan aqparatqa súiensek, biyl 9 myń Resei azamaty Qazaqstanda JSN alǵan. Jalpy elimizde turýǵa yqtiiarhat alǵan reseilikter sany – 87 myńǵa jetken.
Aita keteiik, byltyr elimizde 435 408 shetel azamatyna JSN berilgen. Onyń ishinde Resei azamattary – 233 013, Ózbekstannan – 121 719, Qytaidan – 25 654, Tájikstannan – 13 846, Qyrǵyzstannan – 9 308 azamat tirkelgen.
