رەسەيگە باراتىن قازاقستاندىقتار ءۇشىن جاڭا تالاپ ەنگىزىلەدى، – دەپ حابارلايدى Dalanews.kz.
qazaqstantv مالىمەتىنشە، 30 ماۋسىمنان باستاپ رەسەيگە ساپار شەگەتىن قازاقستان ازاماتتارى ءۇشىن جاڭا ەرەجە كۇشىنە ەنەدى.
ەندى شەكارادان وتەردەن 72 ساعات بۇرىن ارنايى سيفرلىق پروفيل تولتىرۋ مىندەتتى بولادى. بۇل پروسەسس RuID دەپ اتالاتىن جاڭا ءموبيلدى قوسىمشا ارقىلى جۇزەگە اسادى. قوسىمشادا ازاماتتار وزدەرىنىڭ جەكە مالىمەتتەرى مەن فوتوسىن جۇكتەۋى، سونداي-اق، مەديسينالىق ساقتاندىرۋدى راسىمدەۋى قاجەت.
جاڭا جۇيە زاڭسىز كوشى-قونمەن كۇرەس ماقساتىندا قولعا الىنىپ وتىر جانە بارلىق شەكارا وتكىزۋ بەكەتىندە قولدانىلادى. بۇل تالاپ 6 جاسقا دەيىنگى بالالارعا، سونداي-اق، رەسەيدە اككرەديتتەلگەن ديپلوماتيالىق وكىلدىكتەر مەن حالىقارالىق ۇيىمداردىڭ قىزمەتكەرلەرىنە، ولاردىڭ وتباسى مۇشەلەرىنە قولدانىلمايدى.
رەسەيگە كىرۋ ءۇشىن ءاربىر قازاقستان ازاماتى QR-كود الۋعا ءتيىس. بۇل تالاپ پاسپورتپەن دە، جەكە كۋالىكپەن دە شەكارا اساتىن ازاماتتارعا بىردەي قولدانىلادى.
